Karty jakich biełaruskich bankaŭ pracujuć u Jeŭrasajuzie?

U kancy krasavika niekalki biełaruskich bankaŭ paviedamili, što ich karty pierastali pracavać u krainach ES. Bolšaść z 21 kamiercyjnaha banka, jaki pracuje ŭ Biełarusi, znachodzicca pad jeŭrapiejskimi sankcyjami praź situacyju z pravami čałavieka ŭ Biełarusi i padtrymku biełaruskim režymam vajny va Ukrainie.

Kartki jakich biełaruskich bankaŭ nie pracujuć u Jeŭrasajuzie?

Z 21 krasavika 2026 hoda apieracyi z vykarystańniem kartak Mastercard Biełhazprambanka i Alfa-Banka Biełaruś stali niedastupnyja na terytoryi krain ES, a taksama ŭ internet-kramach, zarehistravanych u hetych krainach. Jašče ŭ sakaviku ŭ krainach ES pierastali prymać karty Visa hetych bankaŭ. Heta adbyłosia pa rašeńni płaciežnych sistem praz sankcyi ES, uviedzienyja suprać biełaruskich bankaŭ.

U 19‑y pakiet sankcyj Jeŭrasajuza suprać Rasii, jaki ŭstupiŭ u siłu 2 śniežnia 2025 hoda, patrapili try biełaruskija banki: Alfa-Bank, Śbierbank, Bank VTB. Taksama ŭ dakumiencie zhadvajucca BiełVEB i Biełhazprambank — dla ich sankcyi pačali dziejničać zadniaj dataj, jašče z 25 lutaha 2025 hoda. Akramia taho, pad jeŭrapiejskimi sankcyjami taksama znachodziacca Bielinviestbank, Biełahraprambank, Bank Dabrabyt i Bank raźvićcia. Jašče ŭ 2022 hodzie jany byli adklučanyja ad sistemy SWIFT, a z 18 lipienia 2025 ES uvioŭ zabaronu na lubyja bankaŭskija apieracyi z hetymi arhanizacyjami.

Płaciežnaja sistema taksama maje značeńnie

Treba razumieć, što karty lubych bankaŭ na biełaruskaj płaciežnaj sistemie «Biełkart» i rasijskaj płaciežnaj sistemie «Mir» u Jeŭropie nidzie nie prymajuć. Adpaviedna, pry pajezdcy ŭ Jeŭropu pry sabie treba mieć karty sistem Visa abo Mastercard.

Akramia taho, jość alternatyŭnaja płaciežnaja sistema — kitajskaja Union Pay. Jana asabliva papularnaja ŭ krainach Azii, ale i ŭ krainach ES jaje taksama mohuć prymać — usio zaležyć ad taho, ci padtrymlivaje apłatu kankretny bankaŭski terminał. U Biełarusi karty Union Pay vypuskaje Biełhazprambank.

Niekatoryja biełaruskija karty ŭ Jeŭropie pracujuć, ale jość niuans

Usio jašče pracoŭnymi ličacca kartki Biełarusbanka, banka Rašeńnie, Banka RRB, Biełaruskaha narodnaha banka, BSB Banka, MTBanka, Niea Banka Azija, Parytetbanka, Pryjorbanka, StatusBanka, Technabanka i Cepter Banka.

Adnak harantyj taho, što apłata biełaruskaj kartaj projdzie ŭ Jeŭropie, niama, dzielacca vopytam biełarusy-padarožniki.

Navat kartka banka, jaki nie znachodzicca pad sankcyjami, moža nie spracavać pry apłacie ŭ Jeŭropie praz rehulacyi kankretnaha banka, jaki absłuhoŭvaje płaciežny terminał abo handlovy punkt.

Časta jeŭrapiejskija banki błakujuć lubyja apieracyi z «biełaruskim kampanientam» — zakryvajuć rachunki biełaruskim hramadzianam abo nie dazvalajuć apłatu biełaruskimi kartami. Hetaja ahavorka raspaŭsiudžvajecca i na źniaćcie najaŭnych u bankamatach u Jeŭropie.

A što z apłataj anłajn biełaruskimi kartami?

Na servisach braniravańnia žylla Booking.com i Airbnb praktyčna niemahčyma zapłacić biełaruskaj kartaj — jany aficyjna spynili pracu ź biełaruskimi bankami.

Adnak, jak pišuć biełarusy ŭ sacsietkach, časam apłata i prachodzić — možna sprabavać karty roznych bankaŭ, uklučać VPN abo vybirać apłatu praz Paypal.

Taksama rajać padčas braniravańnia vybirać varyjanty, pry jakich nie patrabujecca pieradapłata i jość mahčymaść raźličycca najaŭnymi na miescy.

Toje ž samaje tyčycca i apłaty ŭ jeŭrapiejskich internet-kramach, servisach taksi i dastaŭki — kartki niepadsankcyjnych bankaŭ z płaciežnymi sistemami VISA i Mastercard pavinny pracavać, ale harantyj niama.

Jak alternatyvu možna vykarystoŭvać apłatu z dapamohaj ApplePay z kartkaj niepadsankcyjnaha banka.

Što jašče treba viedać dla apłaty za miažoj

U niekatorych restaranach, hatelach i kramach u Jeŭropie možna pytacca pra apłatu z dapamohaj Paypal — kali karta ŭžo pryviazanaja, to apłata na telefonie z NFC z vykarystańniem QR-koda pavinna prajści biez prablem.

Uličvajučy niaprostuju situacyju z apłataj kartami padčas pajezdak u Jeŭrasajuz, samaja papularnaja parada padarožnikaŭ — mieć pry sabie najaŭnyja hrošy. Biez dekłaravańnia biełarusy mohuć pieravozić praź miažu da 10 tysiač dołaraŭ, ale treba ŭličvać i patrabavańni krain-susiedak. Tak, pry vyjeździe ź Litvy ŭ Biełaruś dziejničaje limit u 60 jeŭra najaŭnych na čałavieka (na inšuju valutu abmiežavańni nie raspaŭsiudžvajucca).

• 5
• 0
• 0
• 4
• 1
• 0
• 0
• 0