Ciapier buduć adklučać prakat samakataŭ padčas drennaha nadvorja
Siezon elektrasamakataŭ u Minsku startuje 15 sakavika. Na vulicach źjavicca bolš za 15 tysiač elektrasamakataŭ i rovaraŭ.
Pra toje, jakija źmieny čakajuć karystalnikaŭ, abmierkavali na sustrečy z pradstaŭnikami kikšerynhavych kampanij u Minharvykankamie 11 sakavika, pišuć Minsk-naviny.
Pieršym abmierkavali pytańnie raźmiaščeńnia parkovak.
Było adznačana, što karystalniki nie zaŭsiody pakidali samakaty i rovary ŭ śpiecyjalna paznačanych miescach, što stvarała ciažkaści dla navakolnych. Ciapier kikšerynhavyja kampanii pavinny sami stvaryć abaviazkovyja zony parkoŭki, zaviaršyć pajezdku pa-za miežami jakich budzie niemahčyma.
— Takija punkty varta raźmiaščać u zručnych miescach. Adnak ich raźmiaščeńnie pavinna być raśsiarodžanym i skaardynavanym, kab piešachodam było kamfortna pieramiaščacca, — adznačyŭ namieśnik načalnika DAI Minharvykankama Dzianis Livanovič. — U pryvatnaści, važna vyklučyć situacyi, kali ŭ adnym samym papularnym miescy znachodzicca šmat elektrasamakataŭ, jakija pieraškadžajuć ruchu.
Što datyčycca prypynkaŭ kala ŭvachodaŭ u Minski mietrapaliten: parkoŭka ŭ radyusie 50 m ad ich zabaroniena, i ŭ hetym siezonie kantrol za vykanańniem hetaha praviła budzie bolš strohim.
Aktualnym zastajecca i pytańnie rehulavańnia sumiesnych pajezdak na adnym samakacie. Kali raniej niekatoryja kampanii mahli vynosić parušalnikam papiaredžańni, to ciapier praviły buduć adnolkavymi dla ŭsich.
— U vypadkach, kali budzie zafiksavana pajezdka ŭ tandemie, vy pavinny budziecie zabłakavać hetaha karystalnika da kanca siezona, — padkreśliła namieśnica staršyni kamiteta ekanomiki Minharvykankama Volha Lavoška.
Jašče adnym novaŭviadzieńniem stanie adklučeńnie mahčymaści prakatu samakataŭ padčas drennaha nadvorja.
Pastupali prapanovy i ad kikšerynhavych kampanij. Tak, pradstaŭniki adnoj ź ich vykazali hatoŭnaść vydzielić srodki na naniasieńnie i restaŭracyju raźmietki vieładarožak. Taksama ŭ hetym siezonie płanujecca ŭnieści źmieny ŭ dziejučaje rašeńnie Minharvykankama, jakoje rehuluje praviły parkoŭki arandavanych SPM. Adpaviedny prajekt užo padrychtavany.
Zaraz u Minsku zabaroniena pakidać elektrasamakaty na terytoryi ŭstanoŭ adukacyi, parkaŭ i skvieraŭ, stancyj mietro, kulturnych abjektaŭ i zon masavych mierapryjemstvaŭ.
Kamientary