Jaŭhiena Bułku abvinavačvajuć u machlarstvie ŭ Dubai na $1 miljon. A jon kaža, što sam paciarpieły
Rasijskija ŚMI pišuć, byccam biełaruski šoŭmien sprabavaŭ adkryć u Dubai pryvatnuju rasijskuju škołu razam z zorkaj «Doma-2». Ale ciapier škoła nie pracuje, a baćki zastalisia biez hrošaj. Jaŭhien Bułka raspavioŭ «Našaj Nivie» svajo bačańnie situacyi.
Niekalki dzion tamu ŭ rasijskich ŚMI źjaviłasia infarmacyja, što biełaruski šoŭmien Jaŭhien Bułka razam z zorkaj «Doma-2» Andrejem Čujevym apynuŭsia ŭ centry mižnarodnaha skandału praz machlarstva z pryvatnaj rasijskaj škołaj «Škoła budučyni» ŭ AAE. Śćviardžałasia, byccam mužčyny abiacali stvaryć ruskamoŭnuju navučalnuju ŭstanovu z kamfortnymi ŭmovami, a košt navučańnia tam pačynaŭsia ad pryblizna 5500 jeŭra da amal 11 000 jeŭra za hod.
Sioleta pryvatnaja škoła sapraŭdy adkryłasia i pačała pracavać, ale ŭ chutkim časie tam pačalisia surjoznyja prablemy: adklučyli kamunalnyja pasłuhi, a paźniej budynak byŭ apiačatany. Ciapier paciarpiełymi sabie ličać nie tolki baćki, jakija apłacili navučańnie, ale i vykładčyki, jakim abiacali kamfortnaje pražyvańnie i dapamohu z afarmleńniem dakumientaŭ dla pracy ŭ AAE.
«Naša Niva» paprasiła Jaŭhiena Bułku raskazać pra toje, jak jon trapiŭ u hetuju niepryjemnuju situacyju. Šoŭmien śćviardžaje, što nie maje nijakaha dačynieńnia da stvareńnia škoły, a sam byŭ usiaho tolki najomnym supracoŭnikam.
Pačałosia ŭsio z taho, što Jaŭhien šukaŭ sadok, kudy addać svajo dzicia. U adnym ź miascovych čataŭ jamu napisała administratarka toj samaj «Škoły budučyni» (pry joj byŭ i sadok) i prapanavała pryjści da ich. Abiacali i rasterminoŭku na apłatu navučańnia.
— Ja pryjšoŭ u tuju škołu spačatku jak baćka. Ja razumieŭ, što ŭ majho dziciaci niama bazy, kab atrymlivać adukacyju na anhlijskaj movie. Plus u našym rajonie sadkoŭ amal što niama. Tamu vyrašyŭ schadzić i pahladzieć, što i jak.
U škole byli praduhledžanyja brytanski i ruskamoŭny treki. To-bok možna było spačatku navučać dzicia pa ruskamoŭnym treku, a potym pieravieści na brytanski.
Padčas razmovy z kiraŭnictvam škoły Jaŭhien raspavioŭ pra svoj bekhraŭnd. Jaho dośvied zacikaviŭ dyrekcyju:
— I prahučała takaja fraza: «Słuchajcie, moža, vam było b cikava stać u nas dyrektaram pa pazaškolnaj adukacyi? Tym bolš my płanujem pašyracca, nam patrebnyja novyja vykładčyki».
Pieršy raz Jaŭhien admoviŭsia. Ale paśla paznajomiŭsia z rasijaninam Andrejem Čujevym — toj taksama pryvioŭ svajo dzicia ŭ škołu, a potym zastaŭsia tam jak pamočnik.
— U Andreja jość biznes-dośvied, dośvied u śfiery budoŭli. Tamu jon kuryravaŭ ramont u škole. I jon skazaŭ: «Tak, prajekt sapraŭdy cikavy. Z tvaim vopytam ty taksama možaš być tut vielmi karysnym. Pasprabuj, ja vieru ŭ hety prajekt».
U instahramie škoły Andrej Čujeŭ nazyvaŭ siabie pijar-dyrektaram i rabiŭ videaahlad terytoryi.
Paśla Jaŭhien paznajomiŭsia z zasnavalnikam škoły (jon ciapier fihuruje ŭ rasśledavańni), mieŭ doŭhuju razmovu z dyrektaram. Na toj momant usio padavałasia biaschmarnym i pryhožym.
Tamu kali prapanova pracy prahučała druhi raz, Jaŭhien vyrašyŭ jaje pryniać. Kaža, siarod jaho zadač byŭ pošuk vykładčykaŭ dla roznych hurtkoŭ — ad mientalnaj aryfmietyki da kursa pa štučnym intelekcie — i składańnie raskładu zaniatkaŭ.
— Praź miesiac ja spytaŭ: «Dyk a što pa zarpłacie?». Mnie adkazali: «Zaraz my adkryjem rachunak u banku, i budzie ŭsim zarpłata. Jość niekatoryja składanaści, ale chutka ŭsio zrobim: škoła ž nie moža isnavać biez rachunku».
Dla Jaŭhiena heta prahučała pierakanaŭča. Tym bolš jon bačyŭ, što idzie aktyŭny nabor vykładčykaŭ asnoŭnych pradmietaŭ, zakupajecca abstalavańnie, rekłama škoły ŭsiudy źjaŭlajecca.
— 25 žniŭnia škołu aficyjna adkryli. Usio było lehalna! Niemahčyma ŭ Arabskich Emiratach adkryć škołu, kali ty nie atrymaŭ licenziju, nie prajšoŭ usie pravierki. Nielha prosta arandavać ofis i skazać: «Prychodźcie da nas u škołu».
Ale ž pry hetym Jaŭhien adznačaje, što ŭ škoły byli tolki ŭnutranyja pracoŭnyja damovy.
— Usio heta tłumačyli składanaściu z adkryćciom bankaŭskaha rachunka dla hramadzian Rasii.
Niekalki tydniaŭ u škole sapraŭdy prachodzili zaniatki, dzicia Jaŭhiena chadziła ŭ sadok. A potym pačałosia dziŭnaje.
— Raptam miascovy adździeł adukacyi dasłaŭ infarmacyju, što škoła nie maje prava pracavać afłajn — byccam niedastatkova niejkich dakumientaŭ. Škołu pieraviali na anłajn. Nu ładna. Značyć, zaraz darobiać dakumienty i zapuściacca. Baćki prychodzili, apłačvali navučańnie… Ja školnuju formu svajmu dziciaci nabyŭ.
Na pytańnie, jak ža baćki apłačvali navučańnie, kali ŭ škoły nie atrymlivałasia adkryć bankaŭski rachunak, Jaŭhien tłumačyć: jamu viadoma, što baćki prynosili najaŭnyja abo čeki ŭ pryjomnuju.
Ceny na naviedvańnie samoj škoły adroźnivalisia ŭ zaležnaści ad kłasa. Jaŭhien kaža, što navat nie cikaviŭsia ŭsim prajsam, bo jaho heta nijak nie tyčyłasia.
— Ja viedaju tolki, što dziciačy sadok kaštavaŭ 24 tysiačy dyrchamaŭ na hod (pryblizna 5600 jeŭra). Možna było apłacić za hod ci pa miesiacach.
Jaŭhien adznačaje, što škoła była raźličana bolš čym na 3000 vučniaŭ, a jaje terytoryja zajmała vielizarnuju płošču. Navat nie ŭsie karpusy paśpieli ŭvieści ŭ ekspłuatacyju. Zhodna ź infarmacyjaj u instahramie škoły, jana maje 28 karpusoŭ i ahulnuju płošču 42 tysiačy kvadratnych mietraŭ.
— Jak heta vyhladała dla mianie: škoła daje rekłamu, prychodziać vučni — značyć, miascovyja ŭłady dali dazvoł. Na žal, ja nie ŭnikaŭ u administratyŭny praces.
Jaŭhien kaža: jon užo dva hady žyvie ŭ Dubai i byŭ upeŭnieny, što pieraskočyć praź miascovuju sistemu niemahčyma.
Viarnucca da afłajn zaniatkaŭ u škoły tak i nie atrymałasia. Jaŭhien kaža, što znoŭ usio tłumačyli niejkimi biurakratyčnymi niuansami.
— Zrazumieła, što baćki pačali aburacca. A dalej pryjšli pravierki — i pačałosia rasśledavańnie. Vielmi šmat pytańniaŭ ciapier.
Ciapier Jaŭhien nie moža zrazumieć, čamu jaho asacyjujuć z zasnavalnikam škoły, kali jon byŭ zvyčajnym supracoŭnikam. Dyj dałučyŭsia da prajekta tolki 5 žniŭnia.
— Moža, tamu što šmat kamunikacyi z baćkami było na mnie i na Andrei. Andrej dyk uvohule vielmi viadomaja asoba — ščyra kažučy, ja raniej ničoha pra jaho nie čuŭ, ale baču, jak na jaho reahujuć ludzi z Rasii.
Imavierna, sprava i ŭ tym, što videa ź Jaŭhienam Bułkaj i siońnia možna pabačyć u instahramie toj «Škoły budučyni»: jon raspaviadaje pra sistemu apłaty i ceny.
Jaŭhien raspaviadaje, što Andrej Čujeŭ pracavaŭ samaaddana — na terytoryi škoły mužčyny časam pravodzili pa 12 hadzin, kab padrychtavać jaje da adkryćcia.
U adnym z rolikaŭ Andrej demanstruje, što ramont idzie navat u ciemry. I z honaram padkreślivaje, što budynak škoły častkova razmalavany ŭ kolery rasijskaha ściaha:
— Hladzicie, jak pryhoža! Ściah Rasijskaj Fiederacyi. Ja ŭvohule chacieŭ uvieś budynak bachnuć pad ściah! Alena (kiraŭnica naša) skazała: «Andrej, nu nie śpiašajsia, usiamu svoj čas».
Jaŭhien ža zapeŭnivaje:
— U mianie navat dumak nie było, što prajekt moža być nie realnym. Ja bačyŭ šmat nabytaha abstalavańnia, ramont na vielizarnych terytoryjach… Navat i ciapier dla mianie ŭsio vyhladaje jak łancužok niedarečnych vypadkovaściaŭ. Ale nadziei na toje, što niejak narmalna vyrašycca, amal nie zastałosia.
Na pytańnie pra stvaralnikaŭ škoły biełaruski šoŭmien adkazvaje, što asabista byŭ znajomy tolki z adnym — i pry im tolki hety čałaviek prymaŭ rašeńni i ahučvaŭ płany (jon ciapier pad śledstvam). Ale viedaje, što ŭ dakumientach było paznačana niekalki zasnavalnikaŭ.
Nivodnaj zarpłaty za čatyry miesiacy pracy Jaŭhien tak i nie pabačyŭ. Ale ŭ sud pakul iści nie źbirajecca — kaža, što chacieŭ by ŭsio ž pahavaryć z tym zasnavalnikam.
— Pakul u mianie niama zusim nijakaj infarmacyi pra toje, što moža być dalej. Hety skandał tolki pazaŭčora niejak trapiŭ u ŚMI — i dla mianie heta stała šokam. Bo nu jakim ja bokam da hetaj situacyi? Stvaralnik prajekta? Dziakuj za kamplimient, ale pakul nie. Heta jak hulnia niejkaja, jak sieryjał.
Apošni raz instahram škoły abnaŭlaŭsia 3 kastryčnika — tam 27‑hadovy mužčyna raspaviadaje, što budzie vykładać 3D-madelavańnie.
Pavodle infarmacyi rasijskich ŚMI, dvoje z zasnavalnikaŭ škoły ŭžo aryštavanyja arabskimi ŭładami — nazyvajuć imiony niejkaj Aleny Siarhiejevaj i jaje dački Łarysy. Paviedamlajecca, što žančyny raniej byli asudžanyja za machlarstva ŭ Rasii.
Taksama pišuć, što paciarpiełyja stracili pryblizna 1,1 miljona jeŭra.
Andrej Čujeŭ — taksama asoba ź nieidealnaj reputacyjaj. Raniej byłaja dziaŭčyna abvinavačvała jaho ŭ tym, što mužčyna byccam uziaŭ u jaje hrošy i abiacaŭ zabiaśpiečyć pieramohu ŭ konkursie pryhažości ŭ Dubai.
A ŭ svaim instahramie Andrej publikavaŭ videa pra toje, što heta Jeŭropa ŭciahnuła Ukrainu ŭ vajnu z Rasijaj, abiacajučy ŭzamien ustupleńnie ŭ Jeŭrasajuz.
Ciapier čytajuć
Jaŭhiena Bułku abvinavačvajuć u machlarstvie ŭ Dubai na $1 miljon. A jon kaža, što sam paciarpieły4
Kamientary