Jakija damoŭlenaści byli ŭ amierykancaŭ z Łukašenkam pa vyzvaleńni palitviaźniaŭ? Tłumačyć Viačorka

Kali vyzvalać nastupnych palitviaźniaŭ

Franak Viačorka patłumačyŭ paŭzu z vyzvaleńniem palitviaźniaŭ śviatočnym pieryjadam u ZŠA. Hety tydzień u Štatach faktyčna niepracoŭny z-za Dnia dziakavańnia, i nastupny tydzień taksama chutčej za ŭsio budzie cichim. Adnak, pavodle słoŭ daradcy, užo ŭ pieršaj pałovie śniežnia praces pavinien intensifikavacca.

«Dzianis Kučynski na nastupnym tydni jedzie ŭ Vašynhton, budzie sustrakacca z usimi našymi partniorami, u tym liku pa vyzvaleńniach», — padzialiŭsia płanami Viačorka.

Hałoŭnaja prablema, jak davodzić Viačorka, palahaje ŭ pazicyi aficyjnaha Minska:

«Minsk sprabuje maksimalna vytarhavać. Chočuć, kab nie tolki amierykancy, a jašče i jeŭrapiejcy zdymali svaje sankcyi. Łukašenka damaŭlajecca, a potym jamu zdajecca, što tanna pradaŭ — treba daražej pradać, jašče daražej. Jon mianiaje praviły hulni padčas samich pieramovaŭ».

Viačorka tłumačyć, što Łukašenka, z adnaho boku, choča skarystacca aknom mahčymaściaŭ u kantaktach z ZŠA, a ź inšaha — baicca stracić kantrol nad situacyjaj. Na pavodziny režymu taksama ŭpłyvaje i ekanamičny faktar: sankcyi zakranajuć jak biełaruskuju, tak i rasijskuju ekanomiku.

Taksama, jak adznačaje Viačorka, na Łukašenku dziejničaje napružanaść vakoł pieramovaŭ pa Ukrainie: jon čakaje, u jaki bok pojdzie ahulnaja trajektoryja, i heta ŭzmacniaje jaho niaŭpeŭnienaść, ad čaho jon «šarachajecca i šuhajecca», zaciahvajučy praces.

Pry hetym Viačorka padkreślivaje: «Amierykancy nastrojeny rašuča. Śviatłana Cichanoŭskaja tydzień tamu havaryła z Koŭłam. U kantakcie my i z Krysam Śmitam, i ź inšymi ludźmi, ź jakimi pracujem, pieradajom, abnaŭlajem śpisy — humanitarnyja śpisy, śpisy pa katehoryjach».

Jak davodzić Viačorka, ZŠA zajmajucca nie tolki biełaruskimi palitviaźniami, ale i zamiežnymi hramadzianami, jakija siadziać u biełaruskich turmach. Jany «pracujuć i ź inšymi stalicami», kab ich vyzvalić, jak heta adbyvałasia, naprykład, z ukrainskim bokam. U vyniku častka ludziej była vyzvalena pa śpisie, jaki pieradaŭ Kijeŭ, pra ludziej ź jaho biełaruskija pravaabaroncy nie viedali.

Jak farmirujucca humanitarnyja śpisy

Adkazvajučy na pytańnie, chto i jak pieradaje śpisy na vyzvaleńnie, Viačorka padkreślivaje: humanitarnyja śpisy składajucca centralizavana biełaruskimi pravaabaroncami supolna z demakratyčnymi siłami.

«U amierykancaŭ hety śpis jość, jość u Vatykana, jość u inšych našych partnioraŭ, jakija kamunikujuć ź Minskam. Minsk pra heta viedaje, Minsk usio roŭna kaža, što jany ŭsie terarysty, ekstremisty, złačyncy i nijakija nie palitviaźni», — zaŭvažaje daradca Cichanoŭskaj.

Hałoŭnaja ŭmova — biez prymusovaj departacyi

Asobna daradca Cichanoŭskaj raskazaŭ pra ŭmovy, jakija stavić demakratyčny bok.

Hałoŭnaja ź ich: vyzvaleńnie pavinna adbyvacca biez abaviazkovaj departacyi.

Jak adznačaje Viačorka, raniej Minsk vystaviŭ žorstkuju ŭmovu: usie vyzvalenyja pavinny vyjechać z krainy. Pry hetym, pavodle jaho, padčas departacyi režym stvaraje ludziam dadatkovyja pieraškody. Bolš za toje, vyzvaleńnie adbyvajecca «pa-za lehalnaj praceduraj»:

«Pavodle łukašenkaŭskich słužbaŭ, hetyja ludzi albo źbiehli z turmy, albo praciahvajuć znachodzicca ŭ turmie. To-bok jany nie atrymlivajuć ni dokazaŭ, ni paćvierdžańniaŭ, što jany sapraŭdy reabilitavanyja, sapraŭdy pamiłavanyja, sapraŭdy źniatyja abvinavačvańni. I zaraz Departamient vykanańnia pakarańniaŭ i inšyja orhany prychodziać da ich siemjaŭ, znoŭ ža kašmaryć i pałochać».

Jašče adna ŭmova — siemji pakinuć u spakoi 

Na pohlad Viačorki, klučavaja prablema ŭ tym, što «damoŭlenaści, jakija navat jość u amierykancaŭ ź Minskam, usio roŭna parušajucca».

Demakratyčnyja siły źbirajuć dokazy ŭsich parušeńniaŭ — u tym liku situacyi, kali paśla vyzvaleńniaŭ ułady praciahvajuć kašmaryć siemji. «Heta była samaja pieršaja ŭmova, što vyzvalenyja pa amierykanskim treku, ich siemji buduć u spakoi», — zaŭvažaje Viačorka.

Padsumoŭvajučy charaktar pieramovaŭ, Franak Viačorka vykazvajecca davoli žorstka:

«My razmaŭlajem, my z amierykancami pracujem nad vyzvaleńniem, ale pieramovy viadziom z hopnikam. Z hopnickim kryminalnym režymam, jaki nie trymaje svajo słova, nie trymaje svaje abiacańni i jaki pierajhraje ŭsio. Tamu amierykancy damaŭlajucca pra adno, atrymlivajecca inšaje. Damaŭlajucca pra adnych ludziej — atrymlivajuć inšych ludziej. Ale jany ŭsio roŭna praciahvajuć hety praces, i my zaachvočvajem».

«My spadziajomsia, što kali pojdzie havorka pra vialikuju hrupu vyzvalenych, to ŭsio ž taki vialikaj častcy ludziej (my b chacieli, kab usim, ale chacia b vialikaj častcy ludziej) dazvolać zastacca ŭ Biełarusi», — vykazvaje nadzieju daradca Cichanoŭskaj.

• 20
• 3
• 6
• 6
• 2
• 3
• 0
• 1