Kolkaść nasielnictva płaniety sistematyčna zanižajecca — navukoŭcy
Niadaŭniaje daśledavańnie pakazała, što ŭ niekatorych rehijonach nasielnictva moža pieravyšać aficyjnyja źviestki na 84%.
Dakładnyja źviestki ab kolkaści nasielnictva źjaŭlajucca klučavym elemientam u navukovych, sacyjalnych i ekałahičnych daśledavańniach — ad płanavańnia resursaŭ i infrastruktury da daśledavańnia chvarob i kiravańnia ryzykami pryrodnych katastrof.
Acenki kolkaści nasielnictva śvietu, jakija vykarystoŭvajuć takija arhanizacyi, jak AAN i Suśvietny bank, u asnoŭnym hruntujucca na pierapisach nasielnictva. Akramia ich, daśledčyki taksama abapirajucca na spadarožnikavyja zdymki, jakija dapamahajuć vyznačyć zabudavanyja terytoryi i ŭzrovień načnoha aśviatleńnia.
Adnak, jak śćviardžajuć aŭtary daśledavańnia, vyniki jakoha apublikavany ŭ časopisie Nature Communications, takija mietady pracujuć dla haradoŭ, ale dla sielskaj miascovaści jany nie zaŭždy dakładnyja. U vyniku ŭ hłabalnych demahrafičnych danych adsutničaje značnaja častka sielskaha nasielnictva. Istotnyja razychodžańni nazirajucca ŭ Kitai, Brazilii, Aŭstralii, Kałumbii i navat Polščy.
Da takich vysnovaŭ navukoŭcy pryjšli ŭ pracesie vyvučeńnia 307 prajektaŭ budaŭnictva płacin u 35 krainach, jakija byli realizavany ŭ pieryjad z 1975 pa 2010 hod. Dla bolš poźnich hadoŭ takoj infarmacyi nie znajšłosia.
Jak tłumačać aŭtary, kali budujuć płaciny, adbyvajecca zatapleńnie vialikich terytoryj, ź jakich papiarednie pierasialajuć ludziej. U takich vypadkach nasielnictva pieraličvajecca dakładna, tamu što kampanii, jakija zajmajucca budaŭnictvam, vypłačvajuć kampiensacyi.
Atrymanyja danyja z takich terytoryj vučonyja paraŭnali ź infarmacyjaj, jakaja raźmieščana ŭ piaci najbolš aŭtarytetnych hłabalnych bazach dadzienych ab nasielnictvie. Vyśvietliłasia, što isnujučyja acenki zanižajuć kolkaść sielskaha nasielnictva ad 53% (u bazie WorldPop) da 84% (u GHS-POP).
«Heta značyć, što navat u samaj dakładnaj bazie danych kolkaść sielskaha nasielnictva zanižana jak minimum udvaja», — adznačajuć daśledčyki.
Jak tłumačać aŭtary, kompleksny zbor dadzienych ab nasielnictvie ŭ sielskaj miascovaści pradstaŭlaje asablivyja składanaści. U mnohich krainach adsutničajuć nieabchodnyja finansavyja resursy dla dakładnaha ŭliku ludziej, asabliva kali nasielnictva raskidana pa vialikaj terytoryi.
Akramia taho, nasielnictva ŭ addalenych rajonach abo ŭ zonach kanfliktaŭ ciažka achapić pierapisam, a pierapisčyki sutykajucca z moŭnymi barjerami i admovami va ŭdziele.
Takija prablemy, adznačajuć aŭtary, mohuć pryvieści da značnych prabiełaŭ u źviestkach. Naprykład, u Parahvai padčas pierapisu 2012 hoda, mahčyma, nie ŭličyli da čverci nasielnictva.
Jašče adna z pryčyn niedakładnaściej — jakaść spadarožnikavych zdymkaŭ. Bazy dadzienych GHS-POP i WorldPop vykarystoŭvajuć spadarožnikavyja vyjavy z razroźnieńniem 100 mietraŭ, što dobra padychodzić dla vyznačeńnia haradskich terytoryj, dzie budynki raźmiaščajucca ščylna. Adnak takoje razroźnieńnie zanadta hrubaje, kab dakładna vyjaŭlać maleńkija vioski i chutary, jakija mohuć być mocna raskidanyja na vialikich płoščach.
Akramia taho, GHS-POP prymianiaje fiksavanuju masku, jakaja budujecca na asnovie spadarožnikavych zdymkaŭ budynkaŭ. Heta aznačaje, što raźlik nasielnictva viadziecca tolki ŭ zonach, dzie ałharytm vyjaviŭ budynki.
Adnak prablema ŭ tym, što hety mietad znachodzić usiaho 4% budynkaŭ u sielskaj miascovaści, pakolki mnohija vioski mohuć być schavany pad hustoj raślinnaściu abo mieć zabudovu, jakaja adroźnivajecca ad haradskoj. Heta pryvodzić da značnaha zanižeńnia acenki nasielnictva ŭ sielskich rajonach.
Jak zaŭvažajuć vučonyja vyjaŭlena sistematyčnaja pamyłka ŭ bok niedaacenki kolkaści nasielnictva pryvodzić da taho, što sielskija rehijony ŭvieś čas sutykajucca ź niedachopam pasłuh, resursaŭ i mahčymaściaŭ dla raźvićcia.
U suviazi z tym, što ŭ sielskaj miascovaści pražyvaje kala 43% ŭsiaho nasielnictva płaniety, atrymanyja vyvady majuć daloka idučyja nastupstvy i staviać pad sumnieŭ aficyjnuju infarmacyju ab tym, što na płaniecie pražyvaje 8,2 miljarda čałaviek.
Aŭtary zaklikajuć da pierahladu padychodaŭ da acenki kolkaści nasielnictva, kab u budučym sielskija rehijony nie zastavalisia ŭ niavyhadnym stanoviščy pry raźmierkavańni resursaŭ.
Ciapier čytajuć
U Homieli zakryli zabiahałaŭku pradprymalnika-łukašysta i źniščyli jaho płakat sa Stalinym9
Kamientary