«Płakali ŭsie». Vypuskniki dzielacca svaimi emocyjami ad miescaŭ raźmierkavańnia
U niekatorych biełaruskich VNU ciapier idzie papiaredniaje raźmierkavańnie. Z hetaj nahody maładyja śpiecyjalisty vykładajuć u sacsietki videa ŭ farmacie «Čakańnie-realnaść».
«Płakali ŭsie — niechta ad ščaścia, niechta ad hora», — acharaktaryzavała praces raźmierkavańnia adna sa śviežaśpiečanych vypusknic.
U Biełaruskaj sielskahaspadarčaj akademii čakańni bolšaści z tych, chto pahadziŭsia źniacca ŭ roliku, spraŭdzilisia. Mnohich nakiroŭvajuć dadomu (časta heta maleńkija harady ci vioski), što ŭ situacyi z mahčymymi scenarami paśla akademii — adnaznačna plus.
Ale byli i niepryjemnyja vyniki. «Ja chaču trapić u Aleksandryju, ale ja viedaju, što tudy nie traplu», — uśmichajecca vypusknica akademii Maryja. Tak i stałasia — jaje adpravili ŭ AAT «Ihnacičy», što ŭ Čuryłavičach (Minski rajon). A vypusknik Valer pajedzie ŭ viosku Smaljany, što ŭ Aršanskim rajonie, što taksama razyšłosia ź jaho čakańniami — jon chacieŭ u Lepielski rajon.
Najbolš aktyŭna raźmierkavańnie ciapier idzie ŭ miedykaŭ. Na stamatałahičnym fakultecie VDMU chapaje asabistych dram. Tak, adzin z maładych stamatołahaŭ niezadavoleny rašeńniem adpravić jaho ŭ Babrujsk: jon raźličvaŭ na Minsk ci chacia b Mahiloŭ. Nie paradavali pierśpiektyvami i vypusknicu Safiju: jana taksama maryła pracavać stamatołaham-chirurham u stalicy, ale joj prapanavali Šarkaŭščynu (rajonny centr u Viciebskaj vobłaści). Maładyja ludzi płanujuć pasprabavać vypravić situacyju na kančatkovym raźmierkavańni.
U Hrodzienskim dziaržaŭnym mieduniviersitecie niekatoryja adrazu byli nastrojenyja rašuča: «kudy ŭžo boh pašle». «Boh» adpraŭlaŭ niekatorych u Babrujsk i Minsk. Ale adnu dziaŭčynu, jakaja chacieła pracavać u Hrodnie doktaram ahulnaj praktyki, nakiravaŭ u Astraviec. Jaje ž sakurśnicu, jakaja taksama raźličvała na Hrodna, u vyniku raźmierkavali ŭ Navahrudak.
Jašče na adnym fakultecie vypusknikam sapsavali nastroj Kobrynam zamiest Bresta, Kaściukovičami zamiest Mahilova i Kareličami zamiest Vaŭkavyska.
Padzialilisia svaim losam i novaśpiečanyja farmaceŭty. Najbolš nie pašancavała vypusknicy Maryi, jakaja chacieła ŭ Lepiel, a ŭ vyniku pajedzie va Ušačy (Viciebščyna). I Lery, jakaja mieciła ŭ Lidu ci Vaŭkavysk, ale atrymała raźmierkavańnie ŭ Śvisłač.
U kamientarach pad videa niekatoryja ščyra ździŭlajucca: «Niaŭžo pierad raźmierkavańniem jašče pytajuć, kudy vypusknik choča». «Časam — tak, ale nie zaŭsiody čakańni supadajuć z mahčymaściami», — adkazvajuć vypuskniki.
Ludzi zbolšaha spačuvajuć biudžetnikam, adznačajučy, što «raźmierkavańnie — heta adkładzienaje rabstva». Ale jość tyja, chto padbadziorvaje i žadaje nie markocicca: «Usio minaje chutka, adpracoŭka taksama pralacić».
Biełaruś — adzinaja ŭ Jeŭropie kraina, dzie isnuje abaviazkovaje raźmierkavańnie. Niahledziačy na krytyku takoj praktyki, biełaruskija čynoŭniki ličać adpracoŭku sacyjalnaj vyhodaj i harantyjaj ad dziaržavy. Ministr adukacyi Andrej Ivaniec jašče ŭ 2023 hodzie abaznačyŭ, što vypusknikoŭ biełaruskich univiersitetaŭ mohuć čakać jašče bolšyja terminy raźmierkavańnia — da piaci hadoŭ, a ŭ tych, chto vučycca pa metavym nakiravańni — da siami hadoŭ.
Taksama čynoŭniki ŭžo ahučyli ideju, kab adpracoŭku pačali prachodzić i vypuskniki-płatniki. «Siońnia i biudžetnik, i płatnik, pa našym mierkavańni, pavinny adpracoŭvać», — zajaviŭ ministr adukacyi na adnoj z narad u Łukašenki. Na jaho dumku, płatnaja vyšejšaja adukacyja «źjaŭlajecca adnoj ź mier sacyjalnaj padtrymki studentaŭ», bo 50% vydatkaŭ na navučańnie płatnika ŭsio adno, maŭlaŭ, kampiensujuć siońnia ŭniviersitety.
Vypusknika nie pryniali na raźmierkavańnie. Zaraz jon vinny bolš za 20 000 rubloŭ
«Prosta adčuvała siabie pacukom». Maładaja žurnalistka raskazała, jak kinuła rajonku, kudy jaje raźmierkavali
«Chiejtu ŭ maim žyćci było šmat». Što za dziaŭčyna zdymaje biełaruskich artystaŭ i papularnaje biełaruskaje jutub-šou «O(b)suždajem»
Ciapier čytajuć
Alaksandr Łukašenka tak lasnuŭsia na lod na chakiei, što trybuny zamierli VIDEA124
Kamientary
Za padrychtoŭku śpiecyjalistaŭ ludzi zapłacili padatkami. Jašče i śpiecyjalist sam płacić časam i zdaroŭjem.