Žachlivaja historyja ŭ «Minsk-Śviecie»: sabaka na dvary naparoŭsia na šampur, haspadynia ličyć, što jaho ŭvatknuli naŭmysna
Zvyčajnaja prahułka z sabakam pa «Minsk-Śviecie» ledź nie skončyłasia trahiedyjaj dla korhi pa mianušcy Miata. Sabaka naparoŭsia na šampur dla šašłykoŭ, jaki tyrčaŭ ź ziamli.
Haspadynia sabaki Alesia raskazała, što ŭsio adbyłosia ŭ noč z 4 na 5 lutaha pobač z domam «Tanha», raźmieščanym pa vulicy Bryleŭskaj.
Muž Alesi pierad snom vyhulvaŭ Miatu, i ŭ niejki momant korhi natknułasia na mietaličny stryžań, piša «Anłajnier».
«Sabaka naparoŭsia na zahnuty, zavostrany šampur, jaki tyrčaŭ ź ziamli na tym maršrucie, dzie jon uvieś čas hulaje. Pryčym zahnutym kancom uvierch, jak byccam pad jaho rost. Kali b sabaka byŭ vyšejšym, jon zusim inakš by na jaho naparoŭsia, a Miata nasadziłasia całkam. Jak kavałak miasa», — raskazała Alesia.
Za žyćcio sabaki daktary zmahalisia cełuju noč.
«Ciapier, dziakuj bohu, jana doma. Miata cudam nie praparoła sabie ŭnutranyja orhany (šampur vyjšaŭ vonki pamiž analnaj adtulinaj i pochvaj), tamu jaje žyćciu ničoha nie pahražaje, ale ŭsio mahło zaviaršycca zusim inakš», — ličyć Alesia.
Pra zdareńnie haspadynia raskazała ŭ miascovych čatach i napisała zajavu ŭ milicyju. Alesia ličyć, što toje, što adbyłosia, nie vypadkovaść i šampur vastryjom uvierch mahli pastavić naŭmysna.
«Vieterynary taksama skazali, što, kali b šampur prosta lažaŭ na ziamli, sabaka tak na jaho nie nasadziŭsia b», — tłumačyć Alesia.
Pry hetym haspadynia korhi ŭdakładniaje, što praz sabaku ni z kim ź miascovych žycharoŭ u jaje kanfliktaŭ nie było.
«Pra heta ŭ nas u milicyi taksama spytali, ale prablem ni z kim nie było. Prosta, mabyć, jość nieadekvatny čałaviek, kamu padobnaje dastaŭlaje zadavalnieńnie. Byŭ užo i inšy vypadak, kali ŭ tym ža rajonie my ledź nie trapili na prynadu typu «vožyk», — kaža Alesia.
Ciapier čytajuć
«Sojevyja ekstremisty pavinny adpracavać misku kłubnic». Skardziŭsia na ŭmovy pracy ŭ KDB, a ciapier uciuchvaje treninhi siłavikam — chto taki Anton Šabunievič13
Kamientary