U Budapiešcie prajšli masavyja mitynhi Orbana i jaho hałoŭnaha supiernika
Mienš čym praź miesiac, 12 krasavika, u Vienhryi projduć parłamienckija vybary.
Premjer-ministr Vienhryi Viktar Orban i jaho hałoŭny supiernik, lidar partyi «Cisa» Pieter Madźjar, praviali maštabnyja mitynhi ŭ Budapiešcie z nahody nacyjanalnaha śviata 15 sakavika, piša «Jeŭrapiejskaja praŭda» sa spasyłkaj na Reuters i 24.hu.
Orban zaklikaŭ svaich prychilnikaŭ mabilizavacca na hałasavańnie, jakoje jon nazvaŭ «histaryčnym». Pavodle jaho słoŭ, kirujučaja partyja «Fides» pavinna pierasiahnuć svoj vynik na vybarach 2022 hoda.
«My pavinny pieramahčy nie tak, jak čatyry hady tamu, a lepš. Nam treba bolš hałasoŭ», — zajaviŭ jon.
Premjer taksama pradstaviŭ budučyja vybary jak vybar pamiž vajnoj i miram, abvinavaciŭšy apanientaŭ u sprobach uciahnuć Vienhryju ŭ vajnu va Ukrainie.
Apazicyja hetyja abvinavačańni adkidaje.
Pavodle słoŭ Orbana, mitynh jaho prychilnikaŭ staŭ najbujniejšym u svaim rodzie i zapoŭniŭ płošču kala parłamienta. U toj ža čas apazicyjnyja siły sabrali dziasiatki tysiač ludziej na alei, jakaja viadzie da Płoščy Hierojaŭ.
Pieter Madźjar nazvaŭ kampaniju Orbana «śmiešnaj prapahandaj». Vystupajučy na Płoščy Hierojaŭ, jon zajaviŭ, što Vienhryja pavinna zastavacca častkaj Jeŭrapiejskaha Sajuza i NATA.
«Utrymać uładu luboj canoj — voś što dla jaho zaraz maje značeńnie. Pravakavać vajnu, pahražać vajnoj, razduvać vajnu. Heta jaho samaja mahutnaja zbroja suprać vienhierskaha naroda», — zajaviŭ jon.
Zhodna z danymi anłajn-tranślacyj, za pramovaj Madźjara sačyła značna bolš ludziej, čym za pramovaj premjer-ministra Viktara Orbana. Za pramovaj Orbana na Facebook sačyli 9—10 tysiač čałaviek, tady jak na staroncy premjer-ministra na YouTube maksimalnaja kolkaść hledačoŭ składała 4 tysiačy.
U toj ža čas zaraz za pramovaj Madźjara sočać 44 tysiačy čałaviek u Facebook i 87 tysiač na YouTube.
Raniej žurnalisty-rasśledavalniki vyśvietlili, što Rasija nakiravała ŭ Vienhryju hrupu palittechnołahaŭ, jakija dziejničajuć u rasijskaj ambasadzie ŭ Budapiešcie, dla praviadzieńnia dezynfarmacyjnaj kampanii i ŭmiašańnia ŭ parłamienckija vybary ŭ krainie.
Tym časam Orban abvinavaciŭ apazicyjnuju partyju «Cisa» ŭ tym, što jaje finansuje Ukraina. Jon zaklikaŭ žurnalistaŭ dabivacca publikacyi spravazdač kamiteta pa nacyjanalnaj biaśpiecy, ale jany tak i nie atrymali adkazaŭ.
Novyja apytańni hramadskaj dumki pierad parłamienckimi vybarami ŭ Vienhryi demanstrujuć rost padtrymki partyi Orbana «Fides», adnak apazicyjnaja «Cisa» praciahvaje lidziravać z adryvam u 14 pracentnych punktaŭ.
«Sojevyja ekstremisty pavinny adpracavać misku kłubnic». Skardziŭsia na ŭmovy pracy ŭ KDB, a ciapier uciuchvaje treninhi siłavikam — chto taki Anton Šabunievič1919
Kamientary