U Hrodnie dzicia dva miesiacy krała cacki z kramy. Jaho maci choča padać u sud na pradaŭcoŭ
Dzicia hrodzienki z siaredziny listapada krała cacki z kramy «Dietmir» na vulicy Ahinskaha. Za dva miesiacy dzicia vyniesła tavaraŭ amal na tysiaču rubloŭ. Kali hrodzienka vyjaviła, što cacki byli skradzieny, jana vyrašyła padać zajavu ŭ sud na supracoŭnikaŭ kramy. Pa mierkavańni žančyny, adkaznaść za źniknieńnie tavaru lažyć na ich, piša hrodna.life.
Hrodzienka Faina apublikavała videa ŭ TikTok 19 studzienia. Praz 20 hadzin paśla publikacyi rolik byŭ vydaleny. Za hety čas jaho pahladzieli bolš za sto tysiač karystalnikaŭ, kala tysiačy čałaviek pakinuli svaje kamientaryi.
Mašynki kramie viarnuli, a kanstruktar nie atrymałasia
Dzieviacihadovaje dzicia Fainy prynosiła dadomu novyja cacki ź siaredziny listapada. Žančyna źviarnuła na heta ŭvahu, ale dzicia skazała, što ŭziało ich u znajomaha chłopčyka. Pa słovach hrodzienki, jana nie nadała asablivaha značeńnia hetamu epizodu.
Užo 18 studzienia da Fainy źviarnuŭsia pradaviec z kramy «Dietmir» i paviedamiŭ, što jaje dzicia skrała cacki. «Pryniesła mnie skrynki ad hetych cacak: tam byli mašynki Hot Wheels i, atrymlivajecca, Lego. Cacki ja addała joj, Lego my nie zmahli [addać], tamu što jano razabranaje», — raspaviała ŭ videa Faina.
Hrodzienka zapeŭniła, što za Lego jana «adnaznačna zapłacić».
Dzicionak vynies cacki na sumu amal u tysiaču rubloŭ
Fainu aburyła, što jaje dzicia dva miesiacy prychodziła ŭ kramu i bieśpieraškodna vynosiła cacki. Ale pretenzii ŭ hrodzienki ŭźnikli nie da dziciaci, a da supracoŭnikaŭ kramy.
«Atrymlivajecca, jany siońnia jaho złavili za ruku i pryviali da mianie. Heta značyć, na praciahu dvuch miesiacaŭ vy nie bačyli <…> što ŭ vas tavaru skrali na tysiaču biełaruskich rubloŭ?» — aburajecca hrodzienka.
Žančyna płanuje sudzicca z kramaj, bo ličyć situacyju nadzvyčajnaj. Faina adznačaje, što adkaznaść za źniknieńnie tavaru lažyć na supracoŭnikach, adsutnaści ŭ kramie kamier i achoŭnikaŭ, što i stała pryčynaj kradziažu. Pry hetym hrodzienka dadaje, što ad adkaznaści sychodzić nie źbirajecca i budzie «adkazvać za ŭčynki svajho dziciaci».
Za kradziež z kramy siamju mohuć pastavić u SNS
Zhodna ź biełaruskim zakanadaŭstvam, dzieci, jakija nie dasiahnuli 14 hadoŭ, nie niasuć kryminalnaj adkaznaści. Pry hetym siamju Fainy mohuć pryznać sacyjalna niebiaśpiečnaj (SNS). Hetaja pracedura praduhledžana dla prablemnych siemjaŭ. U tym liku ŭ SNS traplajuć i niepaŭnaletnija, abvinavačanyja ŭ kradziažach, bojkach i raśpivańni ałkaholu.
SNS praduhledžvaje pravierki siamji z boku sacyjalnych rabotnikaŭ i pastanoŭku dziciaci na ŭlik u dziciačym pakoi milicyi.
Ciapier čytajuć
«Usio tak ci inakš budzie vyrašacca na poli boju». Čym budzie zajmacca novaja kiraŭnica Misii demakratyčnaj Biełarusi va Ukrainie?4
Kamientary