Biełarus nabyŭ kvateru ŭ Ispanii, ale jaje zaniali akupasy. Ciapier jon nie moža jaje viarnuć
U kvatery biełarusa Aleha žyła jaho maci. U navahodniuju noč, kali jaje nie było doma, kvateru zaniali čužyja ludzi. Palicyja stała na bok niazvanych haściej. Jak tak?
Biełarus Aleh Pakroŭski maje niekalki kvater u Barsiełonie. Hod tamu adnu ź ich zachapili akupasy. Svajoj historyjaj mužčyna padzialiŭsia ŭ adnym z vypuskaŭ jutub-kanała Illi Varłamava.
Chto takija akupasy?
U Ispanii raspaŭsiudžana prablema akupasaŭ — ludziej, jakija niezakonna pranikajuć u čužoje žyllo i žyvuć tam. Častka ź ich — heta palityčnyja aktyvisty, jakija zajmajuć pustujučyja budynki ŭ jakaści palityčnaha pratestu.
Druhija — heta sapraŭdnyja zachopniki, jakija zasialajucca ŭ pryvatnyja kvatery i damy, u jakich nichto nie žyvie. Uładalnikami mohuć być jak fizičnyja, tak i jurydyčnyja asoby.
Siarod hetaj hrupy akupasaŭ jość tyja, chto sapraŭdy maje patrebu ŭ žylli. Ale jość i hrupa tych, chto zajmaje čužoje žyllo z metaj stvareńnia tam prytonu ci praviadzieńnia niezakonnych apieracyj z narkotykami ci zbrojaj.
Raspaŭsiudžanaj praktykaj źjaŭlajecca i vymahańnie hrošaj u zakonnych uładalnikaŭ u abmien na vysialeńnie. Pryčym kali raniej zajmali žyllo, jakoje sapraŭdy pustavała, to ciapier situacyja źmianiłasia. Zajmać stali i kvatery, dzie pražyvajuć ludzi.
Asabliva vostra hetaje pytańnie staić u Barsiełonie. Pryčym, čym horšy rajon, tym bolš šancaŭ na toje, što vy možacie vyjści sa svajoj kvatery prosta ŭ kramu pa chleb i zastacca biez ułasnaści.
Navahodni «padarunak»: jak zachapili kvateru
Aleh raskazvaje, što kvateru, jakuju zachapili akupasy, jon nabyŭ u 2018 hodzie z metaj zdačy ŭ arendu. Znachodzicca jana ŭ nie vielmi dobrym rajonie Śjutat Vielja. Apošnim časam u kvatery padčas svaich pryjezdaŭ u Barsiełonu žyła jaho maci. Tam jana i zarehistravanaja.
U tym ža domie na pavierch vyšej jość jašče adna akupavanaja kvatera. Jak tłumačyć Aleh, akupasy dačakalisia momantu, kali jaho maci nie budzie doma, i kali jana adpraviłasia śviatkavać Novy hod, uzłamali dźviery i pranikli ŭ pamiaškańnie.
Pa słovach mužčyny, zamiest razłamanych uvachodnych dźviarej akupasy pastavili dźviery z vannaha pakoja. Jany nie padychodzili pa pamierach, tamu ščylinu źnizu davodziłasia zatykać koŭdraj.
Pa słovach Aleha, pavodle ispanskaha zakonu, kali novyja žychary prabyli ŭ kvatery bolš za 48 hadzin, to ich užo amal niemahčyma adtul vysielić.
Čamu palicyja biaśsilnaja?
Jak tłumačać ekśpierty, u Ispanii pravy čałavieka stajać vyšej za pravy ŭłasnaści. Praz 48 hadzin znachodžańnia ŭ kvatery akupanty nabyvajuć novy status. Jany mohuć rasparadžacca čužoj ułasnaściu i abaronieny cełym šeraham pałažeńniaŭ zakonaŭ. Tamu paŭnamoctvy palicyi mocna abmiežavanyja.
Kali ž siarod novych žycharoŭ jość ciažarnyja žančyny ci dzieci, to ŭ bolšaści vypadkaŭ palicyja stanovicca na bok akupasaŭ. Admietna, što isnuje ceły servis pa pradastaŭleńni ciažarnych žančyn. Im dastatkova pražyć u zaniataj kvatery ŭsiaho tydzień, kab palicyja adčapiłasia.
Kali ž uładalnik kvatery maje inšaje žyllo, to viarnuć stračanaje amal nierealna. Łohika nastupnaja: kali ŭ vas jość jašče adna kvatera, to čamu b vam nie dać dach nad hałavoj tym, chto ŭ im sapraŭdy maje patrebu.
Niekatoryja palicejskija navat na praciahu pieršych dvuch sutak nie buduć ničoha rabić, bo chočuć pierastrachavacca i nie dziejničać biez sudovaha ordera. A na jaho atrymańnie patrabujecca čas, jaki dziejničaje na karyść zachopnikaŭ.
Takaja sistema dazvalaje novym žycharam abzavieścisia dokazami svajho prava na žyllo. Imi mohuć być navat čeki na dastaŭku z kramy ci restarana na hety adras. A kali jany paśpiejuć apłacić rachunak za kamunalnyja pasłuhi, to situacyja vyhladaje zusim nie na karyść zakonnaha ŭładalnika.
Adzinaje, što zastajecca, — iści ŭ sud i ni ŭ jakim razie nie sprabavać vysielić zachopnikaŭ samastojna.
«Jany pavieryli im na słova»
Jak raskazvaje Aleh, akupasy dziejničajuć u hrupoŭcy vielmi arhanizavana. Ich asnoŭnaja zadača — adrazu paśla praniknieńnia da prybyćcia palicyi pazbavicca ad asabistych rečaŭ starych uładalnikaŭ i napoŭnić kvateru svaimi.
Aleh tłumačyć klučavy jurydyčny momant: sam praces uzłomu dźviarej źjaŭlajecca niezakonnym. Kali b palicyja zaśpieła akupasaŭ u toj momant, kali jany łamali zamok, ale jašče nie trapili ŭnutr, ich možna było b prahnać bieź jakich-niebudź nastupstvaŭ.
Samaje cikavaje, što palicyja jakraz i pryjechała ŭ hety momant. Dźviery ŭžo byli złamanyja, ale akupasy jašče nie paśpieli zanieści svaje rečy ŭ kvateru — jany ŭsio jašče znachodzilisia na vulicy.
Akupasy patłumačyli palicyi, što jany nibyta tolki što kupili hetuju kvateru, ale ŭ ich niama klučoŭ, tamu i daviałosia ŭryvacca takim čynam. Kali palicyja paprasiła dakumienty, jakija paćviardžajuć kuplu, jany adkazali, što ŭsie papiery znachodziacca ŭ nataryusa. A pakolki była navahodniaja noč, źviazacca ź im i atrymać dakumienty niemahčyma, ale trapić u kvateru im chočacca prosta ciapier. Palicyja pavieryła im na słova i ničoha nie zrabiła.
Aleh zhadvaje, što paźniej sam vyklikaŭ palicyju i sprabavaŭ z dakumientami na rukach davieści, što žyllo niezakonna zaniataje. Ale ničoha nie vyjšła. Situacyju ŭskładniała toje, što siarod novych žycharoŭ była ciažarnaja žančyna.
«Palicyja byccam by pasprabavała dapamahčy. Jany pahavaryli z hetymi akupantami, patłumačyli, što heta nie niejkaja kvatera, jakaja pustuje, heta žyllo majoj mamy, i što było b niadrenna, kab jany pakinuli hetuju kvateru. Ale [mnie] jany skazali, što vydvarać ich z kvatery nie buduć. Tamu što heta było 31 śniežnia — 1 studzienia, na vulicy choładna.
I ŭ ich nie padniałasia ruka vyhnać ciažarnuju žančynu na vulicu. Tamu jany paprasili ich pakinuć kvateru na nastupny dzień i pašukać sabie inšaje žyllo dla akupacyi. Nam jany patłumačyli — kali hetyja akupanty nie zachočuć vysialacca, to ničoha z hetym zrabić nie atrymajecca. To-bok heta tolki ich dobraja vola», — raskazvaje mužčyna.
Sproba viarnuć svajo i aryšt
Aleh raskazvaje, što spačatku jon z bratam pasprabavaŭ damovicca z kałumbijcami-akupasami i prapanavać im hrošy ŭzamien za vysialeńnie. Jon byŭ hatovy dać 3 tysiačy jeŭra. Ale jany adkazali, što hrošy ich nie cikaviać. Im patrebna žyllo.
Praź niekatory čas paśla hetaha Aleh z bratam vyrašyli ryzyknuć.
«My pryjšli nočču. Tyja dźviery, što jany ŭziali z vannaj, nie padychodzili pa pamiery, zakryvalisia prosta na klamku i vielmi słaby zamok. Jaho možna było rukoju adsunuć. Tak my tudy i patrapili. Ale jany znachodzilisia ŭnutry i schapilisia za nažy. U nas byŭ inšy «arhumient». Jany zrazumieli, što jon lepšy za ich nažy, i prosta źbiehli adtul u čym maci naradziła, bo sprava była nočču».
Dziejničajučy pavodle parady advakata, mužčyny pasprabavali viarnuć svaju kvateru. Płan byŭ u tym, kab chutka zajści, sabrać i vykinuć rečy zachopnikaŭ, a taksama źmianić zamok, kab jany nie zmahli ŭvajści.
Adnak jany nie paśpieli: palicyja pryjechała ŭsiaho praz 5 chvilin paśla ich źjaŭleńnia. Da taho momantu jany paśpieli vynieści tolki častku rečaŭ.
«Situacyja vyhladała trochi dziŭna. Tamu što niejkija hołyja ludzi na vulicy śćviardžajuć, što ŭ ich tam jość žyllo biez anijakich dakumientaŭ. Palicyja padniałasia, i jana im pavieryła. Niahledziačy na toje, što ŭ nas byŭ dakumient pra kuplu kvatery. Jany nie stali navat hladzieć. Jany skazali: «Niavažna, ci źjaŭlaješsia ty ŭłaśnikam kvatery. Važna toje, što hetaja kvatera — žyllo inšych ludziej, i mienavita jany vyklikali palicyju».
Aleh sprabavaŭ davieści, što jon haspadar, u jaho dakumienty, i jon znachodzicca ŭ svajoj kvatery. Ale heta na palicyju nie padziejničała. Jaho abvinavacili va ŭvarvańni.
Na videa, jakoje jon demanstruje, čuvać, jak palicejskija prosiać ich pakinuć žyllo i tłumačać:
«Nas vyklikali, tamu što tut žyvuć inšyja ludzi. Navat kali heta vaša ŭłasnaść i heta žyllo akupavali, ličycca, što tut žyvuć ludzi, jakija jaho zaniali. (…) Vy ździejśnili pravaparušeńnie — vy ŭłamalisia ŭ dom».
Vyrašalnym «dokazam» dla palicyi stała zubnaja ščotka. Kali palicyjant spytaŭ u akupasaŭ, dzie ich rečy, tyja skazali, što ŭ vannaj lažyć ich zubnaja ščotka čyrvonaha koleru. Palicyja znajšła jaje, i hetaha akazałasia dastatkova, kab paćvierdzić ich prava na žyllo.
U vyniku brata Aleha źbili i nadzieli na jaho kajdanki. Samomu Alehu taksama nadzieli kajdanki, i abodvuch advieźli ŭ śledčy izalatar. Rečy mužčyn palicyja pakinuła ŭ kvatery. U zaplečniku brata byli klučy ad jaho kvatery. U vyniku jana była abrabavanaja.
Pa słovach Aleha, praz dva dni ich vypuścili na čas śledstva. Za sprobu viarnuć svaju kvateru mužčynam pahražaje da 7 hadoŭ pazbaŭleńnia voli.
«Pieršaje — heta toje, što my złamali dźviery. Choć heta byli maje dźviery, ale tym nie mienš ich nielha było łamać. Toje, što my trapili ŭ kvateru biez dazvołu ludziej, jakija tam žyvuć. Toje, što my vyhnali hetych ludziej, — jany heta paličyli jak pahrozu. I toje, što my ŭziali pravasudździe ŭ svaje ruki, — heta samaje strašnaje abvinavačańnie», —
pieraličvaje Aleh i dadaje, što palicyja prasiła ŭ suda vypisać order na zabaronu nabližacca da kvatery na 150 mietraŭ, kab «zaścierahčy» akupasaŭ ad zakonnaha ŭładalnika.
Absurdnaje rašeńnie suda
Kab viarnuć svaju kvateru, Aleh byŭ vymušany pajści sudovym šlacham, jaki akazaŭsia vielmi doŭhim i składanym.
Pieršaja sproba była niaŭdałaj. Paśla taho, jak jany z bratam napisali zajavu ŭ palicyju ab zachopie žylla, sud prosta zakryŭ spravu. Arhumientacyja była absurdnaj: pa-pieršaje, sud nie ŭbačyŭ składu złačynstva, a pa-druhoje, zajaviŭ, što «niemahčyma identyfikavać złačyncaŭ», a tamu i spravy niama.
Tady za spravu ŭziaŭsia advakat, jaki padaŭ paŭtorny pazoŭ ab vysialeńni. U im była klučavaja farmuloŭka: jon patrabavaŭ vysielić lubych ludziej, jakija niezakonna znachodziacca ŭ kvatery, navat kali ich asoby nie ŭstanoŭleny. Hety praces zaniaŭ 11 miesiacaŭ.
Narešcie, sud vynies rašeńnie, jakoje ŭražvaje svajoj supiarečlivaściu: jon pryznaŭ, što kvatera była zachoplenaja niezakonna, ale pry hetym admoviŭsia vydać ordar na vysialeńnie. Pa sutnaści, rezalucyja hučała tak: «Zachapili niezakonna, ale chaj žyvuć».
Jak tłumačać ekśpierty, hety jurydyčny absurd tłumačycca asablivaściami ispanskaha zakanadaŭstva, jakoje časta stavić kanstytucyjnaje prava na žyllo vyšej za prava ŭłasnaści. Zakon abaraniaje taho, chto fizična pražyvaje ŭ domie («haspadara de-fakta»), navat kali jon nie źjaŭlajecca ŭłaśnikam.
Tamu sapraŭdnamu ŭłaśniku davodzicca nie prosta iści ŭ sud, a jašče i prachodzić praz doŭhija biurakratyčnyja pracedury, kab dakazać nie tolki svajo prava na majomaść, ale i toje, što akupasy dziejničali naŭmysna, viedajučy pra jaho isnavańnie.
Hod biez kvatery, ale ź ipatekaj
Ciapier Aleh maje mahčymaść tolki padyści da dźviarej kvatery, jakija ciapier majuć abaronu ad praniknieńnia i nazyvajucca «antyakupacyjnymi».
«U Biełarusi takoje było b niemahčyma. (…) Tut situacyja całkam naadvarot. Kali ŭ ciabie akupavali kvateru, ty całkam traciš na jaje ŭsie pravy. I akramia hetaha ty stanovišsia vinavatym bokam. Naprykład, ciabie padazrajuć, što ty možaš niešta ździejśnić adnosna hetych akupantaŭ. Kali, naprykład, ty chodziš kala svajoj kvatery, moža pryjechać palicyja i ciabie vykinuć», — adznačaje Aleh.
Pa słovach mužčyny, užo bolš za hod jon nie moža viarnuć svaju kvateru, pry hetym praciahvaje vypłačvać ipateku na jaje. Kali jon pierastanie płacić, to kvatera piarojdzie va ŭłasnaść banka, i jon zhubić usie svaje hrošy, što vypłaciŭ.
Ciapier čytajuć
Biełarus nabyŭ kvateru ŭ Ispanii, ale jaje zaniali akupasy. Ciapier jon nie moža jaje viarnuć29
Kamientary