Biełarusy hadami nadurvali kitajcaŭ z kurynymi łapkami. Ale skončyłasia heta kiepska
U 2024 hodzie Biełaruś straciła dostup da kitajskaha rynku ptušynaj pradukcyi, jaki aceńvajecca ŭ miljardy dalaraŭ. Pryčynaj stała schiema reekspartu — kali zamiežnyja kurynyja łapki zavozilisia ŭ krainu, pierapakoŭvalisia pad vyhladam biełaruskich i pradavalisia ŭ Kitaj. Heta pryviało da vialikaha skandału i poŭnaj zabarony na impart z bolšaści biełaruskich ptuškafabryk. Pavodle padlikaŭ, Biełaruś stracić kala $140 miljonaŭ tolki za pieršy hod, vyśvietliŭ Biełaruski rasśledavalnicki centr.
U Kitai kurynyja łapki — sapraŭdny dalikates, jaki kaštuje daražej za miasa. Popyt tam nastolki vialiki, što kraina impartuje sotni miljonaŭ kiłahramaŭ z usiaho śvietu. Ale trapić na hety rynak składana: patrabavańni da jakaści vielmi strohija, a lubyja parušeńni karajucca sankcyjami.
Biełaruś atrymała šaniec dziakujučy dobrym adnosinam pamiž Łukašenkam i kitajskim kiraŭnictvam. Z 2018 hoda niekalki biełaruskich fabryk atrymali dazvoł na pastaŭki, i da 2023 hoda Biełaruś stała adnym z bujniejšych eksparcioraŭ kurynych łapak u Kitaj. Ale chutka vyśvietliłasia, što abjomy ekspartu pieravyšajuć realnyja mahčymaści biełaruskich ptuškafabryk. Heta značyć, što kraina masava pradavała čužuju pradukcyju pad svaim brendam.
Praz pasiarednickija kampanii zamiežnyja łapki (naprykład, z Turcyi) zavozilisia ŭ Biełaruś. Na ptuškafabrykach dla ich mianiali ŭpakoŭku i dakumienty, paśla čaho tavar išoŭ u Kitaj užo jak biełaruski.
U schiemie ŭdzielničali zamiežnyja firmy, jakija mieli biełaruski śled: siarod ułaśnikaŭ i kiraŭnikoŭ byli svajaki i byłyja supracoŭniki struktury, źviazanaj ź blizkim paplečnikam Łukašenki Viktaram Šejmanam. Prykryćcio zabiaśpiečvali dziaržaŭnyja fabryki, naprykład «Rasśviet».
Hrošy zarablalisia praz zanižeńnie cany pry prodažy ź Biełarusi i nastupny pieraprodaž u niekalki etapaŭ. U vyniku na kožnym kiłahramie «źnikała» bolš za $1 prybytku, jaki traplaŭ u kišeni ŭdzielnikaŭ schiemy. Pry vialikich abjomach heta byli dziasiatki miljonaŭ dołaraŭ, jakija abminali biełaruski biudžet.
Kali kitajski bok vyjaviŭ padman, to z 13 biełaruskich ptuškafabryk 11 stracili prava na pastaŭki. Heta aznačaje faktyčnaje zakryćcio dla Biełarusi adnaho z samych prybytkovych rynkaŭ. Pad sankcyi trapiła amal usia halina, i ciapier biełaruskija ptuškafabryki niasuć straty.
Dla Biełarusi heta nie pieršy vypadak takich schiem. U minułym kraina ŭžo traplałasia na padobnym — z «biełaruskimi» krevietkami, ananasami, jeŭrapiejskim palivam pad vyhladam inšych praduktaŭ. Ale ŭpieršyniu padman zakranuŭ nie Rasiju, a Kitaj — adnaho ź niešmatlikich stratehičnych partnioraŭ Biełarusi.
Niekalki nabližanych da Łukašenki asobaŭ zarabili na hetaj afiory dziasiatki miljonaŭ dołaraŭ, a kraina straciła šmatmiljardny rynak i sapsavała ŭ vačach kitajcaŭ svaju reputacyju. U vyniku dziaržaŭnyja pradpryjemstvy zastalisia biez prybytkaŭ, a schiema pieraŭtvaryłasia ŭ ekanamičnuju katastrofu dla ŭsioj haliny.
Kamientary