«Vajskovaj padaploki niama, da vajny nie rychtujem». U škołach raskazali pra navučańnie dziaciej kiravańniu dronami

Dzianis Dudkin z Upraŭleńnia vykarystańnia i raźvićcia bieśpiłotnych avijacyjnych kompleksaŭ Uzbrojenych siłaŭ Biełarusi ŭ intervju dziaržaŭnym miedyjam raskazaŭ, jak u našaj krainie rychtujuć apierataraŭ dronaŭ. Jon adznačaŭ, što sistema navučańnia naładžanaja pavodle cykłu: škoła — Vajskovaja akademija ci vajskovy fakultet — vojska.

U jakaści prykładu jon zhadaŭ śpiecyjalizavanyja kłasy ŭ Biarozie Bresckaj vobłaści i Minsku.

«Mienavita a školnaj party ŭ dziaciej naradžajecca luboŭ da avijacyi, u hetym vypadku — bieśpiłotnaj avijacyi. Dzieci chutčej schoplivajuć hetyja navyki. Jany pakazvajuć peŭnuju kreatyŭnaść. Časam dzieci padkazvajuć nam, jak možna vykarystać toj ci inšy latalny aparat», — pryznaŭsia padpałkoŭnik.

U škole №2 Biarozy dziaciej navučajuć kiravać dronami ŭ vajskova-patryjatyčnym kłubie «MIH», adkrytym jašče ŭ kastryčniku 2023 hoda.

«Naš kłub kuryruje naša avijacyjnaja baza 927-ja. Jany našyja šefy. My majem čym kiravać, z čym pracavać, bo ŭ nas jość inžynierna-techničny centr», — raskazali ŭ škole karespandentcy «Biełsata» jak pryvatnaj asobie.

U hetaj ustanovie vučni trenujucca jak na kampjutarnych simulatarach, tak i z sapraŭdnymi dronami, dzieci jeździać i da vajskoŭcaŭ na avijabazu i na pakazalnyja vystupy:

«Tam jany praz kolcy pralatajuć: sieŭ, uźniaŭsia, pralacieŭ, jak u cyrku. My zaŭsiody vystupajem na placoŭkach, dzie robaty i bieśpiłotniki, heta naša tema. U nas jość, kali nie pamylajusia, čatyry madeli, adzin hihancki bieśpiłotnik. Šefy abiacajuć nam novyja jašče».

Pavialičyć

Z novaha navučalnaha hoda ŭ dadatak da hetaha vajskova-patryjatyčnaha kłuba i kłasa robatatechniki ŭ biarozaŭskaj škole adkryjuć fakultatyŭ «Asnovy kiravańnia kvadrakoptaram», anansavany Ministerstvam adukacyi ŭ traŭni. Akramia taho, tam płanujuć adkryć jašče adzin vajskova-patryjatyčny kłub — dla małodšych kłasaŭ.

Surazmoŭca «Biełsata» paviedamiła taksama, što dziaciej u škole navučajuć nie tolki kiravać dronami, ale i źbirać hetyja aparaty. Pry hetym jana zapiarečyła, što padletkaŭ metanakiravana rychtujuć da słužby ŭ vojsku abo da vajny:

«Vy žartujecie? U nas tut inžynierna-techničny kirunak. I ŭsio dobraachvotna. Kali pastupać na vajskoŭca, to voźmiecie charaktarystyku, u plus budzie. Ale heta nie abaviazkova. Anijakaj vajskovaj padaploki tut niama. I ideałohija — biez fanatyzmu».

U minskaj škole №64 navučańnie kiravańniu bieśpiłotnikami ładziać u vajskova-patryjatyčnym kłubie «Siryus», što adkryli ŭ śniežni letaś. Tudy biaruć i treciakłaśnikaŭ, raskazali ŭ škole karespandentcy «Biełsata», jakaja źviarnułasia pa infarmacyju jak pryvatnaja asoba:

«Małyja dzieci navučajucca chutčej za starejšych. U nas jość asobny kabiniet sumiesna ź Ministerstvam abarony i Akademijaj avijacyi. Na kampjutarach jość simulatary, što pakazvajuć pracu drona. Plus akulary, plus sami drony. Voś chutka buduć spabornictvy ź pieraadolvańniem bieśpiłotnikami pieraškodaŭ».

Drony dla navučańnia jość i ŭ škole, ich padaryŭ zavod «Pielenh», časami dzieci jeździać u Akademiju avijacyi, zaniatki pravodziać kursanty. Biaruć u kłub nie ŭsich:

«Patrebien siaredni bał 7 i vyšej, u dziciaci musiać być vydatnyja pavodziny. To bok dzicia musić hodna, skažam tak, siabie pakazać».

Paśla navučańnia ŭ «Siryusie» školniki mohuć pajści nie tolki ŭ vajskovyja ŭstanovy, paviedamili ŭ škole:

«Dzieci, jakija byli vychavancami kłuba, sioleta atrymali metavaje nakiravańnie ad «Pielenha», jany pastupili ŭ BDUIR, jašče dzicia pastupiła na radyjofizičny fakultet BDU. Damovy ŭ nas padpisanyja nie tolki z Akademijaj avijacyi, ale i ź inšymi VNU».

Surazmoŭca «Biełsata» padkreśliła, što siłkom u kłub nikoha nie ciahnuć: «Nichto nikoha šerahami nie viadzie».

Pradstaŭnica škoły taksama zapeŭniła, što dziaciej nie rychtujuć da vajny. Maŭlaŭ, drony ž vykonvajuć nie tolki vajskovyja funkcyi:

«Na simulatarach niama niejkich bajavych dziejańniaŭ, elemientaŭ, što stralajuć. Dron nie pieraśleduje ludziej na simulatary. U pryncypie, drony ž vykarystoŭvajucca i ŭ mirnych metach: jany i doždž vyklikajuć, naprykład, u Jehipcie ci Dubai, jany kroŭ pieravoziać, vyvučajuć ziamlu, lasy ŭ niejkich niedastupnych miescach. Tamu nichto ni ŭ jakim razie nie kaža mienavita pra vajskovuju słužbu abo niejkija vajennyja dziejańni. Tut vyvučeńnie miascovaści, pasadka, naprykład, znajści kankretnuju kvietku na poli, drobny elemient na halincy».

• 1
• 0
• 0
• 0
• 0
• 0
• 0
• 0