Cichanoŭskaja: Pabačyć tych, chto znachodziŭsia ŭ inkamunikada — vielizarnaja palohka
Demakratyčnaja lidarka Śviatłana Cichanoŭskaja prakamientavała fotazdymki Viktara Babaryki, jaki byŭ u režymie inkamunikada amal dva hady.
«Ubačyć Viktara Babaryku, jak i Maryju Kaleśnikavu niekalki miesiacaŭ tamu, paśla stolkich miesiacaŭ inkamunikada — heta niejmaviernaje ščaście. Ale žachliva razumieć: režym vykarystoŭvaje ludziej, jakija nie pavinny byli apynucca za kratami, dla manipulacyjaŭ», — havoryć Cichanoŭskaja.
Jana kaža, što za dva hady nam daviałosia vyvučyć žudasnaje słova «inkamunikada».
«My adčuli, što takoje — całkam stracić suviaź ź blizkim čałaviekam za kratami i nie viedać: ci žyvy jon? Ci zdarovy? U jakim stanie znachodzicca? Praz adsutnaść luboj viestački ad rodnaha čałavieka ty nie možaš narmalna žyć: kali tak baluča na voli, strašna ŭjavić, što adčuvajuć jany tam, za kratami.
Kožny dzień u źniavoleńni — heta strata cełaha žyćcia, jakoje adbyvajecca na voli. Moj muž nie bačyć, jakimi darosłymi ŭžo stali Karniej i Ahnija. Syny Paliny Šarendy-Panasiuk rastuć bieź ciapłyni matulinaj lubovi. Ihar Łosik užo 4,5 hady nie bačyć dačku Paŭlinu… Žyćcio spyniajecca ŭ cełych siemjach, bo režym achviaruje ludźmi dziela ŭłady.
Pabačyć tych, chto znachodziŭsia ŭ inkamunikada — vielizarnaja palohka. Ale razam z hetym my nie možam zabyvać: za kratami niespraviadliva zastajucca bolš za 1200 palitviaźniaŭ.
Spynieńnie režymu inkamunikada — heta pieršy krok da taho, kab spynić toj žach, jaki ciapier adbyvajecca ŭ krainie. A nastupnym pavinna być vyzvaleńnie tych, chto apynuŭsia za kratami z-za svaich pohladaŭ. I spynieńnie ŭsich palityčnych represijaŭ suprać biełarusaŭ», — zaznačyła Śviatłana Cichanoŭskaja.
Ciapier čytajuć
Što viadoma pra viciebčuka, jakoha vinavaciać u sprobie padryvu samalota ŭ Hiermanii7
Kamientary