Pieršaja vice-mer Minska Nadzieja Łazarevič prajšła praz zatrymańnie, muž zastaŭsia ŭ SIZA

Znajomyja z Nadziejaj Łazarevič kažuć, što ŭ joj možna było b ubačyć taki pravasłaŭny varyjant Marharet Tetčar (Łazarevič vielmi vieruje i navat svaju dačku addavała ŭ škołu pry Śviata-Jelizaviecinskim manastyry) — valavuju žančynu z mocnymi pryrodnymi danymi i ćviordym razumieńniem, što los niasie jaje navierch, a asiarodździe — słuchajecca.

Ciapier Łazarevič 44 hady. Jana zrabiła imklivuju karjeru, u rannija hady — u 27 — staŭšy načalnicaj finansavaha ŭpraŭleńnia na Biełaruskim telebačańni. Potym była słužba ŭ «Salea» Alaksandra Šakucina, narešcie — kabiniet hienieralnaha dyrektara «Babrujskahramaša».

A heta vializnaje pradpryjemstva. Ad jaho vypracoŭki zaležyć u tym liku, kolki hrošaj zarobiać kašalki synoŭ Alaksandra Łukašenki: pradukcyja hetaha zavoda, jak i BiełAZa, u Rasii realizujecca praz kampaniju «B-24», jakaja pakidaje sabie bolšuju častku prybytku. 

Padrabiaznaści taho, jak ustrojena nažyva na eksparcie dziaržpradpryjemstvaŭ čytajcie tut: «My adna siamja». Dylery BiełAZa, źviazanyja z synami Łukašenki, zarablajuć, jak sam BiełAZ

U 2020-m Łazarevič stała ahitatarkaj za Łukašenku na Mahiloŭščynie, jahonaj davieranaj asobaj. Toj lubić žančyn. Ličyć, što jany nie zdolnyja adabrać uładu. 

U miesiac pačatku vajny Łazarevič padniali ŭ stalicu, u namieśnicy mera Minska, a praz hod i ŭ pieršyja namieśnicy. Na hrudzi paviesili miedal «Za pracoŭnyja zasłuhi». 

Pavialičyć

Taksama jana stała namieśnicaj staršyni Biełaruskaha sajuza žančyn, takim čynam, atrymaŭšy biespasiaredni dostup da Natalli Kačanavaj i Natalli Ejsmant. 

Usio išło pa-sapraŭdnamu dobra i, možna było padumać, tak i praciahniecca. 

«Ale ŭžo paru miesiacaŭ Łazarevič inšaja. Stała jak pabity sabaka, padcisnuła chvost», — apisvaje raptoŭnyja pieramieny ŭ natury naš surazmoŭca.

Jon ža tłumačyć, što najbolš imaviernaja pryčyna mietamarfozy ŭ tym, što siamja Łazarevič u hetyja miesiacy prachodzić cieraz toje ž samaje vyprabavańnie, što i dziasiatki tysiač inšych biełaruskich siemjaŭ — ludzi ŭ pahonach zabrali ŭ namienkłaturnaj zorki muža, pakinuli biez baćki 13-hadovuju dačku.

Pavialičyć

A sama čynoŭnica nie tolki nie zdoleła dapamahčy, ale i vymušana trymać dobruju minu, zasiadać u kamisijach z mučycielami svajho kachanaha, nachvalvać sistemu, jakoj słužyć, i spadziavacca, što, moža, paśla suda jaho pamiłujuć. 

Muža Nadziei Łazarevič zvać Aleh Sachno. Jon na čatyry hady maładziejšy za žonku. Para razam z 2007 hoda, vychoŭvajuć dačku.

Infarmacyju ab tym, što muž Nadziei Łazarevič aryštavany i znachodzicca ŭ SIZA, «Naša Niva» spraŭdziła ŭ niekalkich jahonych byłych kaleh.

Pavialičyć

Ale my nie viedajem dakładnaha artykuła abvinavačvańnia. Pa bijahrafii Aleha Sachno možna vykazać zdahadku, što abvinavačvańnie źviazanaje z karupcyjaj. 

U mai 2023 jon byŭ pryznačany načalnikam bujnoha dziaržaŭnaha chołdynha «Biełfarmpram», jaki ŭklučaje ŭ siabie vosiem farmaceŭtyčnych pradpryjemstvaŭ. Dla Łukašenki farmaceŭtyka — stratehičnaja halina, jakaja pavinna nie tolki zamianić zamiežnyja leki ajčynnymi anałahami, ale ŭ ideale jašče i pradavać hetyja anałahi za miažu, prynosiačy valutu ŭ krainu.

Ale na vysokaj pasadzie Sachno prytrymaŭsia tolki hod.

Užo 12 červienia 2024 hoda kalektyvu pradstavili novaha hienieralnaha dyrektara Ihara Mitrafanava razam z namieśnikam. A fota Sachno i jahonych namieśnikaŭ z sajta źnikli. 19 červienia 2024 hoda — apošni dzień, kali Aleh Sachno byŭ u anłajnie. 

Pra svajho muža ŭ intervju Łazarevič adhukajecca vyklučna ciopła. 

«Aleh — mudry muž. Jon dazvalaje mnie adčuvać, što ja hałoŭnaja», — raskazvała jana. 

Praź miesiac paśla zatrymańnia muža jana davała vialikaje intervju STB, dzie pra jaho nie skazała ni słova, ale ŭ kancy, u «recepcie svajho žyćcia», vydała: «Pracavać na 200%. Kachać na 200%. Samaje hałoŭnaje — heta kachańnie i viera».

Pavialičyć

U hetaj historyi jość i jašče adzin niuans. Pa słovach surazmoŭcaŭ «Našaj Nivy», hetym letam kašmaryli i samu Nadzieju Łazarevič: doma pravodzili vobšuk, a jaje, jak ciapier kažuć, «nienadoŭha zabirali».

Kolki času jana praviała ŭ izalatary, nieviadoma, ale viadoma, što z pracy jaje nie zvolnili, a značyć — abvinavačvańnie nie vystavili.

Tady łahična budzie vykazać zdahadku, što Łazarevič, kali i sapraŭdy praviała ŭ zaścienkach čas, to nie bolš za try dni. Ci byli źviazany pytańni da jaje ź minułymi miescami pracy, abo aryšt vynikaŭ z pryhodaŭ muža — nieviadoma. 

Pavialičyć

«Dziakuju baćkam, a vučusia ŭ Alaksandra Ryhoraviča. […] Zajmaju jasnuju ideałahičnuju pazicyju i nie bajusia iści ŭ boj za našaha prezidenta», — Łazarevič moža ŭ roznych vyrazach chvalić čałavieka, biez sankcyi jakoha niemahčyma pravieści vobšuk ci aryštavać čałavieka ź jahonaha kadravaha reziervu. 

Pavialičyć

Dyk što heta takoje było: žorstkaja pravierka vyskački na łajalnaść — jak budzie dziejničać, ci nie adračecca? — abo rasčaravańnie i źbićcio na ŭźlocie? Daviedajemsia, kali historyja skončycca.

• 4
• 1
• 36
• 8
• 3
• 2
• 1
• 0