«Nie padymajcie hałavy, bo iduć represii. Staić zadača vyniščyć 10% aktyŭnaj častki nacyi» — Paźniak
Z nahody pačatku paŭstańnia Kastusia Kalinoŭskaha suprać rasijskich uładaŭ, jakoje paciarpieła paražeńnie, lidar ruchu «Volnaja Biełaruś» Zianon Paźniak vykazaŭ svajo bačańnie pierśpiektyŭ raźvićcia padziej u sučasnaj Biełarusi.
U intervju Radyjo Svaboda, zhadvajučy paŭstańnie Kastusia Kalinoŭskaha, Paźniak adznačyŭ, što jano mocnaje nie svaimi vynikami, a idejaj. «Kastuś pakazaŭ, što z Rasijaj treba zmahacca siłaj. I potym uvieś čas zmahalisia siłaj».
Zianon Paźniak padkreślivaje, što hałoŭnaja siła budučych pieramien — unutry Biełarusi. Zadača nacyjanalnych sił — rabić usio dla taho, kab hety duch tam macavaŭsia. Ale jak heta rabić u siońniašnich umovach?
«My byli maładymi, studentami ŭ 60-ja hady. My čytali biełaruskija knižki, Bahdanoviča, Kalinoŭskaha, rabili samvydat, pieradavali adzin adnamu. Nichto ničoha nie viedaŭ. Tamu baraćba mahčyma ŭ lubych umovach, navat u turemnaj kamiery. Usio mahčyma, kali jość meta, duch, razumieńnie, što treba rabić, i jość nadzieja», — adznačyŭ palityk.
Paźniak ličyć, što ciapier u paraŭnańni ź minułym, jość vialikija mahčymaści. «Jość internet, jość rozum u hałavie, umieńnie analizavać, razumieńnie taho, što takoje režym, Rasija. Ludzi bačać, robiać vyvady. Niachaj hety tarfiany pažar haryć. Treba nazapašvać peŭnyja srodki, jakija nieabchodny dla baraćby — materyjalnyja, duchoŭnyja, arhanizacyjnyja».
Paźniak ličyć, što «režymnaja situacyja ŭ Biełarusi niestabilnaja» i na niejkim etapie takaja palityka daść zboj. I tamu da hetaha treba rychtavacca.
A ciapier Paźniak raić «nie padymać hałavy», bo iduć represii. Ułady pastavili źniščyć usiu aktyŭnuju častku nacyi, jakaja ŭ vypadku Biełarusi, pa acenkach Paźniaka, składaje kala 10% nasielnictva.
«Heta pavinny razumieć u Biełarusi, tamu što tam žyvie narod. My žyviem u emihracyi, siarod druhoha hramadstva. My možam tolki im dapamahać. Usio vyrašajecca ŭ Biełarusi. I tam zjavicca sapraŭdny nacyjanalny lidar. <…> My pavinny spadziavacca tolki na siabie, na svaju zbrojnuju siłu. Nichto nam nie dapamoža akramia nas samich. Kali my budziem mocnyja, kali zajavim siłu, tady nam buduć pamahać»,
— ličyć Zianon Paźniak.
Čytajcie jašče:
Paźniak: Biełarusy ŭnutry krainy maŭčać i čakajuć zručnaha momantu, kab paŭstać
U navahodnim vinšavańni Paźniak źviarnuŭsia da prychilnikaŭ Łukašenki i čynoŭnikaŭ
«Admoŭnyja piersanažy havorać pa-rasiejsku». Zianon Paźniak prezientavaŭ zbornik pjes
Kamientary