U Minsku na premjeru filma z fejkami pra Buču pryjšła tolki Bondarava ź siabroŭkami
Volha Bondarava apublikavała dopis pra toje, jak schadziła na premjeru rasijskaha prapahandysckaha filma «Śviedka» ŭ minski kinateatr «Mir». Akramia jaje ŭ vialikaj zale było ŭsiaho try čałavieki, jakija, jak jana sama adznačyła, «adno adnaho cudoŭna viedajuć».
Na prykładzienym fotazdymku infakazačka paziruje na fonie pustoj zały razam z mastačkaj Śviatłanaj Žyhimont, jašče adnoj paplečnicaj-prapahandystkaj. Chutčej za ŭsio astatnija prysutnyja naležali da taho ž łahiera.
«Jaki maleńki Minsk. Jakaja «ačmuralnaja» rekłama filma, jaki treba pakazvać usim!» — aburajecca infakazačka.
Raniej inšaja prapahandystka Ksienija Lebiedzieva pisała, što jaje padpisčyki skardzilisia, što kupili kvitki na film u «3D Kino» ŭ handlovym centry «Zamak», ale praz paru hadzin im patelefanavali i skazali, što film źniaty z šyrokaha prakatu.
Sapraŭdy, siońnia tvor rasijskaj prapahandy možna pahladzieć tolki ŭ troch kinateatrach Biełarusi — u Minsku, Homieli i Tałačynie. U Breście i Baranavičach paśla pary pakazaŭ, vidać, takich ža pustych, jaho źniali z prakatu. I tolki ŭ tałačynskim «Kołasie» jaho kruciać štodzień uviečary, byccam halivudski błokbastar, jaki musić prynieści kinateatru kasu. Jak pakazvaje dośvied 2-miljonnaha Minska — heta marnyja spadzievy.
Na nastupnyja dni na hety film, kali vieryć anłajn-siervisam pa prodažy kvitkoŭ, nie kuplena anivodnaha miesca. Tolki na 27 žniŭnia kupleny try miescy.
Situacyja ŭ Biełarusi nie ŭnikalnaja, film «Śviedka» pravaliŭsia navat u rasijskim prakacie. Za pieršyja dni prakatu karcina, jakuju źniali na hrošy Ministerstva kultury RF, zarabiła krychu bolš za 8 młn rasijskich rubloŭ pry biudžecie 200 młn rubloŭ ($84 tysiačy i $2,1 młn pa ciapierašnim kursie adpaviedna). Miarkujučy sa statystyki, u Rasii taksama adzin sieans «Śviedki» naviedvała ŭ siarednim čatyry čałavieki.
Film «Śviedka» pakazvaje situacyju va Ukrainie z punkta hledžańnia rasijskaj prapahandy i raspaviadaje pra «ŭkranacystaŭ». Pieršapačatkova karcina musiła nazyvacca «Muzykant», ale jaje pierajmienavali paśla miaciažu vahnieraŭcaŭ, jakich časta nazyvajuć «muzykantami». Pavodle siužeta filma, ukrainskija vajskoŭcy hvałciać spadarožnicu hałoŭnaha hieroja, a jaho samoha prymušajuć ihrać «himn luftvafe».
Prapahandyst Armien Hasparan tłumačyŭ takija vyniki tym, što ŭ kinateatrach štučna ŭrazajuć aŭdytoryju filma, staviačy jaho sieans na poźni viečar. Praŭda, u Biełarusi jon idzie ŭdzień abo ŭviečary, ale i heta nie pryvodzić tudy hledačoŭ. Bondarava taksama paličyła, što pravał karciny abumoŭleny nie jaje nizkim mastackim uzroŭniem i aburalnaj chłuśnioj pra vajnu va Ukrainie, a dziejańniami adkaznych asob:
«Dziakuj, novy dyrektar «Kinavideaprakatu»! Dobra choć na afišach jaho jašče možna znajści. Kali śpiacom šukać».
Kamientatary prarasijskaj błohierki taksama aburylisia, što ni Azaronak, ni Hładkaja, ni Lebiedzieva nie rekłamavali filma, jak heta rabiła Bondarava, a Špakoŭski ź Dziermantam uvohule addali pieravahu niejkamu Skifskamu festu.
«Naša Niva» — bastyjon biełaruščyny
PADTRYMAĆ
Kamientary