Błohiera-miljońnika Dzim Dzimyča, jakoha abvinavacili ŭ prapahandzie ŁHBT, prymusili apraŭdvacca na strymie ŭ Azaronka
Biełaruski błohier Dzim Dzimyč vielmi papularny ŭ moładzi — u jaho 4,5 miljona padpisčykaŭ u jutubie. Niadaŭna jon źniaŭsia ŭ rekłamie školnych tavaraŭ dla «Jeŭraopta». Ale za luboŭ da ružovaha adzieńnia trapiŭ u niałasku da prapahandy: Bondarava i Azaronak abvinavacili jaho ŭ prapahandzie ŁHBT. Rekłamu ź Dzim Dzimyčam u vyniku źniali z sajta «Jeŭraopta», a jaho samoha adpravili ŭ efir da Azaronka. Prapahandystu na tym strymie ad kamientataraŭ taksama dastałasia.
Błohier vyhladaŭ mocna zasmučanym uvieś čas, było adčuvańnie, što jon napužany.
Prapahandyst Ryhor Azaronak pytaŭsia ŭ jaho pra Łukašenku, tradycyjnyja kaštoŭnaści, armiju, vykazvaŭ pretenzii da tvorčaści. Siarod inšaha spytaŭ, ci abmiarkoŭvaje Dzim Dzimyč (Dźmitryj Siŭčyk) u svaich rolikach pytańni pracaŭładkavańnia.
«Raju šukać siabie, znachodzić lubimuju spravu», — adkazaŭ toj.
Sam błohier vučyŭsia na inžyniera-budaŭnika ŭ BNTU, ale nie skončyŭ. Adčuŭ, što jahonaje pryzvańnie — być artystam.
Dzim Dzimyč skazaŭ, što hałasavaŭ na vybarach za Łukašenku. Svoj trek «Antoška» (pierapieŭka pieśni pra Antošku, jaki idzie kapać bulbu) nazvaŭ pieśniaj pra nacyjanalny pradukt. I pahadziŭsia rekłamavać cukierki z presavanaha suchoha małaka ad Łukašenki.
Błohier patłumačyŭ taksama, što hatovy byŭ pajści ŭ armiju, ale na miedkamisii jaho pryznali niepryhodnym.
Azaronak prymusiŭ chłopca apraŭdvacca za roliki ŭ sukienkach. Toj patłumačyŭ, što heta prosta trend u tyktoku, jon rabiŭ heta, kab paviesialić aŭdytoryju, i nie zajmaŭsia prapahandaj ŁHBT.
Niechta z kamientataraŭ prysaromiŭ Azaronka: čaho jon «cackajecca» z błohieram, «nie tamu Łukašenka padaravaŭ kuvałdu». Na heta Azaronak adreahavaŭ vielmi rezka: maŭlaŭ, varta pryznać, što dziaržaŭnyja miedyja nikoli nie nabiaruć takoj vialikaj aŭdytoryi, tamu treba vieści dyjałoh z papularnymi błohierami.
«Ihnaravańnie takoj aŭdytoryi pryviadzie tolki da padzieńnia krainy i nieadekvatnaha ŭsprymańnia rečaisnaści», — padsumavaŭ Azaronak.
Ciapier čytajuć
U Sule adznačyli Kupalle. Haściej było stolki, što na darohach utvarylisia zatory12
Kamientary