Viadomuju amierykanskuju śpiavačku abvinavacili ŭ seksualnych damahańniach

U sudovym pazovie jość abvinavačańni ŭ seksualnych, relihijnych i rasavych damahalnictvach, dyskryminacyi, napadzie, niezakonnym zatrymańni i fetšejminhu.

Pazoŭ padali byłyja ŭdzielnicy hrupy padtancoŭki śpiavački — Aryjana Devis, Krystał Uiljams i Nael Radryhies.

Sama śpiavačka pakul na abvinavačańni nijak nie adreahavała.

U sudovym pazovie, padadzienym u aŭtorak u Łos-Andželesie, utrymlivajucca abvinavačańni ŭ tym, što tancorki «byli vymušanyja tryvać seksualna źnievažalnyja pavodziny» i «pad ciskam byli vymušanyja ŭdzielničać u seksualizavanych šou» z 2021 pa 2023 hod.

Siarod pretenzij da Lizo, sapraŭdnaje imia jakoj Mielisa Vivijan Džefiersan, — toje, što jana «prymušała Devis dakranucca da hrudziej» adnoj z vykanaŭcaŭ u načnym kłubie Amsterdama, i Devis urešcie pahadziłasia, «bajučysia, što admova moža paškodzić jaje budučyni ŭ kamandzie».

Lizo (viadomaja ŭ tym liku i trapiatkim staŭleńniem da siabie i svajho cieła) razam z chareohrafam Tanišaj Skot abvinavačvajucca ŭ tym, što padčas hastrolaŭ krytykavała Devis za jaje vahu.

Devis śćviardžaje, što jaje pytalisia, ci nie pakutuje jana ad jakich-niebudź prablem, tłumačačy svaju cikavaść tym, što jana, imavierna, pracuje nie z poŭnaj addačaj. I choć pytańni nie byli zadadzienyja adkryta, u jaje skłałasia ŭražańnie, što joj treba rastłumačyć, čamu jana nabrała vahu, i raskryć padrabiaznaści svajho intymnaha žyćcia, kab paźbiehnuć zvalnieńnia.

U pazovie taksama śćviardžajecca, što kiraŭnica kamandy padtancoŭki Šyrlin Kuihli naviazvała vykanaŭcam svaje chryścijanskija pierakanańni i haniła tych, chto zajmaŭsia seksam da šlubu.

Pazoŭniki taksama abvinavačvajuć Kuihli ŭ tym, što taja adkryta abmiarkoŭvała cnatlivaść adnoj z byłych tancorak i pisała pra heta ŭ sacyjalnych sietkach.

U adras kiraŭnictva pradziusarskaj kampanii Big Grrrl Big Touring, Inc. vystaŭleny abvinavačańni ŭ rasavaj dyskryminacyi. Pazoŭniki śćviardžajuć, što da čarnaskurych členaŭ tancavalnaj trupy «adnosilisia inakš», čym da inšych členaŭ kamandy, abvinavačvajučy ich u tym, što jany «hultajavatyja, nieprafiesijnyja, i ŭ tym, što jany drenna staviacca da pracy».

Pazoŭniki taksama śćviardžajuć, što Lizo i jaje pradziusarskaja kampanija nie vypłacili im naležny zarobak padčas častki jeŭrapiejskaha turne śpiavački.

U pazovie śćviardžajecca, što padčas jeŭrapiejskich hastrolaŭ pazoŭnikam było prapanavana tolki 25% štotydniovych kamandzirovačnych za dni, kali jany nie vystupali, zamiest zvyčajnych 50% i było zabaroniena pracavać nad inšymi prajektami padčas turu.

Devis i Uiljams byli zvolnienyja z tancavalnaj trupy, a Radryhies paźniej zvolniłasia sama, bo była niezadavolenaja abychodžańniem z kalehami.

• 6
• 0
• 15
• 9
• 3
• 3
• 6
• 0