AAC pačaŭ pazbaŭlać «ekstremisckija» ŚMI damiennaha imia ŭ Biełarusi — BAŽ
Zmahańnie ź niezaležnymi ŚMI ŭ Biełarusi vychodzić na novy etap, piša na svaim sajcie Biełaruskaja asacyjacyja žurnalistaŭ.
Biełaruskaj asacyjacyi žurnalistaŭ stała viadoma pra niadaŭniuju inicyjatyvu Apieratyŭna-analityčnaha centra pry Łukašenku, kab anulavać zapis ab rehistracyi damiennaha imia adnaho z papularnych vydańniaŭ na padstavie nibyta «niaprojdzienaj pravierki» danych jaho ŭładalnikaŭ.
Nazvu resursa BAŽ nie nazyvaje, ale padkreślivaje, što jon «prajšoŭ uvieś pakručasty šlach u źbirańni «rehalij» z boku dziejnaha režymu — ad błakavańnia sajta da pryznańnia «ekstremisckim farmiravańniem».
Sutnaść pretenzij utrymlivaje list z paznakaj «anulavańnie zapisu ab rehistracyi», pradublavany ŭładalniku damiennaha imia i rehistrataru ŭ asobie TAA «Nadziejnyja prahramy». Namieśnik načalnika kantrolnaj ustanovy Siarhiej Žarnasiek u hetym liście faktyčna kanstatuje kułuarnaje rašeńnie ab pazbaŭleńni prava na internet-staronku praz asabistyja padazreńni.
«Na padstavie lista AAC praz elektronnuju poštu ŭładalnika damiennaha imia byli zapatrabavanyja dakumienty ab paćviardžeńni šlacham asabistaha naviedvańnia ofisa rehistratara dakładnaści źviestak, uniesienych u bazu, uklučna ź dziaržaŭnaj rehistracyjaj, miescam znachodžańnia (paštovy adras), a taksama źviestak pra kiraŭnika. Pry hetym rastłumačana, što adsutnaść zapytanaj infarmacyi budzie parušeńniem patrabavańniaŭ instrukcyi ab rehistracyi ŭ nacyjanalnaj damiennaj zonie.
U suviazi ź niepadačaj źviestak u vyznačany termin TAA «Nadziejnyja prahramy» prainfarmavała administratara ab parušeńni patrabavańniaŭ punkta 27 instrukcyi i zapatrabavała likvidacyi parušeńnia. U nazvany termin dakumienty, jakija paćviardžajuć dakładnaść źviestak, tak i nie byli padadzienyja», — adznačajecca ŭ dakumiencie.
Redakcyi internet-vydańnia i «Nadziejnym prahramam» AAC dasłaŭ list z prośbaj paćvierdzić źviestki arhanizacyi ŭ asabistym kabiniecie chostara.
Što ŭ ich «niapravilna», nie paznačana, i heta źjaŭlajecca jurydyčnym parušeńniem. Ale pry hetym było zapatrabavana padać źviestki asabista, što taksama nie praduhledžvajecca nijakimi normami.
U svaju čarhu, u ofisie «Nadziejnych prahram» adreahavali na patrabavańnie AAC i śledam dasłali list z punktami instrukcyi ab nieabchodnaści paznačeńnia dakładnych źviestak, a taksama raskazali pra nastupstvy ŭ vypadku ihnaravańnia.
Nie zvažajučy na narmatyŭnyja niestykoŭki, na padstavie vykładzienaha ŭ liście i na padstavie punkta 54 unutranaj instrukcyi Apieratyŭna-analityčny centr pryniaŭ rašeńnie, navat biez zvarotu da pasłuh suda:
— anulavać zapis ab rehistracyi damiennaha imia;
— zabiaśpiečyć arhanizacyjna-techničnyja miery dla vykanańnia rašeńnia.
Kiraŭnictva redakcyi sprabavała zmahacca, źviartajučy ŭvahi na roznyja niestykoŭki, padavała skarhu na imia načalnika Apieratyŭna-analityčnaha centra Andreja Paŭličenki. Ale ŭ sučasnaj Biełarusi heta zusim nie pracuje.
Jak kanstatuje BAŽ, zhadany kiejs musić pakazać, jakija novyja techničnyja instrumienty ŭ zmahańni ź inšadumstvam užo hatovy masava zadziejničać režym Łukašenki.
Kamientary