Śviet staić na parozie raspaŭsiudžvańnia 6G-suviazi. Što jana pryniasie?

Pa-pieršaje, varta supakoić usich prychilnikaŭ teoryj zmoŭ, jakija jašče nie da kanca adyšli ad ujaŭnaha praniknieńnia vysokačastotnych 5G-chvalaŭ praź ich kletkavyja miembrany. Kanśpirołaham, jakim ciažka supraćstajać kantrolu nad ich śviadomaściu praz vyški 5G, pakul usio ž rana panikavać: 6G nie źjavicca ŭ najbližejšy čas.

Zhodna z prahnozami, šyrokaje raspaŭsiudžvańnie novaha pakaleńnia suviazi adbudziecca nie raniej za 2030 hod, choć, jak śćviardžaje TechCrunch, bolšaja častka ciažkaj pracy ŭžo zroblenaja, i sietki, zdajecca, padrychtavanyja i hatovyja da novaha śvietu.

Na dyskusii ŭ ramkach Mobile World Congress udzielničali pradstaŭniki niamieckaj Thinknet 6G, Samsung Research UK, Jeŭrapiejskaha kaśmičnaha ahienctva i Telefónica Research. Śpiecyjalisty abmiarkoŭvali pierśpiektyvy značnaha źnižeńnia spažyvańnia enierhii pry pierachodzie na 6G, lepšuju kibierbiaśpieku, a taksama prymianieńnie novaha standartu suviazi ŭ bolš šyrokim śpiektry scenaryjaŭ, naprykład, z pryładami tak zvanaha «internetu rečaŭ».

Internet rečaŭ ujaŭlaje saboj sistemu ŭzajemaźviazanych ličbavych pryład (ci to miechaničnych i ličbavych mašyn, abjektaŭ, žyvioł abo ludziej), jakija zabiaśpiečvajucca ŭnikalnymi identyfikatarami (UID) i mahčymaściu pieradačy danych pa siecivie bieź nieabchodnaści ŭzajemadziejańnia «čałaviek-čałaviek» abo «čałaviek-kampjutar». Inšymi słovami «internet rečaŭ» złučaje fizičnyja abjekty ź virtualnym śvietam: razumnyja pryłady i mašyny akazvajucca źviazanymi pamiž saboj i z suśvietnym pavucińniem. Siarod inšaha, łunali takija ambicyjnyja frazy, jak «razumnyja harady», «hałahrafičnyja sustrečy» i «3D-mapinh».

6G taksama abiacaje bolšuju ŭstojlivaść sietak. Imavierna, bumam budzie virtualnaja adukacyja praz harnitury XR (pašyranaj realnaści), dziakujučy ašałamlalnaj prapusknoj zdolnaści 6G. Śpiecyjalisty spadziavajucca, što heta pasłužyć i sapraŭdnym šturškom na šlachu da metaŭ ustojlivaha (ekałahičnaha) raźvićcia, što asabliva aktualna dla niezamožnych krain z ekanomikaj, jakaja raźvivajecca.

Asabliva padkreślivałasia nadziejnaść budučaj sietki 6G z punktu hledžańnia spažyŭca: ciapier jość nadzieja, što kali vy zachodzicie ŭ lift, vaš sihnał užo nie budzie abryvacca, dziakujučy zdolnaści 6G pierachodzić ad «2D da 3D» i lepšaj łakalizacyi pryład.

Kantent, stvorany štučnym intelektam, stanie značna bolš dastupnym u sietkach 6G, u tym liku i «ličbavyja kopii» čaho ci kaho zaŭhodna. Tak, naprykład, studenty-miedyki zmohuć navučacca z dapamohaj hałahrafičnych pacyjentaŭ, ź jakimi jany zmohuć biaśpiečna rabić pamyłki stolki razoŭ, kolki im spatrebicca.

6G taksama abiacaje kancepcyju «abjadnanaha navučańnia z zachavańniem pryvatnaści» ci ppFL (ad anhlijskaha privacy-preserving federated learning), kali niekalki bakoŭ mohuć navučać adnu madel, nie abmieńvajučysia svaimi navučalnymi danymi. U vyniku, naprykład, moža być źmienšany patencyjał kibieratak na niejronnyja sietki.

Napeŭna, adnoj z najvialikšych łyžak dziohciu va ŭsioj idealistyčnaj karcinie źjaŭlajecca pytańnie pryvatnaści i kanfidencyjnaści. Tak «razumnaja markiroŭka» ŭ 6G-asiarodździ budzie aznačać, što luby vid pradukcyi možna budzie adsočvać — što ŭ svaju čarhu budzie aznačać faktyčnuju adsutnaść kanfidencyjnaści. Tamu, nakolki cudoŭnym vyjavicca novy 6G-śviet, — pabačym nieŭzabavie.

• 30
• 0
• 4
• 4
• 8
• 2
• 6
• 0