ES abviaściŭ tendar na budaŭnictva siami hihafabryk štučnaha intelektu

Hihafabryki ŠI — heta vialikija vyličalnyja centry, abstalavanyja śpiecyjalizavanymi sučasnymi čypami. Jany buduć vykarystoŭvacca dla navučańnia najnoŭšych madelaŭ štučnaha intelektu, u tym liku vialikich moŭnych madelaŭ, zdolnych apracoŭvać tryljony adzinak danych.

Prajekt źjaŭlajecca častkaj stratehii ES pa dasiahnieńni technałahičnaha suvierenitetu. Jeŭropa imkniecca pamienšyć zaležnaść ad zamiežnych pastaŭščykoŭ vobłačnych servisaŭ, vyličalnaj infrastruktury i čypaŭ.

Płan stvareńnia jeŭrapiejskich hihafabryk upieršyniu pradstaviła staršynia Jeŭrakamisii Ursuła fon der Lajen na samicie AI Action u Paryžy ŭ lutym 2025 hoda. Inicyjatyva vyklikała vialikuju cikavaść: 76 kampanij papiarednie zajavili pra zacikaŭlenaść va ŭdziele.

Pieršapačatkova ES razhladaŭ budaŭnictva čatyroch abo piaci takich abjektaŭ, adnak paźniej kolkaść pavialičyli da siami. Heta źviazana jak ź vialikaj kolkaściu zajavak ad biznesu, tak i z žadańniem zabiaśpiečyć bolš raŭnamiernaje hieahrafičnaje raźmiaščeńnie vyličalnych mahutnaściaŭ.

Ahulny abjom inviestycyj aceńvajecca prykładna ŭ 30 miljardaŭ jeŭra. Kala 5 miljardaŭ pavinien vydzielić sam Jeŭrasajuz, jašče kala 5 miljardaŭ — krainy-ŭdzielnicy prajekta, a prykładna 20 miljardaŭ jeŭra pavinny zabiaśpiečyć pryvatnyja inviestary.

Pry hetym finansavy ŭdzieł ES istotna skaraciŭsia ŭ paraŭnańni ź pieršapačatkovymi płanami. Spačatku Jeŭrakamisija zajaŭlała pra hatoŭnaść nakiravać na prajekt da 20 miljardaŭ jeŭra, ale paźniej dziaržaŭnuju dolu skaracili prykładna da traciny ahulnych układańniaŭ.

Zakupačnaja pracedura budzie prachodzić u dźvie paśladoŭnyja fazy. Heta pavinna dazvolić pastupova naroščvać vyličalnyja mahutnaści na praciahu nastupnych šaści z pałovaj hadoŭ.

U ciapierašnim biudžecie ES moža harantavać tolki kala 1 miljarda jeŭra. Astatnija dziaržaŭnyja srodki čakajucca ŭ ramkach nastupnaj šmathadovaj finansavaj prahramy ES, jakaja pakul zastajecca pradmietam pieramoŭ pamiž krainami-členami.

Uzamien na dziaržaŭnyja inviestycyi ES i krainy-ŭdzielnicy atrymajuć adpaviednuju dolu dostupu da vyličalnych mahutnaściaŭ. Jany zmohuć vykarystoŭvać ich dla dziaržaŭnych prajektaŭ, navukovych daśledavańniaŭ i pracy łabaratoryj štučnaha intelektu.

Apieracyjnyja vydatki pavinny nieści pryvatnyja kampanii. U Jeŭrakamisii raźličvajuć, što hihafabryki buduć finansava ŭstojlivymi dziakujučy kamiercyjnym pasłuham, bo popyt na mahutnaści dla raspracoŭki ŠI ciapier značna pieravyšaje prapanovu.

Svaju zacikaŭlenaść u raźmiaščeńni hihafabryk užo vykazali dziesiać krain: Hiermanija, Italija, Francyja, Polšča, Čechija, Danija, Finlandyja, Hrecyja, Partuhalija i Ispanija. Udzielničać u konkursie zmohuć jak asobnyja dziaržavy, tak i mižnarodnyja kansorcyumy. Francyja ŭžo dała zrazumieć, što maje namier realizoŭvać ułasny prajekt samastojna.

Adnačasova prajekt sutyknuŭsia z krytykaj. Adna z prablem zaklučajecca ŭ tym, što stvareńnie jeŭrapiejskaj infrastruktury ŠI ŭsio adno budzie zaležać ad zamiežnych vytvorcaŭ śpiecyjalizavanych čypaŭ. Jeŭrakamisija ŭžo padpisała miemarandumy ab supracoŭnictvie z Nvidia, AMD i Qualcomm.

Umovy konkursu praduhledžvajuć taksama miery, jakija pavinny nie dapuścić praźmiernaj zaležnaści ad adnaho pastaŭščyka technałohij.

U Brusieli pryznajuć hetuju supiarečnaść: Jeŭropa choča raźvivać ułasnyja mahutnaści, ale nie moža čakać poŭnaha stvareńnia ŭłasnaj technałahičnaj bazy i pavinna raźvivać ŠI ŭžo ciapier.

Pavodle ciapierašniaha hrafika, pieramožcy tendaru pavinny pačać fizičnaje budaŭnictva hihafabryk u pačatku 2027 hoda. Zapusk pieršych abjektaŭ u ekspłuatacyju płanujecca na siaredzinu 2028 hoda.

• 4
• 0
• 0
• 0
• 0
• 0
• 0
• 0