Biełarus pieški idzie 3000 kiłamietraŭ z Varšavy da Ispanii — hatovy nočyć u lesie i mycca ŭ rečcy
Papularnaja historyja ŭ Jeŭropie — pravieści adpačynak na pałomnickaj ściežcy Kamina, što viadzie da ispanskaha horada Sanćjaha-de-Kampasteła. Bolšaść chadakoŭ ledź adolvajuć na joj 100‑200 km, ale viciabčuk Jaŭhien Hucałaŭ zładziŭ sabie maršrut prosta z Varšavy — adoleje bolš za try tysiačy kiłamietraŭ.
Jaŭhien raspačaŭ svoj šlach 25 lipienia. Detalami pachodu jon dzielicca ŭ tredsach.
«Nichto ŭ ćviarozym rozumie tak nie robić, a ja rablu. Siońnia ja startuju z Varšavy pieššu da Sanćjaha-de-Kampasteła.
Pakul usie abmiarkoŭvajuć maršruty pa Partuhalii na 200 km, ja vyrašyŭ łupanuć praź niekalki krain i tysiač kiłamietraŭ. Zakinuŭ zaplečnik na plečy, zašnuravaŭ boty i pajšoŭ».
Heta nie pieršaje vialikaje piešaje padarožža Jaŭhiena. U 2024‑m jon vyjšaŭ u šlach ź Vieny da Stambuła daŭžynioj 2500 km — tuju ściežku nazyvajuć šlacham sułtana Sulejmana. U 2019‑m Jaŭhien prabieh Biełaruś z poŭnačy na poŭdzień, što składaje 650 km. Ale ŭ 2021‑m biełaruskija siłaviki zaviali na mužčynu kryminałku za «źniavahu dziaržaŭnych simvałaŭ», i z taho času Hucałaŭ asvojvaje zamiežnyja maršruty.
U ciapierašniaj vandroŭcy jon prachodzić prykładna 35‑45 km štodzień i płanuje rabić pierapynki na sutki kožnyja 7‑-10 dzion, kab nie zdarožycca na ništo. Jaŭhien užo prajšoŭ polski horad Čanstachovu i, kali ničoha jamu nie pieraškodzić, dniami dojdzie da Urocłava.
U zaplečniku Jaŭhien nosić namiot i ŭsio astatniaje, što moža spatrebicca dla načlehu ŭ ekstremalnych umovach. Časam jamu traplajucca ludzi, hatovyja pakarmić ci dać prytułak.
Naprykład, u adzin ź viečaroŭ na maršrucie Jaŭhien vyrašyŭ raźbić namiot la kaścioła. Spačatku było ciažka zrazumieć, ci dazvolać jamu heta zrabić:
«Chaču raźbić namiot pobač z kaściołam, ale niama ksiandza na miescy. Pracuje kancylaryja, spytaŭ u pani — jana skazała, što takoha dazvołu nie moža dać. Maŭlaŭ, pačakaj paŭhadziny».
Ale viečar skončyŭsia dobra, bo śviatar vydzialiŭ Jaŭhienu pakoj, kab pieranočyć. A potym jašče i pryhatavaŭ jamu viačeru dy śniadanak. Darečy, pra ježu — jana ŭ Jaŭhiena byvaje roznaja: ad hrečki z cukram, pryhatavanaj la namiota, da kiebaba, jaki Jaŭhien pabačyŭ u śnie, a potym atrymaŭ na jaho hrošy ad padpisčykaŭ.
Jaŭhien niepieraborlivy. Paśla doŭhaha šlachu jon moža pastavić namiot u lesie i pamycca ŭ rečcy, a kali nad hałavoj jość dach altanki, to i ŭvohule cudoŭna.
Časam, adnak, umovy na maršrucie ledź nie ekstremalnyja. Navat letam nadvorje ŭskładniaje šlach — Jaŭhien traplaŭ i pad daždžy, i ŭ ekstremalnuju śpioku. Voś što jon kaža ŭ adnym ź videa:
«Siońnia +38. Iści vielmi składana, kryšačku ratuje mokry baf (šalik asablivaj formy — NN) na hałavie abo na šyi. I, viadoma, cień».
Nastupny dzień, adnak, akazaŭsia jašče bolš składanym:
«Źniaŭ hadzińnik i paviesiŭ na dreva — praz paru chvilin jon pakazaŭ +38°C, a na ruce pad soncam było ŭsie +46°C. Pierabiahaŭ ad cieniu da cieniu i hłytaŭ vadu litrami. Dumak u hałavie nul, mozh prosta adklučyŭsia.
Na adnym z prypynkaŭ uziaŭ ihołku i zašyŭ svaje krasoŭki. Jany prosiacca na śmietnik, ale nie, vy jašče papracujecie, rodnyja. Śpiakota zabiła navat elektroniku, hadzińnik stamiŭsia ličyć kiłamietry, zavis i prosta vyklučyŭsia. Navihatar zafiksavaŭ 36,57 km, ale ja dakładna viedaju, što svaje 40+ siońnia adtarabaniŭ».
U kamientarach Jaŭhiena zapytali, jakaja ŭ jaho matyvacyja. Mužčyna adkazaŭ koratka — maŭlaŭ, jamu prosta padabajecca vyvučać hety śviet.
Ale pa jaho pastach padajecca, što nie mienš jon spaznaje ŭ šlachu samoha siabie:
«Kamina — heta nie pra kamiercyjnyja tury i nie pra hučnyja cheštehi, heta hłybokaja adzinota i sustreča z saboj. Kali baču pasty pra arhanizavanyja pachody, razumieju, što sapraŭdny Šlach pačynajecca tam, dzie zastaješsia tolki ty, tvoj zaplečnik i tvaja cišynia. Heta prastora dla rozdumu, dzie kožny krok — heta krok da siabie».
Z 25 lipienia, kali pačałasia vandroŭka, biełarus prajšoŭ 416 km. Ciapier Jaŭhien na ściežcy, jakaja vyviedzie jaho da miažy z Hiermanijaj:
«Za hetyja dziesiać dzion było ŭsio — śpioka pad +40°C, nočy pad navalnicaj u altancy, zašytyja na kalenie krasoŭki i kiebaby ŭ snach. Ale hałoŭnaje, što nohi iduć, a tempieramient nie źnikaje. Pieršy vialiki adrezak projdzieny, napieradzie niamieckija darohi i toj samy šlach na Sanćjaha».
«Naša Niva» — bastyjon biełaruščyny
PADTRYMAĆ«Ludzi z Tajvania i Karei pytalisia, dzie znachodzicca Biełaruś». Aktyvistka prajšła sotni kiłamietraŭ pa Ispanii z raskazam pra palitviaźniaŭ
Biełaruskaja žurnalistka prajšła 140 kiłamietraŭ pa Ispanii i raskazała navošta
U Aŭstralii viarnuli knihu ŭ biblijateku praz 150 hadoŭ paśla taho, jak jaje adtul uziali
Ciapier čytajuć
Staruju kamianicu kala ratušy ŭ Mahilovie rychtavali dla haradskoha muzieja. Ciapier tam robiać ofis rasijskaha pasolstva na čale z byłym ministram «ŁNR»1414
Kamientary
Hłavnaja ciel tiepieŕ u vsiech odna: ZARABOTAŤ, osobienno jeśli viedieš błoh. Čtoby zarabotať na błohie,nužien orihinalnyj kontient, privlekajuŝij posietitielej,vot on jeho i hienierirujet čieriez orihinalnyje putiešiestvija. A vsie ostalnoje (izučať etot mir i siebia)-eto vtoričnoje