Brytanski ministr abarony: Rasija niasie vialikija straty, sprabujučy nastupać va Ukrainie
Rasijskaja armija niasie vielizarnyja straty va Ukrainie, nie demanstrujučy hatoŭnaści admovicca ad taktyki «miasarubki», i z usich sił sprabuje praciahvać nastup, jaki, kali i prasoŭvajecca, to «na mietry, a nie kiłamietry», zajaviŭ u piatnicu ministr abarony Brytanii Ben Uoles. Pra heta piša hazieta Financial Times, jakaja pačuła jaho mierkavańnie ŭ kułuarach Miunchienskaj kanfierencyi pa biaśpiecy.
Niahledziačy na aściarohi, što Rasija hatovaja pačać mahutnuju ataku ŭ pieršuju hadavinu ŭvarvańnia va Ukrainu, «niama nijakich śviedčańniaŭ vialikaha zasiarodžvańnia rasijskich sił», padobnaha tamu, jakoje było 24 lutaha minułaha hoda, miarkuje Uoles.
Na jaho dumku, samaje vialikaje, što Maskvie ŭdałosia da hetaha času, — heta sieryja probnych napadaŭ uzdoŭž linii frontu z udziełam mabilizavanych. Adnak hetyja apieracyi pryviali da vielmi vialikich strat, zajaviŭ ministr abarony Brytanii.
«Na siońniašni dzień niama nijakich śviedčańniaŭ značnaha, vialikaha rasijskaha nastupu, — cytuje Uolesa FT. — Toje, što my ŭbačyli, — heta prasoŭvańnie pa frantach, ale koštam tysiač žyćciaŭ».
Jon dadaŭ, što zachodnija sajuźniki Ukrainy «bolš čym kali-niebudź poŭnyja rašučaści» dapamahčy Ukrainie dać adpor rasijskim vojskam. Adnak papiaredziŭ, što da pastavak źniščalnikaŭ, na jakich nastojvaje Kijeŭ, jašče daloka.
Za apošnija 14 dzion kolkaść paćvierdžanych strat Rasii va Ukrainie ŭ piać razoŭ pieravysiła zvyčajnyja štotydniovyja ličby. Heta samy vialiki pryrost strat za ŭvieś čas ŭvarvańnia, što moža być śledstvam nastupleńnia, jakoje Rasija pačała ŭ Danbasie.
Bi-bi-si i «Miedyjazonie» ŭdałosia ŭstanavić Imiony 14709 rasijskich vajskoŭcaŭ, jakija zahinuli za hod vajny va Ukrainie. Havorka idzie tolki pra tyja danyja, jakija ŭdajecca znajści i pravieryć pa adkrytych krynicach, realnaja kolkaść strat moža być značna bolšaj.
Uoles acaniŭ kolkaść jak zabitych, tak i paranienych u 180 tysiač čałaviek.
Niahledziačy na hetyja straty, pa jaho dumku, niama prykmiet taho, što rasijskaja armija źmianiła svoj padychod. Ministr spasłaŭsia na paviedamleńni pra razhrom rasijskaj kałony pad Vuhladaram i skazaŭ, što mabilizavanych «šturchajuć u miasarubku». Pavodle jaho słoŭ, heta moža akazacca nieprymalnym «navat dla Rasii», pakolki ŭ hetych 180 tysiač čałaviek jość žonki, maci, siostry i siabry, i «niemahčyma schavać maštaby hetych strat ad naroda».
Ciapier čytajuć
Miljanier Varabiej atrymaŭ prava na zabudovu centra Minska — uzamien na darahuju kliniku dla Łukašenki6
Kamientary