Śviatar: Biełaruskuju Pravasłaŭnuju Carkvu pierafarmatavali całkam pad dyktatara
Śviatar Alaksandr Šramko ŭ hutarcy na kanale «Zvyčajnaha ranku» raspavioŭ, čamu katujuć ajca Uładzisłava Bahamolnikava, suprać jakoha raspačali kryminalnuju spravu, i čamu maŭčyć Carkva.
Śviatar Uładzisłaŭ Bahamolnikaŭ staŭ šyroka viadomy biełarusam tym, što adpiavaŭ zabitaha Ramana Bandarenku, a taksama trymaŭ haładoŭku salidarnaści z palitviaźniem Iharam Łosikam. Bahamolnikava 100 dzion katavali na Akreścina, a potym zaviali suprać jaho kryminalnuju spravu. Usio heta adbyvajecca pry maŭklivaj zhodzie BPC.
Alaksandr Šramko ličyć, što na katavańnie Bahamolnikava jość ukazańnie źvierchu.
«Heta znakavaja fihura. Heta moža navat niejkaje nastaŭleńnie dla śviataroŭ, usich carkoŭnych ludziej, kab jany viedali svajo miesca. Nievypadkova vybrali čałavieka ź niazłomnaj volaj, čałavieka pavažanaha», — havoryć Šramko.
Na pytańnie, čamu carkva nie reahuje na heta, śviatar adkazaŭ, što BPC užo stała častkaj dziaržaŭnaj sistemy.
«Z momantu, kali byŭ pastaŭleny mitrapalitam Vienijamin na čale Carkvy, Carkva straciła svaju subjektnaść. Jana stała prydatkam dziaržavy. Jana i raniej była ŭ simbijozie ź dziaržavaj, ale ŭsio ž taki zachoŭvała subjektnaść, rabiła niejkija kroki, nie ŭzhodnienyja z uładaju. Mitrapalit Pavieł malebny ładziŭ, chadziŭ u balnicu, naviedvaŭ źbitych ludziej [padčas pratestaŭ 2020 hoda].
Paśla taho, jak pierafarmatavali Biełaruskuju Pravasłaŭnuju Carkvu całkam pad dyktatara i byŭ pastaŭleny čałaviek «svoj» dla hetaha dyktatara, Carkva faktyčna stała padraździaleńniem dziaržavy.
I kali chtości ŭ hetym padraździaleńni dziaržavy pakazvaje svoj tvar, svaju niazhodu ź sistemaj, to heta rašeńnie našmat bolš [žorstkaje], čym kali b heta byŭ čałaviek nie ź sistemy», — havoryć śviatar.
Šramko pryvodzić u jakaści prykładu pieraśled siłavikoŭ, sudździaŭ, jakija vyjšli ź sistemy paśla pratestaŭ 2020 hoda i jakich «asabliva imknucca pakarać dziela navučańnia ŭsich astatnich».
Śviatar miarkuje, što tak ciapier razhladajuć i ajca Uładzisłava, što «jon zdradnik dla ich, zdradnik sistemy».
Kamientary