Praz try hady paśla adkryćcia navukoŭcy dabralisia da samaha vysokaha dreva Amazonii
Praz try hady paśla adkryćcia, zrabiŭšy pierad tym čatyry niaŭdałyja ekśpiedycyi, navukoŭcy narešcie dabralisia da samaha vysokaha dreva Amazonii. Im daviałosia dva tydni prabiracca praz hustyja džunhli pa harystaj miascovaści, piša ABC News.
Samaje vysokaje dreva Amazonii znachodzicca ŭ zapaviedniku raki Iratapuru na poŭnačy Brazilii. Vyšynia raśliny — 88,5 mietra, a dyjamietr — amal dziesiać mietraŭ. Jana adnosicca da vidu Dinizia excelsa. Z-za čyrvona-buraha adcieńnia draŭniny jaho nazyvajuć «čyrvony anioł».
Navukoŭcy vyjavili dreva ŭ 2019 hodzie padčas analizu pakazčykaŭ lidára na borcie samalota, jaki ablataŭ džunhli. Praktyčna adrazu ž da Dinizia excelsa adpravili pieršuju ekśpiedycyju. Ale ŭ kamandy ekołahaŭ, hidaŭ i navukoŭcaŭ nie chapiła siłaŭ i zapasaŭ charčavańnia — praź dziesiać dzion hrupa viarnułasia nazad.
Jašče trom ekśpiedycyjam udałosia dabracca da inšych hihanckich dreŭ, siarod jakich samy vysoki brazilski arech Amazonii vyšynioj 66 mietraŭ. A voś Dinizia excelsa zmahli znajści tolki ŭ vieraśni 2022 hoda ŭ chodzie piataj ekśpiedycyi.
Kamanda z 19 čałaviek prajšła 250 kiłamietraŭ na łodcy pa račnych parohach, zatym 20 kiłamietraŭ pieššu pa hornych džunhlach. Daśledčyki sabrali kala dreva liście, hlebu i inšyja ŭzory. Jany dapamohuć vyznačyć uzrost hihanckaj raśliny. Papiarednie joj 400-600 hadoŭ.
Samym vysokim drevam u śviecie ličycca siekvoja viečnazialonaja pa mianušcy Hipieryjon, jakaja raście ŭ nacparku Redvud na poŭnačy Kalifornii. Jaje vyšynia — kala 116 mietraŭ.
Tamara Vińnikava pradała svoj łondanski dom, zaviešany karcinami samoj siabie ŠMAT FOTA23
Kamientary
bo niamožna bieź śloz hladzieć, što kałanizatary-cyvilizatary rabili niekali ź siekvojaj