Pa zakonie možna, a pa fakcie — nie. Čamu ŭ Biełaruś niemahčyma ŭvieźci elektramabil biez spłaty myta?
Saviet Jeŭrazijskaj ekanamičnaj kamisii jašče ŭ sakaviku apublikavaŭ rašeńnie abnulić mytnuju pošlinu na ŭvoz elektramabilaŭ da 2024 hoda. Praź dziesiać dzion norma musiła nabyć siłu, ale pryvieźci elektramabil, nie spłaciŭšy myta, niemahčyma dahetul. «Naša Niva» raskazvaje, u čym pryčyna.
Pošliny abnulajuć nie ŭ pieršy raz
Papiaredni raz Saviet JEEK abnulaŭ pošliny na elektramabili z 4 maja 2020 hoda pa 31 śniežnia 2021 hoda. Na praciahu hetaha pieryjadu ŭ žadajučych nie ŭźnikała nijakich pieraškod, kab skarystacca takoj mahčymaściu.
Z nastupleńniem 2022 hoda pošlina viarnułasia. Ad 1 studzienia pry ŭvozie elektramabilaŭ u krainu treba apłočvać 15% pošliny.
Adnak u siaredzinie krasavika ŭ ŚMI (u tym liku dziaržaŭnych) pačała źjaŭlacca infarmacyja pra toje, što nieŭzabavie biełarusy znoŭ zmohuć pryvozić elektramabili z trecich krain biez spłaty myta.
Rašeńnie Savieta JEEK № 39, pryniataje 17 sakavika, praduhležvała admienu pošliny na ŭvoz elektramabilaŭ. Adnak u adroźnieńnie ad papiaredniaha dakumienta ŭ im majecca niekalki raniej nieviadomych vyklučeńniaŭ i patrabavańniaŭ.
Usim možna, a rasijanam — nie
Dakumient praduhledžvaje, što ad vypłaty pošliny vyzvalać tolki hramadzian Biełarusi, Armienii, Kazachstana i Kirhizii. To-bok, rasijanie pad źmieny nie padpadajuć. Aproč hetaha, nie dapuskajecca pieradača pravoŭ vałodańnia, karystańnia i rasparadžeńnia elektramabilami asobam, jakija majuć hramadzianstva i / abo pastajanna žyvuć u Rasii. Abmiežavańni dziejničajuć da momantu spłaty pošlin, ale nie bolš za try hady ad daty rehistracyi pasažyrskaj dekłaracyi.
Jašče adnym važnym momantam, jakoha nie było raniej, źjaŭlajecca patrabavańnie pieradać u mytny orhan adpaviednaj dziaržavy —člena JEEK dakumient, vydadzieny ŭpaŭnavažanym orhanam nazvanaj dziaržavy, jaki ŭtrymlivaje źviestki pra asobu, što ažyciaŭlaje ŭvoz takich tavaraŭ, kolkaść uvaznych tavaraŭ i ich košt. Poŭny tekst dakumienta možna pačytać tut.
Orhan dahetul niavyznačany
Mienavita praz patrabavańnie padać hety dakumient u biełarusaŭ niama mahčymaści spłačvać 0% pošliny zamiest 15%. Sprava ŭ tym, što ŭ Biełarusi, dahetul nie vyznačyli toj samy ŭpaŭnavažany orhan, jaki budzie vydavać nieabchodny dakumient.
Jak paviedamili ŭ mytni, pakul nieviadoma, što heta budzie za orhan, jaki budzie vydavać dakumient, pra jaki havorycca ŭ rašeńni Savieta JEEK № 39. Kali budzie vyznačany hety orhan, u mytni taksama nie viedajuć. Tamu vynikaje, što praź niemahčymaść atrymać dakumient, patrebny dla razmytnieńnia pa staŭcy 0%, usie elektramabili pakul razmytnivajucca pa pošlinie ŭ pamiery 15% ad mytnaj vartaści. Pry razmytnieńni pa 140-m ukazie — 7,5%.
Adznačym, što na aficyjnym sajcie mytni infarmacyi pra razmytnieńnie elektramabilaŭ pa staŭcy 0% niama. Usie źviestki tyčycca 15%-naj staŭki, jakaja zaraz faktyčna i ŭžyvajecca.
Kamientary