«Adbyvajecca rucinizacyja idei vajny, jaje mahčymaści». Čamu Łukašenka havoryć pra vajnu jak niešta niepaźbiežnaje?
Apošnim časam Łukašenka amal kožny dzień havoryć pra vajnu. Pryčym ź luboj nahody. Navat kali vystupaje pierad navukoŭcami. Adbyvajecca rucinizacyja samoj idei vajny, jaje mahčymaści. Piša analityk Valer Karbalevič.
Łukašenka doŭhi čas vystupaŭ u roli haranta stabilnaści. Apošnija hady, asabliva paśla Kryma, hałoŭny mesedž hramadstvu byŭ prykładna taki: niachaj žyviom i niebahata, zatoje ŭ nas mir, paradak, spakoj, biaśpieka.
2020 hod radykalna pałamaŭ usiu raniejšuju paradyhmu jaho palityčnaha pazicyjanavańnia. Pamianiaŭsia nie toje kab charaktar kiroŭnaha režymu, a chutčej umovy jaho panavańnia. Ciapier dla jaho isnavańnia patrebnaje piermanientnaje stanovišča nadzvyčajščyny.
Tamu, choć, zdavałasia b, pratesty zadušanyja, usie vorahi pieramožanyja, a represii nie spyniajucca. Kožny dzień prychodzić infarmacyja pra novyja aryšty, zatrymańni, sudy, zakanadaŭčyja navacyi suprać apanientaŭ.
Takim čynam, pastajannaja ŭnutranaja vajna, śviadomaje nahniatańnie napružanaści — nieabchodnaja ŭmova vyžyvańnia režymu.
Tamu nie dumaju, što praz peŭny čas, naprykład paśla refierendumu, represii spyniacca.
Adnak vyśviatlajecca, što dla bieśpierapynnaha pavyšeńnia hradusa napružańnia mała baraćby tolki z unutranymi vorahami. Madel krepaści ŭ abłozie patrabuje vonkavych vorahaŭ.
Tamu całkam zakanamierna, što Biełaruś pieratvaryłasia ŭ faktar destabilizacyi nie tolki rehijona Uschodniaj i Centralnaj Jeŭropy, ale i bolš šyrokaha abšaru, u čyńnik pahrozy rehijanalnaj biaśpiecy.
Adzin za druhim pravakujucca mižnarodnyja kryzisy, u centry jakich akazvajecca Biełaruś. Spačatku była skandalnaja historyja z pasadkaj samalota kampanii Ryanair u minskim aeraporcie. Potym byŭ šmatmiesiačny mihracyjny kryzis. Jak vyśviatlajecca, mienavita Łukašenka byŭ inicyjataram uvodu vojskaŭ ADKB u Kazachstan. I voś ciapier Biełaruś apynułasia ŭ centry vajenna-palityčnaha kryzisu vakoł Ukrainy.
Z vystupaŭ Łukašenki apošniaha času vynikaje, što ciapier hałoŭnaja pahroza Biełarusi zychodzić nie ad «strašnaha monstra» NATA, a ad Ukrainy. Ciapier, jak vyśviatlajecca, jana hałoŭny vorah Biełarusi.
Nahniatańnie varožaści suprać paŭdniovaj susiedki nabyvaje maštab padrychtoŭki da realnaj vajny. Pryčym kidajecca ŭ vočy jak absalutna štučny charaktar nibyta ŭkrainskaj pahrozy, tak i jaŭny rasijski palityčny kilvatar, u miežach jakoha dziejničaje Łukašenka.
Hałoŭnaja vysnova palahaje ŭ tym, što źnižeńnie hradusa napružanaści — heta pahroza dla režymu. Tamu jon i kidajecca va ŭsio novyja zamiežnyja avantury.
Razam z tym možna kanstatavać, što va ŭmovach pahrozy realnaj vajny svaboda ruk, kalidor mahčymaściaŭ, pole dla manieŭru Łukašenki rezka zvuzilisia. Pavialičyłasia jaho zaležnaść ad niepradkazalnaj palityki Maskvy.
Miarkuju, zrabić z Ukrainy voraha — zadača małarealnaja navat u vačach prychilnikaŭ Łukašenki. Ale žach u tym, što Łukašenka pryvučaje biełarusaŭ da vajny jak da niečaha niepaźbiežnaha. Pryčym da ŭdziełu ŭ absalutna čužoj vajnie, nijak nie źviazanaj z nacyjanalnymi intaresami Biełarusi. I heta nie vyklikaje nijakaj reakcyi ŭ hramadstvie.
Hazieta Alaksandra Łukašenki nazvała Ukrainu «jeŭrapiejskim Samaliłendam». Ale heta nie adzinaje aznačeńnie
Kiraŭnik Pamiežnaha kamiteta: My nikoli nie dumali, što Ukraina budzie siabie tak pavodzić
«My vośmy hod vajujem i pryvykli». Što va Ukrainie dumajuć pra mahčymaje rasijskaje i biełaruskaje ŭvarvańnie?
-
Cyhankoŭ: Babaryka značna bližejšy da pazicyi ofisa Śviatłany Cichanoŭskaj, čym da vykazvańniaŭ «babarykancaŭ»
-
Babaryka turemščykam: «U mianie było, ciapier niama, ale jość šaniec, što budzie. A ŭ vas nie było, niama i nie budzie. I ŭ vašych dziaciej nie budzie»
-
«Mnie kazali: ty havoryš jak kanadski emihrant». Siarhiej Šupa raskazaŭ pra Vilniu 90-ch, paraŭnańnie litoŭskaj litaratury ź biełaruskaj i adroźnieńni pamiž narodami
Kamientary