Chutka ŭ kłasičnych filmach moža źjavicca schavanaja rekłama. Voś jak heta budzie
Schavanaja rekłama ci prodakt-płejsment — heta vid rekłamy, kali rekvizit u filmie, telepieradačy ci navat knizie nabyvaje rysy sapraŭdy isnujučaha kamiercyjnaha praduktu. Jana prynosić šmat prybytkaŭ vytvorcam filmaŭ i sieryjałaŭ. Ciapier kolkaść schavanaj rekłamy moža jašče bolš pavialičycca, bo jaje možna dadavać ličbavym šlacham jak u novyja, tak i ŭ staryja videa.
Ličycca, što pieršy prykład schavanaj rekłamy ŭ kino — amierykanskaja kamiedyja «Haraž» 1920 hoda, u jakoj možna było pabačyć łahatypy zapravak i vytvorcaŭ aŭtamabilnaj alivy. Praz amal sto hadoŭ, u 2019 hodzie, industryja prodakt-płejsmentu ŭ dačynieńni da filmaŭ, telešou i muzykalnych klipaŭ aceńvałasia ŭ 20,6 miljardaŭ dalaraŭ. Vyjaviłasia, što kali hałoŭnaja zorka šou apranaje adzieńnie, vodzić mašynu ci pje kavu niejkaha adpaviednaha brenda, to ŭsio heta prynosić šmat hrošaj, tłumačyć VVS.
Ale raniej, kab zrabić schavanuju rekłamu, treba było ŭžo padčas zdymačnaha pracesu raźmiaščać abjekt u kadry. Ciapier rekłamnaja industryja hatovaja pracavać z technałohijaj, jakaja dazvalaje ŭstalavać u videa zhienieravanyja kampjutaram vyjavy.
Tamu ciapier možna dadać rekłamu amal što ŭ luby film ci šou. Naprykład, rekłamadaŭcy mohuć źmianić etykietki na butelkach z šampanskim u «Kasabłancy», raźmiaścić novyja rekłamnyja šyldy ŭ «Adzinaccaci siabrach Oŭšena» ci prymusić Čarli Čaplina rekłamavać novuju kołu. A paźniej usie dadadzienyja ŭ filmy brendy možna budzie lohka zamianić na novyja.
Ale kalifarnijskaja kampanija Ryff pajšła ŭ raspracoŭcy schavanaj rekłamy jašče dalej. Tam stvaryli technałohiju, praź jakuju takaja rekłama budzie aryjentavacca na kožnaha kankretnaha karystalnika. Naprykład, kali čałavieku padabajecca vino, hieroj filma budzie pić vino niejkaha adpaviednaha brenda, kab prymusić hledača jaho kupić. Kali karystalnik hladzić film na noŭtbuku, smartfonie ci z dapamohaj technałohii Smart TV, schavanaja rekłama budzie zaležyć ad taho, što karystalnik raniej kuplaŭ anłajn abo prosta prahladaŭ sa svajho devajsa.
Kleapatra Viałutsu, prafiesarka ŭ śfiery brend-mieniedžmentu va Univiersitecie Hłazha, ličyć, što ŭsie hetyja technałahičnyja inavacyi — sproba rekłamadaŭcaŭ z telebačańnia i kinaśfiery nahnać kankurentaŭ z anłajn-śfiery.
Ale ličbavy prodakt-płejsment taksama niasie pahrozy dla rekłamadaŭcaŭ. Kali toj ci inšy brend u budučyni apyniecca ŭ centry skandału, heta moža drenna paŭpłyvać na papularnaść filma ci šou, jakija buduć asacyjavacca z takim brendam. Novy vid schavanaj rekłamy taksama ŭzdymaje jurydyčnyja pytańni i pytańni mastackaj cełasnaści tvora.
Kamientary