Na praciahu dziesiaci hadoŭ u maleniečkim šviedskim pasiołku Chumielsta nie było nivodnaj kramy. Ale ŭ śniežni tam narešcie źjaviŭsia kruhłasutačny mini-supiermarkiet biez supracoŭnikaŭ, jaki źjaŭlajecca častkaj sietki Lifvs.
Lifvs — zapuščany ŭ 2018 hodzie stakholmski startap, meta jakoha — viartańnie kram u hłuchija sielskija rehijony.
U takich miaścinach kramam było ciažka vyžyvać, bo prybytku było zamała dla pracy kramnicy.
Hałoŭnaja admietnaść kram novaj sietki — poŭnaje samaabsłuhoŭvańnie.
Kab uvajści ŭ kramu, treba skarystacca admysłovym mabilnym dadatkam, jaki pracuje razam z BankID — dadatkam ad šviedskich bankaŭ. Dalej možna pry dapamozie smartfona skanavać štrych-kody praduktaŭ i apłačvać ich praz zahadzia zarehistravanuju bankaŭskuju kartku.
U kramach šyroki vybar: ad śviežaj sadaviny i harodniny da takich papularnych u Šviecyi praduktaŭ, jak zamarožanyja frykadelki, halety i vafielnyja batončyki, paviedamlaje VVS.
Šviedskaje nasielnictva lohka ŭsprymaje lubyja technałahičnyja inavacyi, tamu kramy Lifvs chutka nabyli papularnaść.
Da taho ž, padčas pandemii, kali ludziam rajać abmiažoŭvać kantakty, adsutnaść supracoŭnikaŭ — važnaja pieravaha dla takich kram.
Sa studzienia, pavodle šviedskich zakonaŭ, supiermarkiety vymušanyja abmiažoŭvać kolkaść naviedvalnikaŭ takim čynam, kab na kožnaha ź ich prychodziłasia nie mienš za 10 kvadratnych mietraŭ. Technałohija Lifvs harantuje, što ŭ kramach budzie nie bolš za dva naviedvalniki.
Najaŭnaść kruhłasutačnych kamier nazirańnia, a taksama rehistracyja naviedvalnikaŭ praz mabilny dadatak dapamahaje kramam paźbiehnuć kradziažoŭ.
Ź minułaha sakavika sietka adkryła ŭ sielskich rehijonach krainy 20 kram. U bližejšyja hady kampanija płanuje pašyracca. Bolš za toje, u inšych krainach taksama zacikavilisia novaj technałohijaj. Tamu ciapier kampanija ŭzvažvaje, ci varta pieradavać technałohiju zamiežnym sietkam supiermarkietaŭ.
Ciapier čytajuć
«Na karabli kožny dzień — paniadziełak». Biełaruska raskazała pra svaju pracu na kruiznym łajniery1
Kamientary