Prarasijskija radykalnyja siły ŭ Biełarusi abjadnoŭvajucca ŭ partyju. Vystupić zaprasili paplečnikaŭ Zacharčanki z DNR
Siońnia ŭ Minsku prachodzić ustanoŭčy źjezd pa stvareńni partyi «Sajuz». Staršynia — Siarhiej Łušč, hałoŭny prarasijski palityk Biełarusi, u minułym aktyvist nieanacysckaj pahanskaj siekty.
Pavodle źviestak krynic iSANS, na źjeździe vystupiać dziejačy DNR časoŭ Zacharčanki i pradstaŭnik Sievastopala, jaki rychtavaŭ aneksiju Kryma.
Słova musić uziać Alaksandr Kazakoŭ, eks-daradca kiraŭnika DNR Alaksandra Zacharčanki, jaki čatyry hady adpracavaŭ u akupavanym Danbasie. Čakajecca ŭdzieł eks-ministra suviazi DNR Viktara Jacenki, jaki pačaŭ svaju dziejnaść jašče pry Strałkovie-Hirkinie ŭ 2014-m i pratrymaŭsia až da 2019 hoda.
Jašče adzin hanarovy hość — deputat-adzinaros ź Sievastopala Dźmitryj Bielik, adzin z datyčnych da aneksii Kryma, udzielničaŭ u arhanizacyi refierendumu i maje miedal «Za vyzvaleńnie Kryma i Sievastopala».
I apošni ŭdzielnik rasijskaj delehacyi — prafiesar Instytuta dziaržsłužby i kiravańnia pry prezidencie Rasii Uładzimir Kraŭcoŭ. Jon śpiecyjalizujecca na miedyja i prapahandzie. U śniežni minułaha hoda jon pryjazdžaŭ na kanfierencyju ŭ Minsk, dzie śćviardžaŭ, što suprać RF i Biełarusi idzie infarmacyjnaja vajna, dzie vykarystoŭvajucca «technałohii, jakija jašče pracavali pry nacysckaj Niamieččynie».
Akramia delehataŭ z Rasii, hanarovymi haściami nazvanyja deputat Pałaty pradstaŭnikoŭ Nacyjanalnaha schodu Tenhiz Dumbadze, dyrektar Centra vyvučeńnia i raźvićcia kantynientalnaj intehracyi «Paŭnočnaja Jeŭrazija», prarasijski publicyst Alaksiej Dzierman i inšyja. Na źjeździe prysutničaje i Juryj Vaskrasienski.
Analityki iSANS źviartajuć uvahu, što ni adzin z kramloŭskich palitykaŭ-ciažkavahavikoŭ na źjezd nie pryjechaŭ. Heta moža aznačać, što «Sajuz» razhladajecca jak partyja druhoha ešałona. A voś asnoŭnyja palityčnyja hulni Maskva płanuje vieści z anałaham «Adzinaj Rasii» ŭ Biełarusi — partyjaj narodnaha adzinstva, jakuju stvarajuć na asnovie prałukašenkaŭskaj «Biełaj Rusi». «Sajuz» ža stanie prytułkam dla bolš radykalnych prychilnikaŭ «ruskaha śvietu».
Kamientary