«Kupału» nie pakazali, «Listapad» admianili, na «Oskar» vyłučyli niebiełaruski film — top-5 kanfuzaŭ hoda ŭ biełaruskim kino

«Kupału» biełarusam tak i nie pakazali

Za doŭhi čas isnavańnia «Biełaruśfilma» heta samy rezanansny jaho prajekt. Bajopik pra Janku Kupału stali aktyŭna abmiarkoŭvać jašče ad momantu, kali jaho stvareńnie było tolki ŭ płanach: tak nietypova dla siabie kinastudyja ŭziałasia za biełarusacentryčny scenaryj. Pieršy pakaz pavinien byŭ adbycca 17 śniežnia minułaha hoda, ale sa spasyłkaj na niedapracoŭki ŭ hraficy viečar praviali biez «Kupały». Chutka ŭźnikła łahičnaje pytańnie, čamu film hatovy, a jaho nie pakazvajuć — Viktar Marcinovič napisaŭ kałonku «Hodzie chavać «Kupału», a kinastudyja tym časam prytrymała nacyjanalny pakaz, bo zapłanavała dla stužki vialiki fiestyvalny los. Praz pandemiju karanavirusa my tak i nie daviedajemsia, jakich pośpiechaŭ na mižnarodnaj arenie dasiahnuŭ by bajopik pra narodnaha paeta. U Biełarusi ž usio praciahnułasia źlivam čarnavoj viersii ŭ adzin z telehram-kanałaŭ. Narešcie, paŭnavartasnaja mižnarodnaja premjera karciny adbyłasia ŭ listapadzie na kinafiestyvali «Maskoŭskaja premjera», a biełaruskim hledačam «Kupału» tak i nie pakazali. Niekatoryja miarkujuć, praz toje, što ŭ isnujučaj palityčnaj situacyi jon tut nie da miesca.

Skandał praz adsutnaść Biełarusi na Bierlinale

Scenaryst i režysior Andrej Kurejčyk publična aburyŭsia tym, što na kinarynku Bierlinale adsutničaŭ stend Biełarusi. Maŭlaŭ, na markiecie byli pradstaŭlenyja Rasija, Ukraina, Armienija, Hruzija, Tadžykistan i navat «samaja biednaja kraina na hetaj płaniecie» Ruanda, a nas nie było. Chacia hetym razam možna było prarekłamavać siabie nahladna: na kinafiestyvali prachodziła premjera stužki «Uroki piersidskaj» Vadzima Pierelmana, da kapradukcyi jakoj dałučyŭsia «Biełaruśfilm». Ministerstva kultury zaruchałasia i pryznačyła sustreču z kinadziejačami, kab abmierkavać pytańnie, ale jakija rašeńni byli na joj pryniatyja, nieviadoma. Tak ci inakš, dyskusija ŭ čarhovy raz nahadała, što ŭ nas niama kinaindustryi. Biełarusaŭ niama na mižnarodnych kinarynkach, biełarusaŭ niama ŭ mižnarodnych fondach kštałtu «Kreatyŭnaj Jeŭropy», u Biełarusi niama sistemy rybiejta (jana daje mahčymaść kinakampanijam viarnuć častku patračanych u krainie hrošaj na vytvorčaść filma). Adpaviedna, Biełaruś — paprostu małacikavy zamiežnym kinavytvorcam rynak, i Minkult nie demanstruje impetu vypravić hetuju situacyju.

Finansavańnie ekranizacyj biełaruskich knih admienienaje

Ministerstva kultury praz kazionnuju praceduru dziaržzakupki pastanaviła prafinansavać niekalki niezaležnych kinaprajektaŭ: ekranizacyi knih «Sfahnum» Viktara Marcinoviča i «Radziva «Prudok» Andrusia Horvata, film pra Alaksandra Miadźviedzia i sieryjał pra Uładzimira Mulavina. Rašeńnie vyhladała nievierahodnym, bo zvyčajna biudžet na kino nakiroŭvaŭsia «Biełaruśfilmu», a niezaležnyja vytvorcy za redkim vyklučeńniem ihnaravalisia. Zrešty, užo chutka Minkult vypraviŭsia i admianiŭ try z čatyroch dziaržzakupak, spasłaŭšysia na skarhi ŭ MARH, u tym liku hučnuju skarhu Andreja Kurejčyka na toje, što bolšaść łotaŭ vyjhrała «Pieršaja kinavideakampanija». U vyniku biudžetnyja hrošy zastalisia tolki na sieryjał pra Mulavina. 

«Listapad» admianili

Mižnarodny kinafiestyval «Listapad» admianili za dzień da adkryćcia. Uviečary, kali arhanizatary rabili apošnija pryhatavańni, Ministerstva kultury dasłała kampanii mejł z paviedamleńniem ab admienie, a paśla apublikavała rašeńnie ŭ svaim telehram-kanale. Aficyjnaj pryčynaj była nazvanaja epidemijałahičnaja situacyja, chacia kinateatry praciahnuli pracu, tamu, imavierna, realnaja pryčyna hučyć inakš. Fiestyval mierkavaŭ adkrycca «Urokami piersidskaj» i pakazać 120 filmaŭ, u tym liku asobnuju prahramu biełaruskaha kino, a taksama pravieści Industryjalnuju płatformu ź lekcyjami i dyskusijami. U vyniku sabranuju prahramu arhanizatary stali vypuskać častkami — asobnymi pakazami albo kinaprahramami. Adbyŭsia taksama Fiestyval biełaruskaha kino, kudy ŭvajšoŭ uvieś Nacyjanalny konkurs «Listapada».

Na «Oskar» ad Biełarusi vyłučajuć nie biełaruski film

Staršynia biełaruskaha oskaraŭskaha kamiteta Ihar Poršnieŭ paviedamiŭ, što na «Oskar» ad krainy vyrašana vyłučyć «Uroki piersidskaj» Vadzima Pierelmana — tuju samuju karcinu, u vytvorčaści jakoj paŭdzielničaŭ «Biełaruśfilm». Vybiraŭ kamitet pamiž «Urokami» i stužkaj Ułady Sieńkovaj II, dzie vykryvajucca chiby i prymchi našaha hramadstva. Jość takaja praktyka: prajekty, jakija nie vytrymlivajuć kankurencyju ŭ asnoŭnaj krainie vytvorčaści, iduć na premiju ad mienš datyčnaha i mienš praduktyŭnaha partniora. Takim čynam u hetaj schiemie akazałasia Biełaruś, praŭda, u hod, kali biełarusy hučna zajaŭlajuć pra siabie, vybar oskaraŭskaha kamiteta vyhladaje nieadpaviednym času i situacyi.

• 0
• 0
• 0
• 0
• 0
• 0
• 0
• 0