U butaforskaj Partyi pracy i spraviadlivaści vyhaniajuć staršyniu, bo pajšoŭ na dyjałoh z apazicyjaj. Partyju addaduć Tapuzidzisu?
U Biełarusi isnuje Respublikanskaja partyja pracy i spraviadlivaści — absalutna butaforskaje ŭtvareńnie, jakoje nie maje ni ŭpłyvu, ni jakoj-kolviek viadomaści siarod ludziej. Sapraŭdnyja zadačy hetaj arhanizacyi — stvarać uražańnie palityčnaj kankurencyi ŭ Biełarusi i vyłučać praŭładnych naziralnikaŭ i členaŭ kamisij.
Pieravaha hetaj struktury ŭ tym, što jana aficyjna zarehistravanaja ŭ Ministerstvie justycyi, a značyć, moža nabirać siabroŭ i lehalna vieści palityčnuju dziejnaść. Raniej hetym nie zajmalisia, bo ŭ šmathadovaha lidara partyi — lotčyka i palitruka Vasila Zadniapranaha — nie było ni takoha zadańnia ad uładaŭ, ni ŭłasnaha žadańnia.
Ale paśla padziej žniŭnia Zadniapranaha praniało: jon zrazumieŭ, dzie žyvie, i staŭ nierašuča, ale ŭsio ž vykazvacca pra padziei ŭ krainie.
Zadniaprany, u pryvatnaści, zajaviŭ, što ludzi na vulicach — heta nijakija nie narkamany i prastytutki, a narmalnyja biełarusy, daviedzienyja da adčaju.
Takoj volnicy jamu nie daravali, i ŭčora BiełTA paviedamiła pra toje, što rašeńniem partyi Zadniaprany vyklučany ź jaje šerahaŭ. U adkaz jon raspaŭsiudziŭ pres-reliz z abviaržeńniem infarmacyi. Što ž robicca ŭ partyi?
Jak davodzić «Našaj Nivie» Vasil Zadniaprany, adbyłasia sproba «rejdarskaha zachopu».
«7 śniežnia da mianie prychodzić deputat parłamienta Andrej Strunieŭski (Respublikanskaja partyja pracy i spraviadlivaści atrymała ŭ Pałacie pradstaŭnikoŭ šeść miescaŭ — «NN»). Kaža, maŭlaŭ, jość rašeńnie źvierchu — Zadniapranaha vyrašana prybrać, tamu treba sychodzić. A partyju, maŭlaŭ, uznačalić Pavieł Tapuzidzis (miljanier, haspadar «Karony» i «Tytuń-Inviesta» — «NN»).
Ja kažu: «Andrej, ty razumieješ, pra što havoryš?!»
A jon mnie: «Kali admovišsia, budzie niepryjemny scenar, mohuć paciarpieć dzieci».
A potym ja daviedvajusia, što Alaksandr Ściapanaŭ — načalnik minskaj partyjnaj arhanizacyi — pačynaje słać hancoŭ u rajony, schilać da praviadzieńnia źjezdu. Maŭlaŭ, jość «rašeńnie źvierchu», Zadniapranaha treba mianiać. Mnie ludzi zvoniać: što adbyvajecca?» — raskazvaje kiraŭnik partyi.
Pavodle słovaŭ Zadniapranaha, paśla hetaha było praviedziena pasiadžeńnie «partvykankama», na jakim jon vyklučyŭ z partyi raskolnika Ściapanava, deputata Strunieŭskaha i jašče troch čałaviek, u tym liku Ihara Parečyna — eks-pamočnika Dźmitryja Paŭličenki pa arhanizacyi vieteranaŭ śpiecnaza.
Paśla hetaha, kaža jon, jaho paplečnikam stali nazvańvać z pahrozami.
Tym časam praciŭniki staršyni praviali svoj schod, na jakim i vyklučyli Zadniapranaha z partyi.
Zadniaprany pierakonvaje, što hety schod niezakonny, a jon zastajecca kiraŭnikom. «Nakirujem skarhu ŭ Mininfarm nakont publikacyi na BiełTA ź niepravieranaj infarmacyjaj, — kaža jon. — Ja navat chadziŭ siońnia na pryjom u Administracyju prezidenta, i hałoŭny ideołah Andrej Kuncevič zapeŭniŭ mianie, što nijakich rašeńniaŭ pa partyi nie prymałasia».
«Naša Niva» pahavaryła i z tym samym «raskolnikam» — Alaksandram Ściapanavym. Heta 70-hadovy mužčyna, jaki pačynaŭ karjeru palitrukam, a potym staŭ prafiesijnym čynoŭnikam: pieraskokvaŭ pa kirujučych pasadach administracyi Frunzienskaha vykankama, byŭ namieśnikam načalnika ŭpraŭleńnia fizkultury i sporta Minharvykankama, a ciapier — namieśnik hienieralnaha dyrektara škoły alimpijskaha rezierva pa tenisie.
«Zadniaprany adyšoŭ ad palityčnaha kursu partyi! Ciaham hetaha hoda było vielmi šmat zvankoŭ, skarhaŭ na jaho. Naša asnoŭnaja masa partyi — 99% (u RPPS dekłarujuć, što ŭ ich 10 tysiač siabroŭ — «NN») patrabavała razhledzieć pytańnie ab jaho znachodžańni. I voś my praviali źjezd, na im vystupiła 15 čałaviek, začytali šmat listoŭ z roznych abłaściej i adzinahałosna pryniali rašeńnie vyklučyć jaho z partyi», — tłumačyć Ściapanaŭ.
Što mienavita nie tak z «kursam» Zadniapranaha?
«Jon praciŭnik taho, što my ź dziaržaŭnymi ściahami prajechali ŭ aŭtaprabiehu, jon vioŭ dyjałoh sa stačačnymi kamitetami, adpraviŭ pradstaŭnika na pasiadžeńnie apazicyjnych partyj. Nazapasiłasia vielmi šmat», — tłumačyć Ściapanaŭ.
Ale što ž u hetym drennaha? My paprasili Ściapanava prajaśnić pazicyju da kanca i adkazać jašče na paru pytańniaŭ.
Ci sfalsifikavanyja vyniki prezidenckich vybaraŭ? — «Nie, jany prajšli aficyjna na poŭnaj zakonnaści».
Ci katavali ludziej u milicyi? «Nichto nie katavaŭ, usio vielmi dobrazyčliva było».
Dyk, moža, i nie zabivali nikoha? «Zabitych niama, paranienych taksama».
Što da Paŭła Tapuzidzisa, to biznesmien nazyvaje situacyju «hłupstvam».
«Nie havarycie na hetuju temu. Ja nie lublu, kali mnie zadajuć takija durackija pytańni», — adkazaŭ jon karespandentu «Našaj Nivy».
Ciapier čytajuć
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha67
Kamientary