U Rasii zajavili pra mahčymy pierahlad adkaznaści Stalina na Katynskija rasstreły. Pasolstva Polščy aburyłasia
Ambasada Polščy ŭ Maskvie raspaŭsiudziła ŭ aŭtorak viečaram zajavu, u jakoj vykazała «ździŭleńnie» idejaj niekatorych deputataŭ Dziaržaŭnaj dumy Rasiei pierahledzieć ciapierašniuju aficyjnuju pazycyju krainy nakont rasstrełu polskich aficeraŭ u Katyni, piša «Radyjo Svaboda».
U zajavie paviedamlajecca, što ŭ siaredzinie listapada ŭ Ćviarskoj vobłaści Rasiejskaje vajenna-histaryčnaje tavarystva arhanizavała kanferencyju, pryśviečanuju rasiejska-polskim adnosinam. Na joj, jak adznačaje polski bok, «prahučali vykazvańni, nakiravanyja na niepryznańnie adkaznaści NKVD za Katynskaje złačynstva».
U ambasadzie Polščy adznačyli, što mierapryjemstva było adobrana aficyjnymi pradstaŭnikami rasiejskaj Dziarždumy, jakija sami prymali ŭdzieł u kanferencyi i zajavili ab mahčymym anulavańni dakumenta ad 26 listapada 2010 hodu, u jakim Rasieja paćvierdziła adkaznaść SSSR i Stalina za masavaje zabojstva palakaŭ. U pryvatnaści, deputat Dziarždumy Čepa skazaŭ, što hatovy asabista vystupić ź inicyjatyvaj admianić dakument.
Polski dyplamat Łukaš Cudny, jaki padpisaŭ zajavu polskaha pasolstva, padkreśliŭ, što «treba zasiarodzicca na abaronie histaryčnaj praŭdy pra Druhuju suśvietnuju vajnu», a taksama «nahadvać pra adkaznaść NKVD» za rasstreł u Katyni.
Masavyja pachavańni achviar stalinskich represij u navakollach vioski Miednaje Ćviarskoj vobłaści byli vyjaŭlenyja ŭ žniŭni 1991 hodu. Historyki i śledčyja ŭstanavili, što siarod pachavanych ciełaŭ — pareštki bolš za 6 tysiač pałonnych polskich vajskoŭcaŭ, rasstralanych viasnoj 1940 hodu ŭ vioscy Katyń Smalenskaj vobłaści pavodle sakretnaha rašeńniu VKP (b) i Stalina. Tady za dva miesiacy byli zabityja amal 22 tysiačy palakaŭ.
Ciapier čytajuć
«Patraciła 300 rubloŭ — a jašče tolki siaredzina červienia!» Biełarusy abmiarkoŭvajuć vydatki na pakos travy i dzielacca łajfchakami1
Kamientary