Niamiecki epidemijołah prapanuje zarazić moładź karanavirusam, kab vypracavać kalektyŭny imunitet
Viadučy niamiecki epidemijołah, kiraŭnik adździeła mikrabijałohii ŭ Hale-Vitenbierhskaha ŭniviersitecie, Alaksandr Kiekule zaklikaje nie čakać mifičnuju vakcynu. Jon ličyć, što treba raspačać radykalnyja kroki, kab vyjści z karancinu.
Kiekule byŭ tym samym čałaviekam, jaki papiaredžvaŭ, što virus achopić Jeŭropu, i publična zaklikaŭ urad Anhieły Mierkiel pačać pravierku mižnarodnych turystaŭ jašče ŭ studzieni 2020 hoda.
Na dumku prafiesara, karancin moža praciahvacca zanadta doŭha i pryniasie bolš škody, čym sam virus. Tamu jon raspracavaŭ płan biaśpiečnaha vychadu ź situacyi.
«Nielha čakać vakcynu, — zajaviŭ prafiesar Kiekule u kamientary vydańniu The Telegraph. — My nie možam zastavacca pad zamkom ad šaści miesiacaŭ da hoda. Kali my zrobim heta, naša hramadstva i naša kultura buduć razburanyja», — papiaredžvaje Kiekule.
U sakaviku, kali virus achapiŭ Hiermaniju, Kiekule zaklikaŭ začynić miažu i škoły. Tady ŭsieahulny karancin byŭ adzinym varyjantam, kab zapavolić pašyreńnie i praduchilić pierahružanaść balnic, tłumačyć jon.
«Ale praciahłaje spynieńnie ŭsiaho moža prynieści bolš škody, čym sam virus», — kanstatuje vučony.
Kiekule ličyć, što z tatalnaha karancinu treba vychodzić nieadkładna. I zrabić heta treba biaśpiečnym čynam, zhodna z płanam z troch prostych punktaŭ.
Pa-pieršaje, pavodle jaho słoŭ, ludzi stałaha vieku i tyja, u kaho jość spadarožnyja chraničnyja chvaroby, pavinny zastavacca ŭ izalacyi.
Druhi punkt płana prafiesara Kiekule: pierachod ad sacyjalnaha dystancyjavańnia da intelektualnaha.
«Nam treba adaptavać dystancyju da situacyi. Naprykład, kasir u kasie supiermarkieta budzie padviarhacca ryzycy zaražeńnia na praciahu ŭsiaho dnia. Jamu treba nasić masku, jamu patrebnyja naležnyja miery hihijeny. Taksist pavinien navučycca nie čapać svoj tvar, kali kranaŭsia hrošaj».
Pa sutnaści, usie my pavinny pryvyknuć nasić maski ŭ lubym pamiaškańni, dzie jość inšyja, ličyć prafiesar Kiekule. Zvyčajnaj chirurhičnaj maski dastatkova.
Kali pieršyja dva punkty mała kaho ździviać, to treci moža šakavać.
Kiekule zaklikaje śpiecyjalna zarazić karanavirusam maładoje nasielnictva Hiermanii.
«Tyja, chto maładziejšy za 50 hadoŭ, naŭrad ci pamruć albo surjozna zachvarejuć, — kaža jon. — My pavinny dazvolić im zarazicca, kab jany mahli vypracavać imunitet».
Pytańnie, jakoje ŭźnikaje: ci mahčyma atrymać imunitet, pierachvareŭšy karanavirusam?
Kali čakańni nie apraŭdajucca, to hvałtoŭnaje zaražeńnie maładoj častki nasielnictva pryviadzie tolki da maštabavańnia epidemii.
Kamientary