Padviesili, jak kiłbasy da Kaladaŭ

Ministry zamiežnych spraŭ Jeŭraźviazu vykazalisia za praciah prypynieńnia vizavych sankcyj suprać biełaruskich čynoŭnikaŭ jašče na dzieviać miesiacaŭ. Inačaj kažučy, praciahnuli vyprabavalny termin. Tolki voś chto kaho vypraboŭvaje?

U ministraŭ, što sabralisia 16 sakavika ŭ Brusieli, vybar byŭ nievialiki. Skasoŭvać sankcyi — za jakija heta podźvihi? Znoŭ abviaščać usiu tuju halereju piersanažaŭ nieŭjaznoj (jak taho damahalisia peŭnyja fihury z apazicyi)?

Tady najbolej imavierny scenar taki: tutejšaja viarchoŭka — ach vy, … brusielskija! — učyniaje Jeŭropie vialiki skandał ź bićciom posudu i, što samaje sumnaje, jašče macniej zaciskaje hajki ŭ krainie.

Taki pavarot siužetu my ŭžo nazirali na pačatku 2008 hoda. Pamiatajecie: adzin za adnym stali vychodzić na volu palitviaźni, ale varta było pracesu dać zboj na Kazulinie — i pajšło novaje mačyłava: “sprava 14” dy ŭsio takoje. Amierykancaŭ pavyhaniali...

Dalej: atrymaŭšy adłup ad Jeŭropy, tutejšaje načalstva adpaviedna skarektuje i zamiežnuju palityku.

“Chto vyjhraje, kali Łukašenka pačnie macniej siabravać z Rasijaj, Vieniesuełaj, Iranam?” — rytaryčna pytajecca palitołah Valer Karbalevič.

Tak što ministry paličyli za lepšaje pahadzicca na prałanhacyju vyprabavalnaha terminu. Praściej kažučy, pytańnie padviesili — akurat da Kaladaŭ, nie raŭnujučy jak tyja kiłbasy pad strachoju :)

Heta rašeńnie ŭraźlivaje dla krytyki, ale jano vyhladaje całkam łahična ŭ miežach raspačataj letaś novaj palityki JEZ u dačynieńni da Biełarusi. Zvyšzadača — uciahnuć krainu ŭ jeŭrapiejskija pracesy, navat kali davodzicca redukavać kaštoŭnasnyja patrabavańni da režymu.

Zaraz situacyja ni dva ni paŭtara. Niejkija žesty Minsk usio ž zrabiŭ. Va ŭsiakim razie, padstaŭ dla pošuku ahulnaj movy nie mieniej, čym było paśla farmavańnia “sterylnaj pałaty”, a mienavita paśla tych nibyta vybaraŭ, zhadajma, i prypynili pieršy raz sankcyi :)

Inšaje pytańnie: chto kaho vypraboŭvaje? Padajecca, što heta Łukašenka daśleduje, nakolki daloka siahaje ciarplivy prahmatyzm Brusiela. Chod ź vizitam u Jerevan z-pad nosa ŭ jeŭrakamisarki Fierera-Valdner — akurat taki test dla JEZ: a hetu pihułku prahłyniecie? Chacia epataž tut nie samameta. Simvolika ŭ tym, kab davieści Jeŭropie: vy mnie tut dyktavać nie budziecie! Karaciej, “palubicie nas čornieńkimi”!

“Łukašenka adčuvaje, što Jeŭraźviaz nadzvyčaj zacikaŭleny ŭ dyjałohu ź Biełaruśsiu. Biełaruski kiraŭnik usprymaje heta jak prajavu słabaści, a ŭ takich vypadkach jon imkniecca dacisnuć, nakinuć svaje ŭmovy”, — ličyć Karbalevič.

Prablema ŭ tym, što Brusiel faktyčna pahadziŭsia na hulniu ŭ adny varoty. Umovy pieršaha vyprabavalnaha terminu ź jaho vusnaŭ hučali — va ŭsiakim razie dla šyrokaj publiki — zanadta raspłyvista.

Z adnaho boku, zrazumiełaja zaściaroha jeŭrapiejskich palitykaŭ zahnać samich siabie ŭ pastku śpisam žorstkich patrabavańniaŭ. Ź inšaha boku,

kali dyjałohu nie nadać prazrystaści dy kankretyki, to i druhi vyprabavalny termin moža stać pšykam.

Miž tym dzieviaci miesiacaŭ całkam dastatkova (dźvie parłamienckija siesii projduć!), kab pryniać źmieny ŭ vybarčaje zakanadaŭstva (kštałtu: apazicyja va ŭsich kamisijach), skasavać adyjozny artykuł 193-1 Kryminalnaha kodeksu (pa jakim adsiedzieli siabry “Partniorstva”, Daškievič), viarnuć u raspaŭsiud usie represavanyja haziety.

Karaciej, patrebien realistyčny śpis umoŭ. Kali ŭžo jany tam u svaim Brusieli tak bajacca, to nie abaviazkova zamacoŭvać śpis niekim biurakratyčnym rašeńniem, ale artykulavać hetu kankretyku — varta. A nie tak, jak sp. Sałana ŭ lutym: maŭlaŭ, usio, što tre' było skazać, ja jamu na vuška skazaŭ…

Tady, darečy, i biełaruskamu načalstvu ciažej było b adkručvacca ci narakać, što Jeŭropa ŭdaryła sankcyjami biez daj nahody.

Letaś ža, hladzicie, Zachad urešcie dacisnuŭ u pytańni palitviaźniaŭ. Chacia mnohija nie vieryli, što Łukašenka pierasilić siabie i vypuścić Kazulina daterminova. Fiška ŭ tym, što byŭ kankretny śpis, a nie ahulnyja pažadańni, kab režym staŭ miakkim dy puchnatym. I była zacikaŭlenaść režymu naładzić dačynieńni. Hetaja zacikaŭlenaść nikudy nie padziełasia i ciapier. Treba na hetym razumna hrać.

Razam z tym, anhažavańnie samoj našaj krainy va “Uschodniaje partniorstva” faktyčna biez anijakich papiarednich umoŭ vyhladaje chodam apraŭdanym.

Sankcyi suprać piersanalij — heta asobnaje i, ščyra kažučy, dastatkova vuzkaje pytańnie. A ciahnik “Uschodniaha partniorstva” chaj sabie tym časam pakrysie skranajecca ź miesca.

Na stancyju pryznačeńnia jon prybudzie, mahčyma, užo ŭ novaj histaryčnaj situacyi. Ź inšymi piersanalijami.

• 0
• 0
• 0
• 0
• 0
• 0
• 0
• 0