Chatniaje zadańnie pa fizkultury i tłumačeńnie paniaćcia «kalarovaja revalucyja». Jakija źmieny ŭ škołach buduć u novym navučalnym hodzie
14 žniŭnia ŭ Minsku prajšoŭ ahulnarespublikanski sieminar-praktykum, pryśviečany padrychtoŭcy da 2025/2026 navučalnaha hoda. Na im abmierkavali hatoŭnaść ustanoŭ adukacyi da navučalnaha hoda, źmianieńni ŭ prahramach i novaŭviadzieńni, jakija pačnuć dziejničać z 1 vieraśnia, piša BiełTA.
Pa słovach namieśnika ministra adukacyi Alaksandra Kadłubaja, u bolš čym pałovie škoł i himnazij užo padpisanyja abo amal padpisanyja pašparty hatoŭnaści. Zaviaršajucca ramonty, praviarajucca biaśpieka i vykanańnie sanitarnych i techničnych normaŭ. Bolš za 90% rukapisaŭ novych padručnikaŭ pieradadziena na drukarni, častka nakładu ŭžo dastaŭlena ŭ škoły.
Z novaha navučalnaha hoda ŭvodziacca istotnyja źmieny:
- kolkaść urokaŭ fizkultury pavialičycca da troch na tydzień, kab zmahacca z hipadynamijaj i palapšać fizičnuju padrychtoŭku vučniaŭ;
- u prahramy ŭklučać hulniavyja vidy sportu (valejboł, baskietboł, futboł), a ŭ starejšych kłasach — himnastyku na spartyŭnych snaradach;
- mahčyma źjaŭleńnie chatniaha zadańnia pa fizkultury, naprykład, padciahvańni, prysiedańni, praktykavańni na pres;
- teoryja i praktyka fizkultury buduć vyvučacca paralelna.
Z 1 vieraśnia taksama ŭvodzicca:
- zabarona karystańnia mabilnymi telefonami padčas urokaŭ (smartfony buduć zdavacca ŭ śpiecyjalnyja šafy);
- abaviazkovy dziełavy styl adzieńnia dla vučniaŭ.
U novym navučalnym hodzie školniki atrymajuć 28 padručnikaŭ, u tym liku dva novyja.
Asablivaja ŭvaha — pradmietu «Historyja Biełarusi ŭ kantekście suśvietnaj historyi», dzie kala čverci knihi pryśviečana niezaležnaj Biełarusi, jaje dasiahnieńniam, roli Łukašenki, patryjatyzmu i «adzinstvu». Ministr adukacyi Andrej Ivaniec adznačyŭ, što ŭpieršyniu ŭ padručniku padrabiazna apisany 30-hadovy pieryjad instytuta prezidenctva, uklučajučy tłumačeńnie paniaćcia «kalarovyja revalucyi».
Dla dziesiacikłaśnikaŭ navučalny hod skončycca 25 traŭnia, kab pravieści vučebna-palavyja zbory pa patryjatyčnym, fizičnym i pracoŭnym vychavańni. U sielskich škołach, licejach i kadeckich vučyliščach źjavicca mahčymaść navučańnia kiravańniu aŭtamabilem jak častki prafiesijnaj padrychtoŭki.
Praciahvajecca ličbavaja transfarmacyja adukacyi: na Nacyjanalnym adukacyjnym partale źjaviacca virtualnyja pamočniki dla vučniaŭ, a taksama fakultatyŭ «Asnovy kiravańnia kvadrakoptaram» z praktykaj na trenažorach.
Ciapier čytajuć
Małady rabotnik «Minsk-Areny» pavinien zapłacić 71 miljon dalaraŭ4
Małady rabotnik «Minsk-Areny» pavinien zapłacić 71 miljon dalaraŭ
«Darahija, viesialiciesia, hulajcie i kuraleście. Niachaj na staraść u vas budzie zapas dobrych pieražyvańniaŭ». Apošni hod Śviatłany Kurs — u jaje dopisach99
Kamientary
I lepš pakul biez telefona, da taho času, jak Ahat, Haryzont i AAC nie prydumali mabilny telefon sa štučnym intelektam, jaki viedaje tolki 1 pravilny padručnik.