Aharodnaje pudziła marki «Iskander»

Hetyja “Iskandery” stali ŭžo niejkim universalnym pudziłam. Voś i zaraz paśla zajavaŭ rasiejskaha abaronščyka Dzimidziuka ŭeb-resursy zastrakacieli paničnymi zahałoŭkami, što tyja “Iskandery” mohuć źjavicca i ŭ Biełarusi.

Dyk nie mohuć, a źjaviacca abaviazkova! Kali tolki biełaruskaje kiraŭnictva nie rassabačycca z Maskvoj uščent. Reč u tym, što adpaviednaje pieraŭzbrajeńnie našaj 465-j rakietnaj bryhady pad Asipovičami daŭno zaplanavanaje. Aryjencirovačny termin: 2015—2020 hady.

Ale — uvaha! —

heta buduć užo biełaruskija “Iskandery”, kuplenyja ŭ rasiejcaŭ. Pad biełaruskim kamandavańniem.

Pryčym ekspartnaja madyfikacyja bje tolki na 280 km. Da radara ŭ Čechii ź ich nie dastreliš (dy i da polskich šachtaŭ z supraćrakietami, badaj, taksama), navat kali tuju bryhadu pierakinuć pad Bieraście.

Źviazvać planavaje pieraŭzbrajeńnie biełaruskaha vojska ź idejaj słavutaha "asymetryčnaha adkazu" Maskvy na amerykanskuju systemu supraćrakietnaj abarony — vialikaja naciažka. Hetaja tema vykarystoŭvajecca najpierš dziela palityčnych spekulacyj.

Jašče bolej. U vypadku sa śviežymi zajavami Dzimidziuka, dyrektara pa asablivych daručeńniach “Rasabaronekspartu”, atrymaŭsia klasyčny sapsavany telefon. Toj, naadvarot, davodziŭ, što zamiežnyja partnery pačnuć atrymlivać "Iskandery" z zatrymkaj, bo napačatku treba ŭkamplektavać imi rasiejskaje vojska. Kažuć, ciapier usie najaŭnyja kompleksy hetaha typu kinutyja na hruzinski napramak. Dy i ŭvohule toj "Iskander" jašče syry, nie daviedzieny da ładu.

Karaciej, apraŭdańnie pradstaŭnika rasiejskaj “abaronki” vysiłkami žurnalistaŭ pieratvaryłasia ŭ pahrozu :)

Nu a jahonuju zajavu, što ŭ Biełarusi moža źjavicca rasiejskaja bryhada supraćpavietranaj abarony, naš vajskovy ekspert Alaksandar Alesin ličyć i ŭvohule nadta sumnieŭnaj. Jon kaža: navat pry adzinaj systemie SPA takoj patreby niama. Bolej lahična ŭzbroić naviejšymi srodkami biełaruskija častki. Z rasiejskaj ža bryhadaj mnoha tłumu i ŭ jurydyčnym sensie: treba ž nadać niejki status. Stvarać u nas zamiežnuju vajskovuju bazu ci jak?

Na dumku Alesina, pierakinuć rasiejskuju bryhadu SPA mohuć chiba ŭ fors-mažornych varunkach. Nu, naprykład, kab terminova zakryć ukrainski napramak, kali Kijeŭ nadta ŭžo rezka pojdzie ŭ NATO. Ale i tady jašče vialikaje pytańnie, ci zachoča Alaksandar Łukašenka psavać dačynieńni z paŭdniovymi susiedziami. Kładučy ruku na serca, nataŭski trend Ukrainy — heta vyklučna kramloŭski hałaŭny bol.

Tak, dniom raniej biełaruski aficyjny lider zajaviŭ žurnalistu “Uoł-stryt džorneł”, što Biełaruś absalutna padtrymlivaje Rasiju ŭ jaje adekvatnych dziejańniach u adkaz na raźmiaščeńnie amerykanskaj systemy supraćrakietnaj abarony ŭ Čechii i Polščy. Ale havorka išła pra vyklučna rasiejskija zachady — mahčymaje raźmiaščeńnie “Iskanderaŭ” u kalininhradzkim anklavie.

Hety reverans u bok Kramla realna ničoha nie kaštuje i razam z tym nia lišni napiaredadni ciažkaha pasiedžańnia Najvyšejšaj rady sajuznaje dziaržavy i torhu vakoł hazu na 2009 hod.

Realna ž ułazić u kanfrantacyju z Eŭropaj praz rasiejskija ambicyi Łukašenku zusim niedarečy.

Niezdarma jon tak chvaliŭ Abamu ŭ zhadanym interviju :) Moža, małady amerykanski prezydent prosta zdymie toje pytańnie, admoviŭšysia ad planaŭ stavić radar u Čechii dy antyrakiety ŭ Polščy?

I jašče. Kalehi-žurnalisty miašajuć bob z harocham, błytajučy supraćpavietranuju i supraćrakietnuju abaronu. Nijakaj sumiesnaj systemy supraćrakietnaj abarony Maskva i Miensk nie planujuć. Supolnaja ž supraćpavietranaja abarona de-fakta ŭžo isnuje. Ale ž, panovie, “Iskanderami” nie źbivajuć samaloty! Hetyja kompleksy pryznačany dla źniščeńnia važnych abjektaŭ na ziamli: varožych štaboŭ, puskavych šachtaŭ, radaraŭ. Adpaviedna, imi nie ŭzbrojvajuć adździeły SPA. Ni rasiejskija, ni biełaruskija (voś S-400 Biełaruś zajmieła b achvotna). Tak što nia treba rabić sensacyjaŭ na hołym miescy.

I, narešcie, apošniaje.

Kali ŭžo kazać pra realny asymetryčny adkaz na amerykanskuju supraćrakietnuju abaronu z dapamohaj Biełarusi, to tut nia treba vynachodzić koła. Dastatkova, kab Maskva atrymała ŭ Mačuliščach aeradrom padskoku dla svaich Tu-22M3.

Hetyja eŭrastratehičnyja bambaviki vykarystoŭvali biełaruskija vajskovyja aeradromy za časami SSSR i trymali ŭ strachu ŭsiu Eŭropu.

Ale pra hety varyjant Miensk ni hu-hu. Biełaruskaje kiraŭnictva dobra razumieje, što dražnić Zachad takimi rečami było b niedalnabačna. Nu a “Iskandery” — tak, aharodnaje pudziła dla słabanervovych.

• 0
• 0
• 0
• 0
• 0
• 0
• 0
• 0