U mižnarodnym vydaviectvie «Edipresse Polska» ubačyła śviet kniha viadomaha biełaruskaha historyka Ihara Mielnikava, pryśviečanaja historyi 20-j «biełaruskaj» dyvizii piachoty Vojska Polskaha. Vydańnie vyjšła ŭ sieryi «Vialikaja kniha polskaj piachoty».
Kniha, vydadzienaja na polskaj movie, pryśviečana historyi pałkoŭ, jakija ŭvachodzili ŭ skład uzhadanaj vyšej vajskovaj častki. Hutarka idzie pra 78 połk słuckich stralcoŭ, 79 połk słonimskich stralcoŭ imia Lva Sapiehi, 80 połk navahrudskich stralcoŭ. Nahadajem, što ŭ mižvajenny čas 20-ja piachotnaja dyvizija polskaha vojska dysłakavałasia ŭ rajonie Baranavičy—Słonim i ŭ vypadku vajny z Savieckim Sajuzam pavinna była zmahacca ŭ DAKach Baranavickaha ŭmacavanaha ŭčastka.
U knizie «20 dyvizija piachoty» źmieščana vialikaja kolkaść nie viadomych u Biełarusi zdymkaŭ i materyjałaŭ, uziatych z polskich archivaŭ, zboraŭ polskich daśledčykaŭ, a taksama pryvatnaha archiva aŭtara — biełaruskaha historyka Ihara Mielnikava.
Varta taksama adznačyć, što daśledčyk apracavaŭ vialikuju kolkaść histaryčnych materyjałaŭ, znojdzienych u biełaruskich i zamiežnych archivach. Tak, naprykład, była sabrana padrabiaznaja infarmacyja ab bijahrafii ŭsich troch kamandziraŭ uzhadanych pałkoŭ. Asablivuju cikavaść ŭjaŭlajuć fakty z žyćcia kamandzira 79-ha piachotnaha pałka, pałkoŭnika Kanstancina Zabaroŭskaha, jaki ŭ siaredzinie 1930-ch hadoŭ źjaŭlaŭsia vajskovym ataše Ambasady Polščy ŭ Maskvie. Padčas bitvy pad Młavaj jon prajaviŭ siabie jak vydatny, daśviedčany aficer i strateh.
«Dla mianie była spravaj honaru zrabić hetuju knihu. Kaniešnie, heta vyklik, pisać na zamiežnaj movie, ale ja vałodaju anhielskaj, niamieckaj i polskaj movami i aktyŭna karystajusia imi pad čas svaich histaryčnych daśledavańniaŭ. Ja zrabiŭ knihu pra biełaruskich žaŭnieraŭ Vojska Polskaha, pra ich mužnaść i hieraizm, addanaść i samaachviarnaść. Ja chaču, kab pra hetych ludziej viedali i hanarylisia ich podźviham i ŭ Biełarusi i ŭ Polščy. Varta pamiatać, što vorahi nazyvali hetuju dyviziju «žaleznaj», a polskaje kamandavańnie nieaficyjna nazyvała jaje «biełaruskaj». Tych hierojaŭ užo niama z nami, ale jość ich historyja i my, biełarusy, pavinny hanarycca, što mienavita našyja suajčyńniki byli adnymi z tych, chto jašče ŭ vieraśni 1939 hoda skazaŭ Hitleru «Nie».
Prezientacyja knihi «20 dywizja piechoty« ź sieryi «Wielka księga piechoty polskiej« adbudziecca 12 studzienia 2018 hoda ŭ 19-00 u Halerei TUT.BY (h. Minsk, praśpiekt Dziaržynskaha, 57). Uvachod volny.
Pramova hetaha minskaha vypusknika na liniejcy ŭ 2020-m uzarvała internet. Što z chłopcam ciapier?3
Kamientary