Pačałosia: rasijskaje infarmahienctva nazyvaje Biełaruś «zvarjaciełaj niedadziaržavaj», a biełaruski akcent — prykmietaj nizkaha pachodžańnia

Apošnija hady rasijskija miedyi pieryjadyčna rabili vypady ŭ bok Biełarusi. To byli razavyja paklopy, jakija mieli na mecie kankretnyja piersanalii ci dziejańni biełaruskich ŭładaŭ. 

25 kastryčnika antybiełaruskaja prapahanda vyjšła na novy ŭzrovień. Rasijskaje infarmahienctva «Rehnum» vydała materyjał, u jakim Biełaruś nazyvajecca «zvarjaciełaj niedadziaržavaj», a nacyja — «vydumanaj». 

Pavialičyć

Asabliva raźjušyła aŭtara inicyjatyva niekatorych dziciačych sadkoŭ zrabić čaćvier dniom biełaruskaj movy. 

«Biełaruskija rusafoby, dapuščanyja dziaržavaj da vysokich pasad, prydumali novy sposab zabrudžvańnia mazhoŭ padrastajučamu pakaleńniu biełaruskim dyjalektam ruskaj movy, — piša «Rehnum». — Ciapier u dziciačych sadkach zamiest «rybnaha dnia» u čaćvier budzie dzień biełaruskaj movy. Takim čynam, biełaruskaja dziaržava raźličvaje pastupova pieraadoleć irredentysckija nastroi biełarusaŭ, absalutnaja bolšaść jakich žadaje ŭźjadnańnia sa svajoj vialikaj Radzimaj — Rasijaj».

Dalej idzie śćviardžeńnie, što biełaruskuju movu vydumali trackisty, a asobnyja havorki ŭ rehijonach na asobnuju movu nie ciahnuć. 

Biełaruskaja nacyja, maŭlaŭ, taksama prydumanaja, ale palakami. 

Padkreślivajecca, što ŭ Rasii «mnohija jašče admaŭlajucca vieryć u novuju jakaść biełarusizacyi, jakaja pačałasia try hady tamu». 

Aŭtar viartajecca da temy biełaruskamoŭnaha čaćviarha ŭ sadkach, i śćviardžaje, što admova ad nacyjanalnaj movy — «u intaresach biełarusaŭ, bo ŭ jaje (movy) niama nijakich šancaŭ». 

«Kali praź niekalki dziesiacihodździaŭ mnohija jeŭrapiejskija movy pierastanuć isnavać, to što kazać pra novastvoranuju?», — piša aŭtar, vykarystoŭvajučy typovy pryjom prapahandy, kali śćviardžeńnie niemahčyma pravieryć. 

Pry hetym biełaruskaja mova nazyvajecca patrebnaj tolki «zvarjaciełaj niedadziaržavie» — Biełarusi. 

«Usio, čaho damohucca biełarusizatary — sapsujuć vašamu dziciaci maŭleńnie. Jano budzie havaryć z akcentam i błytać ruskija słovy ź biełaruskimi. Kali heta zdarycca ź im u dosyć rańnim uzroście, mahčyma, heta ŭžo nielha budzie vypravić. Skažu pad sakretam, što niaŭmieńnie pravilna havaryć na litaraturnaj movie va ŭsim śviecie ličycca prykmietaj nizkaha pachodžańnia i źjaŭlajecca niasłabym tormazam sacyjalnaha rostu. Kali vam nieabyjakava budučynia vašych dziaciej — nie dazvalajcie palitykam stavić nad imi ekśpierymienty. Mahčyma, zaŭtra Łukašenka vyčyścić biełarusizataraŭ ź dziaržaparatu i pabiažyć na pakłon u Maskvu, a havorka ŭ vašaha dziciaci ŭžo budzie sapsavana nazaŭždy», — tak skančajecca antybiełaruski materyjał rasijskich prapahandystaŭ. 

• 0
• 0
• 0
• 0
• 0
• 0
• 0
• 0