Były ministr pradaŭ svoj katedž u Drazdach sa źnižkaj $1 miljon

U apošnija tydni z sajtaŭ ahienctvaŭ nieruchomaści źnikła abjava ab prodažu katedža ŭ Drazdach na zavułku Cichim. Hetym domam płoščaj 267 m2 vałodała siamja byłoha ministra justycyi Viktara Hałavanava. Ciapier jon pracuje rektaram u Biełaruskim instytucie pravaznaŭstva.

Pavialičyć

My ŭžo pisali pra sprobu Hałavanavych abnajavić «bonus», atrymany ad dziaržavy ŭ 2000-ja.

Syn ministra (darečy, vykładčyk u baćkavym univiersitecie) u svoj čas atrymaŭ katedž u padarunak ad baćki, a paśla vystaviŭ jaho na prodaž za $1,4 miljona.

Pavialičyć

Na fonie kryzisu cana vyhladała nieadekvatnaj rynkavym realijam. Haspadaram davodziłasia raz za razam źnižać canu.

I voś ciapier, jak stała viadoma «Našaj Nivie», Hałavanavy ŭsio ž zmahli znajści kupca. Uhoda była zarehistravanaja ŭ kancy maja 2016 hoda.

Kolki ŭdałosia atrymać siamji byłoha ministra? U damovie zapisana 8 miljardaŭ 235 miljonaŭ 360 tysiač biełaruskich rubloŭ. Pa tahačasnym kursie heta roŭna $420 tysiač. Atrymałasia kala $1570 za kvadratny mietr.

Takim čynam, źnižka ŭ paraŭnańni ź pieršasnaj prapanovaj skłała kala $1 miljona.

Adnak navat u takim razie košt doma siamji byłoha čynoŭnika adpaviadaje siaredniamu zarobku «čystymi», atrymanym biełarusam za 115 hadoŭ.

Kupiła dom 62-hadovaja žycharka Minska. Jana niepubličny čałaviek, jaje proźvišča nidzie raniej nie fihuravała.

Aproč doma, joj dastalisia 9,94 sotki elitnaj ziamli. Praŭda, ułaśnikam nadzieła farmalna ličycca Respublika Biełaruś.

Reč u tym, što čynoŭnikam nakštałt Hałavanava, jakija nie trapili ŭ pieršy «drazdoŭski pryzyŭ» (tam byli Viktar Šejman, Michaił Miaśnikovič i dziasiatki inšych), ziamla vydzialałasia nie va ŭłasnaść, a pa pravie pažyćciovaha spadčynnaha vałodańnia.

Pradaŭšy dom u Drazdach, Hałavanaŭ na vulicy nie zastaniecca. Jašče z 1990-ch u jaho jość prastornaja trochpakajoŭka ŭ «čyrvonym domie» na vulicy Maksima Tanka.

* * *

Jak vyhladaŭ dom Hałavanavych?

Hości Hałavanavych traplajuć u prastorny choł (30 m²). Adtul razychodziacca dźviery ŭ haścinuju (39 m²), žyły pakoj (22 m²) i haraž (32 m²). Taksama ŭnizie znachodziacca kuchnia (20 m²), harderobnaja (8 m²), sanvuzieł i topačnaja. Praz šklanyja dźviery možna vyjści ŭ dvor z dvuch bakoŭ doma.

Kali ŭźniacca pa draŭlanaj leśvicy na mansardny pavierch, apyniešsia ŭ čarhovym chole (40 m²). Vakoł jaho try žyłyja pakoi (kala 20 m² kožny), jašče adna harderobnaja i jašče dva sanvuzły.

Interjery vyhladajuć prostymi. Na ścienach raźviešanyja karciny i niejkija hramaty. Nad pracoŭnym stałom — darts.

Vid z bałkona taksama nie ŭražvaje, susiednija katedžy stajać uščylnuju. Zatoje možna vitacca sa staršynioj CVK Lidzijaj Jarmošynaj, jakaja žyvie nasuprać.

Pavialičyć

Pavialičyć

Pavialičyć

Viktar Hałavanaŭ naradziŭsia ŭ 1952 u Barysavie. Skončyŭ jurydyčny fakultet BDU (1979), Instytut palitałohii i sacyjalnaha kiravańnia KPB (1991). Kandydat jurydyčnych navuk.

U 1980—1987 byŭ na partyjnaj pracy, u 1987—1988 — kiraŭnik adździeła justycyi Mahiloŭskaha abłvykankama. U 1988—1992 — instruktar dziaržaŭna-pravavoha adździeła CK KPB, načalnik adździeła, namieśnik načalnika ŭpraŭleńnia Ministerstva justycyi Biełarusi. U 1992—1995 — namieśnik staršyni Dziaržaŭnaha patentnaha viedamstva. U 1995—1996 — člen Minskaj haradskoj kalehii advakataŭ.

U 1996—2000 — namieśnik, pieršy namieśnik ministra justycyi. U 2000—2001 — načalnik Hałoŭnaha dziaržaŭna-pravavoha ŭpraŭleńnia Administracyi prezidenta. U 2001—2011 — ministr justycyi. 

Ciapier — rektar Biełaruskaha instytuta pravaznaŭstva.

Žanaty. Maje dvaich dziaciej.

• 0
• 0
• 0
• 0
• 0
• 0
• 0
• 0