Tamaru Ščapiotkinu vinavaciać u supracoŭnictvie z zamiežnym ŚMI biez akredytacyi.
Sudovy praces nad žurnalistkaj ź Biarozy Tamaraj Ščapiotkinaj, jakuju abvinavačvajuć u supracoŭnictvie z zamiežnym ŚMI biez akredytacyi, prajšoŭ siońnia, 6 sakavika. Praŭda, žurnalistka nie viedaje sudovaha rašeńnia.
Pieršy razhlad spravy musiŭ adbycca 27 lutaha ŭ sudzie Leninskaha rajonu Bresta. Adnak u toj dzień praces pieranieśli — sudździa viarnuŭ pratakoł u milicyju na dapracoŭku.
Jak paviedamiła Tamara Ščapiotkina, pra novy razhlad spravy jana daviedałasia napiaredadni ŭviečary… praz SMS.
Ščapiotkina: «5-ha sakavika ŭviečary kala 10-j hadziny atrymlivaju SMS, što ŭ mianie na siońnia (6-ha sakavika) sud. Ad kaho SMS — ničoha nie paviedamlałasia. Tolki napisana, što sud pa administratyŭnaj spravie «Ličycie heta SMS aficyjnym papiaredžańniem».
Niahledziačy na adsutnaść aficynaj pozvy ŭ sud, Tamara Ščapiotkina 6 sakavika ŭsio ž taki pryjechała ź Biarozy ŭ abłasny centr. Praŭda, patrapić na razhlad ŭłasnaj spravy u jaje nie atrymałasia, choć i pryjechała jana svoječasova.
Ščapiotkina: «Advakat pryjšoŭ u 9.20 — kabiniet sudździ byŭ začynieny. Jon zajšoŭ u 9.30 — sudździa skazaŭ, što idzie praces. 9.40 zajšoŭ skazali, što sprava Ščapiotkinaj užo raźledžanaja bieź jaje, bo… jana nie pryjechała… Jakoje rašeńnie, nie paviedamlajuć».
Na dziejańni supracoŭnikaŭ suda Tamara Ščapiotkina napisała skarhu. Razam z advakatam jana budzie sprabavać usio ž taki atrymać pastanovu suda.
Nahadajem, što ŭ śniežni 2014 hoda niezaležnaja žurnalistka ź Biarozy ŭžo była aštrafanaja za supracoŭnictva z «Radyjo Racyja». Jana atrymała štraf u pamiery 4,5 miljona rubloŭ.
Kamientary