Jak prykład Ryhor Vasilevič pryhadaŭ sytuacyju z žycharom Homiela Siarhiejem Siamionavym, jaki zapatrabavaŭ deklaracyju na biełaruskaj movie.
"Adkaznaść za niepavahu da dziaržaŭnaj movy nichto nie admianiaŭ", — zajaviŭ staršynia Kanstytucyjnaha suda (KS) Biełarusi Ryhor Vasilevič 18 vieraśnia ŭ Minsku padčas sieminara "Sadziejańnie bolš šyrokamu prymianieńniu mižnarodnych standartaŭ u halinie pravoŭ čałavieka ŭ pracesie vykanańnia pravasudździa ŭ Respublicy Biełaruś".
"Da nas nieadnarazova pastupajuć skarhi na toje, što zajavu ŭ sud nie prymajuć, tamu što jana napisana pa-biełarusku. Ja sam bačyŭ takuju rezalucyju: "Pierapišycie zajavu na narmalnaj movie". U Kanstytucyi zapisana, što ŭ Biełarusi dźvie dziaržaŭnyja movy — ruskaja i biełaruskaja, tamu takaja rezalucyja źjaŭlajecca niepavahaj da dziaržaŭnaj movy", — padkreśliŭ R.Vasilevič.
Jak prykład niepavažlivaha staŭleńnia kiraŭnik KS R.Vasilevič pryhadaŭ situacyju z žycharom Homiela Siarhiejem Siamionavym. U žniŭni małady čałaviek pierasiakaŭ biełaruska-ŭkrainskuju miažu na ciahniku. U punkcie propusku "Novaja Huta" mytniki zapatrabavali ad jaho zapoŭnić dekłaracyju. Siamionaŭ zapatrabavaŭ dekłaracyju na biełaruskaj movie, bo jon drenna vałodaje ruskaj i baicca, što pry zapaŭnieńni mytnaha dakumienta moža dapuścić pamyłki. U adkaz na heta supracoŭniki mytni skłali ŭ dačynieńni da Siamionava pratakoł ab administracyjnym pravaparušeńni — ab niepadparadkavańni patrabavańniam słužbovaj asoby.
"Takija vypadki niedapuščalnyja, — padkreśliŭ R.Vasilevič. — Ale, na žal, jany nie redkija. Da nas navat źviarnuŭsia abituryjent, u jakoha pytańni da centralizavanaha testavańnia pa biełaruskaj movie byli napisanyja pa-rusku. Ci moža jon pravilna na ich adkazać? U takich vypadkach, chacia heta i nie kampietencyja Kanstytucyjnaha suda, my nakiroŭvajem listy ŭ adpaviednyja orhany, jakija pavinny vypravić situacyju. Jak praviła, situacyja vypraŭlajecca".
Staršynia Kanstytucyjnaha suda taksama zaznačyŭ, što ŭ Kanstytucyi Biełarusi zamacavana niedapuščalnaść dyskryminacyi hramadzian pa relihijnych, pałavych, rasavych i moŭnych pryncypach. "Z usim, aprača movy, u nas dobra, skarhaŭ nie pastupaje", — zajaviŭ R.Vasilevič.
Jon zaklikaŭ sudździaŭ karystacca biełaruskaj movaj pa zapatrabavańni ŭdzielnikaŭ pracesu i zaznačyŭ, što ŭsie rašeńni Kanstytucyjnaha suda adrazu ž pierakładajucca abo na ruskuju, abo na biełaruskuju movu — u zaležnaści ad taho, na jakoj movie vioŭsia razhlad skarhi abo zajavy.
Fota photo.bymedia.net
Ciapier čytajuć
«Z tatam vyrašyli: naśpieŭ čas vučycca pa-biełarusku». Žančyna raskazała, jak u 80-ja hady jeździła za 20 kiłamietraŭ ad Minska dziela adukacyi na rodnaj movie11
Kamientary