Realnyja zarobki ŭ Biełarusi rastuć, navat u biudžetnikaŭ. U jakoj śfiery rost najbolšy?

Čamu zarobki rastuć

Pryčyn rostu zarobkaŭ niekalki. Siarod ich — rost makraekanamičnych pakazčykaŭ i VUP, a taksama składanaja demahrafičnaja situacyja i mihracyja pracazdolnaha nasielnictva. Kampanii i pradpryjemstvy adčuvajuć deficyt kadraŭ. Kab pryciahnuć śpiecyjalistaŭ, jany vymušanyja pavyšać zarpłatu.

Razam z tym ekśpiert BEROC Nastaśsia Łuzhina źviartaje ŭvahu, što tempy rostu zarobkaŭ zapavolvajucca.

«Letaś za studzień-lipień rost realnaha zarobku skłaŭ 13,3%, za anałahičny pieryjad hetaha hoda — plus 10,5%.

Kali brać pieryjad lipień da lipienia, to ŭ 2024 hodzie pryrost skłaŭ 15,4% u adnosinach da lipienia 2023 hoda. Ciapier hety pakazčyk źniziŭsia da 7,6%. Tym nie mienš rost zachoŭvajecca, i pa niekatorych halinach jaho tempy zastajucca dosyć vysokimi», — adznačaje ekanamist.

Dzie zarablajuć bolš za ŭsich

Što tyčycca lidaraŭ pa zarobkach, to na pieršym miescy siarod halin tradycyjna «dziejnaść pavietranaha transpartu» (7,5 tysiačy rubloŭ u lipieni) i «infarmacyjnyja technałohii i dziejnaść u śfiery infarmacyjnaha abśledavańnia».

Siaredni naličany zarobak u IT u lipieni skłaŭ 7,2 tysiačy rubloŭ.

Pry hetym u realnym vyražeńni zarobak u siektary za hod źniziŭsia na 4,2% (u adnosinach da lipienia minułaha hoda). Łuzhina tłumačyć heta tym, što mahčymaści raźvićcia IT nie takija, jak byli 5-6 hadoŭ tamu. Na dynamiku zarobkaŭ ajcišnikaŭ chutčej za ŭsio ŭpłyvaje źnižeńnie kursu dalara da rubla, pakolki zarpłata niekatorych śpiecyjalistaŭ moža zaležyć ad kursaŭ valut.

Lidaram ža pa tempach rostu realnych dachodaŭ staŭ budaŭničy siektar — plus 16,3% za hod.

Pavialičyć

Pa Minsku zarobki ŭ budaŭnictvie składajuć 4166 rubloŭ (3583 na ruki) i sastupajuć tolki takim halinam, jak «infarmacyja i suviaź», «dziejnaść pavietranaha transpartu» i «finansavaja i strachavaja dziejnaść».

Budaŭnictva Łuzhina nazyvaje adnym z asnoŭnych ciapierašnich drajvieraŭ biełaruskaj ekanomiki.

Rost realnych dachodaŭ u pary z dastupnymi kredytami prykmietna ŭpłyvaje na rynak nieruchomaści. Ceny rastuć rekordnymi tempami. Adnak tut niemałavažnuju rolu adyhryvaje i toj fakt, što ceny na nieruchomaść u Biełarusi pryviazanyja da dalara, jaki prykmietna prasieŭ u dačynieńni da biełaruskaha rubla. U vyniku atrymałasia, što, niahledziačy na rost cany, dla siaredniestatystyčnaha mienčuka kvadrat staŭ amal na 10% dastupniej.

U pramysłovaści situacyja ŭskładniajecca 

«Akramia budaŭnictva, vysokija tempy rostu realnych zarobkaŭ nazirajucca ŭ dziaržkiravańni — 14,5% za hod.

A voś u pramysłovaści my bačym surjoznaje zapavoleńnie — da +4,9%, što nižej za siaredni pakazčyk. Tak adbyvajecca, pakolki mnohija pradpryjemstvy dasiahnuli miažy svajho abarotu. Składskija zapasy rastuć, majucca składanaści z ekspartam tavaraŭ», — adznačaje ekśpiert.

Pradukcyjnaść pracy ŭ pramysłovaści pa-raniejšamu raście pavolniej, čym rost zarobki.

«Razryŭ pamiž uzroŭniem rostu zarobkaŭ i pradukcyjnaściu pracy zastajecca vialikim. Za pieršaje paŭhodździe pradukcyjnaść vyrasła ŭsiaho na 2%, a zarobki na toj momant vyraśli na 11%. Dla paraŭnańnia: letaś rost pradukcyjnaści pracy byŭ na ŭzroŭni 5,3%.

Heta źjaŭlajecca važnym momantam, čamu kampanii nie mohuć zachoŭvać raniejšy rost tempaŭ zarobkaŭ, niahledziačy na deficyt kadraŭ, pakolki heta budzie pryvodzić da rostu vydatkaŭ. Atrymlivajecca, što jany dasiahnuli peŭnaj stoli», — tłumačyć ekanamist.

Čaho čakać u budučyni?

Na dumku Łuzhinoj, dalej zachavajecca ŭsio taja ž tendencyja, kali realnyja dachody praciahnuć raści, ale tempy rostu buduć źnižacca.

Naprykład, z vosieni varta čakać pavieličeńnia zarobkaŭ u biudžetnikaŭ, pakolki vyrasła bazavaja staŭka.

«A voś u pramysłovaści pa vyšej ukazanych pryčynach čakać paskareńnia rostu realnych zarobkaŭ nie varta», — ličyć ekśpiert.

• 1
• 1
• 2
• 1
• 0
• 1
• 0
• 0