Рэальныя заробкі ў Беларусі растуць, нават у бюджэтнікаў. У якой сферы рост найбольшы?

Чаму заробкі растуць

Прычын росту заробкаў некалькі. Сярод іх — рост макраэканамічных паказчыкаў і ВУП, а таксама складаная дэмаграфічная сітуацыя і міграцыя працаздольнага насельніцтва. Кампаніі і прадпрыемствы адчуваюць дэфіцыт кадраў. Каб прыцягнуць спецыялістаў, яны вымушаныя павышаць зарплату.

Разам з тым эксперт BEROC Настасся Лузгіна звяртае ўвагу, што тэмпы росту заробкаў запавольваюцца.

«Летась за студзень-ліпень рост рэальнага заробку склаў 13,3%, за аналагічны перыяд гэтага года — плюс 10,5%.

Калі браць перыяд ліпень да ліпеня, то ў 2024 годзе прырост склаў 15,4% у адносінах да ліпеня 2023 года. Цяпер гэты паказчык знізіўся да 7,6%. Тым не менш рост захоўваецца, і па некаторых галінах яго тэмпы застаюцца досыць высокімі», — адзначае эканаміст.

Дзе зарабляюць больш за ўсіх

Што тычыцца лідараў па заробках, то на першым месцы сярод галін традыцыйна «дзейнасць паветранага транспарту» (7,5 тысячы рублёў у ліпені) і «інфармацыйныя тэхналогіі і дзейнасць у сферы інфармацыйнага абследавання».

Сярэдні налічаны заробак у IT у ліпені склаў 7,2 тысячы рублёў.

Пры гэтым у рэальным выражэнні заробак у сектары за год знізіўся на 4,2% (у адносінах да ліпеня мінулага года). Лузгіна тлумачыць гэта тым, што магчымасці развіцця IT не такія, як былі 5-6 гадоў таму. На дынаміку заробкаў айцішнікаў хутчэй за ўсё ўплывае зніжэнне курсу даляра да рубля, паколькі зарплата некаторых спецыялістаў можа залежыць ад курсаў валют.

Лідарам жа па тэмпах росту рэальных даходаў стаў будаўнічы сектар — плюс 16,3% за год.

Павялічыць

Па Мінску заробкі ў будаўніцтве складаюць 4166 рублёў (3583 на рукі) і саступаюць толькі такім галінам, як «інфармацыя і сувязь», «дзейнасць паветранага транспарту» і «фінансавая і страхавая дзейнасць».

Будаўніцтва Лузгіна называе адным з асноўных цяперашніх драйвераў беларускай эканомікі.

Рост рэальных даходаў у пары з даступнымі крэдытамі прыкметна ўплывае на рынак нерухомасці. Цэны растуць рэкорднымі тэмпамі. Аднак тут немалаважную ролю адыгрывае і той факт, што цэны на нерухомасць у Беларусі прывязаныя да даляра, які прыкметна прасеў у дачыненні да беларускага рубля. У выніку атрымалася, што, нягледзячы на рост цаны, для сярэднестатыстычнага менчука квадрат стаў амаль на 10% даступней.

У прамысловасці сітуацыя ўскладняецца 

«Акрамя будаўніцтва, высокія тэмпы росту рэальных заробкаў назіраюцца ў дзяржкіраванні — 14,5% за год.

А вось у прамысловасці мы бачым сур'ёзнае запаволенне — да +4,9%, што ніжэй за сярэдні паказчык. Так адбываецца, паколькі многія прадпрыемствы дасягнулі мяжы свайго абароту. Складскія запасы растуць, маюцца складанасці з экспартам тавараў», — адзначае эксперт.

Прадукцыйнасць працы ў прамысловасці па-ранейшаму расце павольней, чым рост заробкі.

«Разрыў паміж узроўнем росту заробкаў і прадукцыйнасцю працы застаецца вялікім. За першае паўгоддзе прадукцыйнасць вырасла ўсяго на 2%, а заробкі на той момант выраслі на 11%. Для параўнання: летась рост прадукцыйнасці працы быў на ўзроўні 5,3%.

Гэта з'яўляецца важным момантам, чаму кампаніі не могуць захоўваць ранейшы рост тэмпаў заробкаў, нягледзячы на дэфіцыт кадраў, паколькі гэта будзе прыводзіць да росту выдаткаў. Атрымліваецца, што яны дасягнулі пэўнай столі», — тлумачыць эканаміст.

Чаго чакаць у будучыні?

На думку Лузгіной, далей захаваецца ўсё тая ж тэндэнцыя, калі рэальныя даходы працягнуць расці, але тэмпы росту будуць зніжацца.

Напрыклад, з восені варта чакаць павелічэння заробкаў у бюджэтнікаў, паколькі вырасла базавая стаўка.

«А вось у прамысловасці па вышэй указаных прычынах чакаць паскарэння росту рэальных заробкаў не варта», — лічыць эксперт.

• 1
• 1
• 2
• 1
• 0
• 1
• 0
• 0