— містычныя прыгоды З Нікаласам Кейджам і Ронам Перлманам.
Сезон ведзьмаў (Season of the Witch)
ЗША, 2011, каляровы, 98 хв.
Рэжысёр: Дамінік Сена
Ролі выконваюць: Нікалас Кейдж, Рон Пэрлман, Клэр Фой, Стывэн Кэмпбэл Мур, Крыстафэр Лі, Стывэн Грэм, Ульрых Томсэн
Жанр: Містычныя прыгоды
Адзнака: 7 (з 10)
Чатырнаццатае стагоддзе. Два рыцары мусяць даставіць у далёкі кляштар маладую ведзьму, якую абвінавачваюць у эпідэміі чумы. Дзяўчына выглядае анёлам, але героям прыйдзецца сутыкнуцца з самымі цёмнымі сіламі.
Карціна Дамініка Сены — ударныя містычныя прыгоды з закручаным сюжэтам і палахліваю атмасферай. У фільме ўсяго пакрыху. Сярэднявечча з крыжовымі паходамі й штурмам гарадоў, галодныя ваўкі, пошасці, ведзьмы й дэманы, годныя рыцары, спакушэнні й зацятыя бойкі.
Усе вядомыя складнікі працуюць на фільм. Дамінік Сена спраўна здымае папулярнае кіно («Угнаць за 60 секундаў» і «Пароль «Рыба-меч»« — ягоныя стужкі). І хаця галоўны рыцар Нікалас Кейдж прасякнуты ўрачыста-зляканым гераізмам, з якім актор навязліва вандруе з карціны ў карціну, гэта фільму не замінае. Куды цікавейшы рыцар Рон Пэрлман — удала намякае на «Імя ружы» й свайго «Хэлбоя», а бязвінна-падступная ведзьма Клэр Фой — адкрыццё карціны.
Фільм усцешыць масавую публіку, а сцэна ў туманным лесе прымусіць адкласці ў бок чыпсы.
Цяпер чытаюць
Адданага ябацьку, які абражаў Святлану Ціханоўскую ў Threads, кінулі за краты2
Каментары