У вагонах мінскага метро з’явілася новая схема. Яна мае адну вялікую нязручнасць
У цягніках метро сямейства «Мінск-2024», якія выходзяць на Аўтазаводскую (другую) лінію, з’явілася новая схема метро. Яна выканана ў выглядзе вузкай электроннай схемы і размешчана над дзвярыма саставу, піша Blizko.by.
Год таму паказвалі аналагічную схему на трэцяй лініі метро, і тады яна выклікала нямала нараканняў. А цяпер з’явілася на другой лініі, дзе іншая колькасць станцый, іншыя назвы і размяшчэнне перасадачных вузлоў.
Для пачатку пакажам, якія схемы з’явіліся ў 2025‑м на трэцяй лініі.
Метрапалітэн афіцыйна паведамляў, што зроблена гэта на просьбу пасажыраў (у асноўным старэйшага пакалення) для лепшага ўспрымання інфармацыі. Інфармацыя стала больш зразумелай, сцвярджае прэс-служба метро, а шрыфты — заўважна буйнейшымі, што асабліва актуальна для пасажыраў старэйшага ўзросту.
У пасажыраў узніклі такія нараканні:
«Выглядае як нейкае прывітанне з нулявых / пачатку дзясятых, прычым у максімальна стромным фармаце».
«Занадта шмат яркага зялёнага, ды і сама схема пад нахілам страшна выглядае. Першы дызайн выглядаў значна спакайнейшым і прыемнейшым».
«Я думаю, заўтра трэба тэлефанаваць у метро, гаварыць: старая карта была лепшай, па новай нічога не зразумела».
«Плашкі неаднолькавых памераў. Белае на зялёным не вельмі добра чытаецца. Подпісы адначасова на рускай і беларускай мовах аднолькавых памераў таксама дызайн псуюць усюды».
«Была нечытэльная з-за дробнага тэксту, але больш-менш акуратная, а стала слабачытэльнай з-за нагружанасці назвамі на дзвюх мовах у ідэнтычным выкананні, ды яшчэ і акуратнасць проста з MS Paint».
А цяпер на транспартным форуме падзяліліся схемай, якую выкарысталі ў цягніках другой лініі. Вось як яна выглядае.
Бачна, што ў цэлым абедзве схемы — леташняя на 3‑й лініі і цяперашняя на 2‑й — выкананыя ў адным ключы. Але разам з тым ёсць і адрозненні:
- Нахіл плашак з назвамі зроблены ў іншы бок;
- Усе назвы набраныя вялікімі літарамі;
- Перасадкі на іншыя лініі цяпер пазначаныя палосамі колераў адпаведных ліній.
Адной з нешматлікіх, але сур'ёзных нязручнасцяў называюць тое, што з-за суцэльных вялікіх літар усе назвы зліваюцца ў кашу. Некаторыя словы, літары якіх выходзяць за межы роўнага шэрагу літар (напрыклад, літары «д» у назвах «Маладзёжная», «Трактарны завод» і «Аўтазаводская» або літара «ц» у назве «Кунцаўшчына») нібы чапляюцца за белыя раздзяляльныя лініі — і чытаць становіцца яшчэ складаней.
Цяпер чытаюць
Латвія «па тэхнічных прычынах» закрыла мяжу з Беларуссю21
Каментары
https://www.londontubemap.org/maps/bakerloo-line-2026.png