Устаноўлена асоба медыка, які катаваў украінскіх палонных і дамагаўся іх у калоніі Уладзімірскай вобласці
Медыка па мянушцы Канавал, які катаваў украінскіх палонных у калоніі ва Уладзімірскай вобласці, завуць Вячаслаў Чарданцаў, устанавіў расследвальніцкі праект «Схемы».
Журналісты пагаварылі прыкладна з 50 украінцамі, якія вярнуліся з палону і ўтрымліваліся ў калоніі ў Пакіне (ПК-7) Уладзімірскай вобласці.
Паводле расповедаў палонных, Чарданцаў рэгулярна здзекаваўся з іх, прымушаў раздзявацца, імітаваць дзеянні сэксуальнага характару, адпускаў прыніжальныя заўвагі пра іх палавыя органы.
«Нам здавалася, што ён вычварэнец», — распавёў адзін з апытаных.
Акрамя таго, Чарданцаў не аказваў палонным медыцынскай дапамогі, што, у прыватнасці, прывяло да ўспышкі каросты ў калоніі.«Мы праз каросту спаць уначы не можам, просіш у яго мазь, а ён кажа, што хоча, каб мы пакутавалі».
Чарданцаву 48 гадоў, нарадзіўся ў Кыргызстане. Там працаваў фельчарам у выхаваўчай калоніі для непаўналетніх.
Згодна са справаздачай, з якой азнаёміліся «Схемы», у гэтай установе кабінет медчасткі часта быў зачынены, адсутнічалі базавыя лекі, а падлеткі пакутавалі ад інфекцыйных і дэрматалагічных хвароб у запушчанай форме.
У Расію Чарданцаў пераехаў, імаверна, у 2013 годзе, пасяліўся ў пасёлку Першамайскае паблізу Пакіна. Спачатку працаваў у дзіцячым доме, а з 2015 года — у ПК-7, дзе працуе ўжо больш за 10 гадоў.
Цяпер чытаюць
Галоўная рэдактарка гомельскай раёнкі пакаялася за тое, што абвінаваціла гурт «Дразды»13
Каментары