У Музей вольнай Беларусі перадалі выбарчыя бюлетэні-2020, якія не паспелі да канца спаліць у кацельні
Іх і іншыя сведчанні супраціву з 9 па 26 чэрвеня можна пабачыць у Музеі вольнай Беларусі ў Варшаве на выставе «Дэпатрыяцыя».
Расказваем падрабязней пра некалькі экспанатаў.
Каманда музея на працягу некалькіх месяцаў працавала, каб бяспечна вывезці і захаваць у сваёй калекцыі рэчы, што сталі сведкамі выбараў-2020, пратэстаў 90‑х і нулявых, затрыманняў, зняволення, гвалту, дваровых сустрэч, салідарнасці і супраціву.
У суме музей на сёння сабраў каля 170 артэфактаў і некалькі тысяч фотаздымкаў і відэазапісаў.
З меркаванняў бяспекі многія рэчы пакуль не дэманструюцца ў сталай экспазіцыі. Частка ж з іх — ананімізаваная.
Ацалелыя бюлетэні, на якіх можна пабачыць галасы людзей, перадала музею былая палітзняволеная, актывістка «Еўрапейскай Беларусі» Паліна Шарэнда-Панасюк.
Камплект з 20 бюлетэняў уручылі ёй жыхары Брэста, уратаваўшы іх ад поўнага спалення ў печы гарадской кацельні.
Адданым галасам за Святлану Ціханоўскую папярэднічала яе рэгістрацыя кандыдаткай у прэзідэнты. На выставе можна пабачыць тое самае пасведчанне аб рэгістрацыі.
А гэтая чорная байка належыць журналісту і блогеру Аляксандру Івуліну. У яе ён быў апрануты падчас судовых пасяджэнняў 2021‑2022 гадоў.
Сярод прадметаў, якія былі эвакуяваныя ў межах праекта, шмат сведчанняў і з 1990-х. Напрыклад, запрашэнне на акцыю «Чарнобыльскі шлях — 1996»; брашура «Шлях у нікуды, альбо Два гады прэзідэнцтва А. Лукашэнкі», выдадзеная ў 1996 годзе; перадвыбарчая ўлётка Станіслава Шушкевіча з прэзідэнцкай кампаніі 1994 года.
Супрацоўнікі музея працягнуць збіраць рэчы-доказы злачынстваў і салідарнасці, ахвярнасці і нязломнасці беларусаў. Каманда верыць, што аднойчы ўсе прадметы зоймуць ганаровае месца ў музеі ўжо на беларускай вуліцы.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары