«Водар» і «Смачны»: на ўпакоўках пішуць, што на заквасцы, а яны на дражджах
У беларускіх крамах пачалі прадаваць больш натуральны хлеб на заквасцы, але з нюансам. На яго звярнула ўвагу карыстальніца Threads Дзіна, піша Blizko.by.
Дзяўчына выклала фота двух відаў хлебу вытворчасці Слуцкага і Мінскага хлебазаводаў. На ўпакоўках было пазначана, што абодва віды прадукцыі прыгатаваныя з выкарыстаннем закваскі, а значыць з'яўляюцца больш натуральным варыянтам у параўнанні са звычайным хлебам, бо ў іх няма прамысловых дражджэй. Але на адваротным баку ў складзе ў абодвух выпадках былі пазначаныя хлебапякарныя дрожджы.
У каментарах меркаванні разышліся:
«І што вас тут бянтэжыць? Выраб хлеба на заквасцы не выключае дадавання прэсаваных дражджэй, больш за тое, гэта класічная практыка».
«На мінулых выхадных у мяне было такое ж пытанне да гэтага хлеба. Вы не самотныя, аўтар. Як на мяне, 100% на заквасцы азначае, што там толькі закваска».
«А ў чым паніка? Закваска — тыя ж дрожджы, толькі ў профіль. Біяхімія працэсу аднолькавая, розніца толькі ў араматыцы».
«Проста маркетынг, але і ў цэлым адно другому не супярэчыць. Закваска — гэта дзікія дрожджы плюс малочнакіслыя бактэрыі».
У традыцыйнай (натуральнай) хлебнай заквасцы сапраўды абавязкова павінны быць дрожджы. Але не звычайныя, а «дзікія» — натуральныя, якія збіраюць разам з сыравінай для «спантаннага» браджэння. Менавіта гэтыя «дзікія» дрожджы адказваюць за пад'ём цеста і ўтварэнне пышнага мякішу, выдзяляючы вуглякіслы газ. Хлеб на заквасцы лічыцца больш карысным, таму што ў закваску не дадаюць цукар або прамысловыя дрожджы. У складзе названых хлябоў не было «дзікіх» дражджэй, а значыць іх карыснасць з'яўляецца даволі спрэчнай.
Каментары
Кім лічыцца? Адкуль рэдакцыя бярэ такую бязглудзьдзіцу? Розьніца паміж закваскай і фасаванымі дражджамі ў розным араматычным профілі. Які пры тым вызначаецца збольшага малочнакіслымі бактэрыямі, прысутнымі ў заквасцы, а не дражджавым грыбком. Ніякай розьніцы ў карыснасьці няма. Да чаго там "дадатковы цукар" і "пышнасьць" - увогуле загадка. Мука ўтрымлівае амілазу, пры дадаваньні вады яна каталізуе гідралітычную рэакцыю, і з крухмала атрымліваюцца цукры, якія забясьпечваюць дрожджы. Дадатковы цукар звычайна дадаюць для дадатковай слодычы, ад віду дрожджаў тут нічога не залежыць.
Як кажа стары жарт "журналіст - гэта чалавек, які з упэўнена піша пра ўсё, ня ведаючы нічога".