Украінцы атакавалі завод у Удмурціі, на якім робяць «Іскандэры» і «Арэшнік»
Завод у Воткінску, які знаходзіцца ў расійскай Удмурціі і выпускае ракеты «Іскандэр-М», «Топаль-М» і «Арэшнік», трапіў пад начную ўкраінскую атаку, паведамляе Astra. Відэа сведкаў знятае прыкладна за паўкіламетра ад магчымага эпіцэнтру пажару.
Мясцовыя жыхары ў чатах паведамляюць, што падчас атакі пашкоджаныя цэхі №22 і №36. Паводле ўкраінскіх аналітыкаў, удар быў нанесены не БПЛА, а ракетамі «Фламінга», хоць пацвярджэння гэтаму пакуль няма. Ад горада Воткінска да мяжы з Украінай амаль паўтары тысячы кіламетраў.
Воткінскі завод з’яўляецца стратэгічным абаронным прадпрыемствам і знаходзіцца пад санкцыямі ЗША, Вялікабрытаніі, ЕС, Швейцарыі, Аўстраліі, Японіі і Украіны.
Кіраўнік Удмурцкай Рэспублікі Аляксандр Брачалаў пацвердзіў атаку УСУ на «адзін з аб'ектаў» рэспублікі. Паводле яго слоў, удар быў нанесены беспілотнікамі.
Ёсць і пацярпелыя, але іх колькасць не называецца.
У жніўні 2023 года на заводзе ўжо адбыўся выбух у цэху №95, калі быў пашкоджаны адзін з карпусоў, дзе збіралі ракеты для адпраўкі ва Украіну. Прычынай тады назвалі «спрацоўванне абсталявання».
Каментары